ކަމިޝަނަރ އޮފް ޕޮލިސްގެ މަސްއޫލިއްޔަތު އިސްމާޢީލް ނަވީންއާ ހަވާލުކޮށްފި!

ކަމިޝަނަރ އޮފް ޕޮލިސްގެ މަސްއޫލިއްޔަތު ޑެޕިއުޓީ ކަމިޝަނަރ އޮފް ޕޮލިސް އިސްމާޢީލް ނަވީންއާ ހަވާލުކޮށްފިއެވެ.

ދާޚިލީ ސަލާމަތާބެހޭ ވަޒީރު ޢަލީ އިހުސާން ރޭ މީސްމީޑިއާގައި ކުރެއްވި ޕޯސްޓެއްގައި ވިދާޅުވީ ފުލުހުންގެ މުއައްސަސާއިން މިވަގުތު އެއްމެ އިސްކަންދީގެން ކުރިއަށްގެންދާ މަސައްކަތަކީ މިހާރު ހިނގަމުންދާ ތަޙުޤީޤުގެ މަސައްކަތްކަމަށްވެފައި އެތަޙުޤީޤުގެ ކަންކަމާ އެއްމެ އިސްކޮށް ހަވާލުވެ ހުންނެވީ ޑެޕިއުޓީ ކަމިޝަނަރ އިސްމާއިލް ނަވީންކަމަށްވާތީ ކަމިޝަނަރ އޮފް ޕޮލިސް ކަމަށް ބޭފުޅަކު އައްޔަންކުރެވެންދެން އެ މަސްއޫލިއްޔަތު ވަގުތީގޮތުން އަދާކުރައްވަން ޑެޕިއުޓީ ކަމިޝަނަރ އިސްމާއިލް ނަވީން ކަނޑައަޅުއްވާފައިވާ ކަމަށެވެ.

ކޮމިޝަނަރ އޮފް ޕޮލިސްގެ މަޤާމުގައި ހުންނެވި ޢަލީ ޝުޖާޢު ރޭގެ ވަގުތެއްގައި ވަނީ އެ މަޤާމުން އިސްތިޢުފާ ދެއްވައިފައެވެ.

ޝުޖާޢު އިސްތިޢުފާ ދެއްވުމާއި ގުޅިގެން ވަޒީރު އިހުސާން އެންމެ ފުރަތަމަ ވިދާޅުވީ ކޮމިޝަނަރ އޮފް ޕޮލިސްގެ މަސްއޫލިއްޔަތުތައް ވަގުތީ ގޮތުން އަދާކުރައްވާނީ ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީ ކަމުގައި ހަމަޖައްސަވާފައިވާ ކަމަށެވެ.

ޢަލީ ޝުޖާޢު އިސްތިޢުފާ ދެއްވާފައި މިވަނީ މިމަހުގެ 17 ވަނަ ދުވަހުގެ ރޭ ހ. ފެންޓެނޯއި ގެއިން އަންހެނަކު ވެއްޓުނު ހާދިސާ ތަޙުޤީޤު ކުރުމުގައި ފުލުހުން އިންސާފުވެރި ނޫން ކަމަށްބުނެ، ވެއްޓުނު އަންހެން މީހާއަށް އިންސާފު ހޯޑާ ދިނުމަށާ ދާޚިލީ ސަލާމަތާބެހޭ ވަޒީރު އަދި ދަތުރުފަތުރާބެހޭ ވަޒީރުގެ އިތުރުން ކޮމިޝަނަރ އޮފް ޕޮލިސް ޢަލީ ޝުޖާ އިސްތިޢުފާދެއްވުމަށް ގޮވާލާ މާލޭގައި ޒުވާނުންތަކެއް ސިލްސިލާކޮށް މުޒާހަރާ ކުރަމުން އަންނަ ދަނޑިވަޅެއްގައިކަން ފާހަގަ ކުރެވެއެވެ.