މިފްކޯގެ ސީއީއޯއަކަށް ފަރުޙަތު ސަޙީރު އައްޔަނުކޮށްފި!

މިފްކޯގެ ސީއީއޯއަކަށް ފަރުޙަތު ސަޙީރު އައްޔަނުކޮށްފިއެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން މިރޭ ބުނީ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް، މިފްކޯގެ ގެ މެނޭޖިން ޑިރެކްޓަރ އަދި ޗީފް އެގްޒެކްޓިވް އޮފިސަރ ކަމުގެ މަޤާމަށް މއ. އަޅިވިލާގެ، ބްރިގޭޑިއަރ ޖެނެރަލް (ރޓ) ފަރުޙަތު ޝަޙީރު އައްޔަންކޮށްފައި ވާކަމަށެވެ.

މި މަޤާމަށް ފަރުޙަތު އައްޔަނު ކުރައްވާފައި މި ވަނީ އެ މަޤާމުގައި ހުންނެވި ޔޫކްރެއިންގެ ރައްޔިތެއް ކަމަށްވާ ޑރ. ވިޓާލީ ލިއުބިމޮވް، މިފްކޯގެ ސީއީއޯ އަދި މެނޭޖިންގ ޑައިރެކްޓަރގެ މަޤާމުން ، މިމަހުގެ 3 ވަނަ ދުވަހު ވަކިކުރެއްވުމަށްފަހުގައެވެ.

ޑރ. ވިޓާލީ މިފްކޯއާ ހަވާލުވީ މިދިޔަ 2024 ވަނަ އަހަރުގެ ޑިސެމްބަރު މަހުގެ ތެރޭގައެވެ.

މިފްކޯގެ ތެރޭގައި ކަރަޕްޝަން ވަރަށް ބޮޑަށް އަށަގަނެފައިވާ ކަމަށް ގިނަ ބަޔަކު ބުނަމުން އަންނައިރު، މިފްކޯގެ ތެރޭގައި ފެތުރިފައިވާ ކޮރަޕްޝަން މުލުން ލުހެލައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވެއެވެ. އަދި ބޭރު ޤައުމެއްގެ ބޭފުޅެއް މިފްކޯގެ ސީއީއޯއަކަށް އައްޔަނު ކުރެއްވީ ވެސް ކޮރަޕްޝަން ނައްތާލުން ކަމަށް ރައީސް ވިދާޅުވެފައިވެއެވެ.

ނަމަވެސް 3 މަސް ދުވަސް ފަހުން ޑރ. ވިޓާލީ ކުއްލިގޮތަކަށް ވަކި ކުރެއްވި ސަބަބެއް ޕީސީބީން ހާމަކޮށްފައެއް ނުވެއެވެ.

ފަރުޙަތު ސަޙީރުއަކީ ކުރިން ސިފައިންގެ ޚިދުމަތުގައި އިސްމަޤާމުތަކެއް ފުރުއްވި އަދި އޭގެފަހުން އައިޖީއެމް ހޮސްޕިޓަލުގެ ސީއީއޯކަން ވެސް އަދާކުރެއްވި ބޭފުޅެއްކަން ފާހަގަކުރެވެއެވެ.