ސައޫދީ އެއާޕޯޓުތަކަށް ދިން ހަމަލާތަކެއްގައި 3 މީހުން މަރުވެއްޖެ

މުހައްމަދު ރިފާއު2026 އޮކްޓޯބަރު 08

ސައޫދީ އަރަބިއްޔާގެ އެއާޕޯޓުތަކަށް އީރާނާ ގުޅުންހުރި ހޫޘީ ޖަމާއަތުން ދިން ހަމަލާތަކެއްގައި ތިން މީހުން މަރުވެ، ގިނަ ބަޔަކު ޒަޚަމްވެއްޖެއެވެ. މިއީ އެމެރިކާއާއި އީރާނާ ދެމެދު އުފެދިފައިވާ ނުތަނަވަސްކަމުގެ ތެރެއިން، ޔަމަންގައި ހިނގަމުންދާ ހަނގުރާމަ އިތުރަށް ވަރުގަދަވެގެން ދިޔަ ދަނޑިވަޅެއްގައި ދިން ހަމަލާތަކެކެވެ.

ސައޫދީގެ ސިވިލް އޭވިއޭޝަން އޮތޯރިޓީން ހާމަކުރި ގޮތުގައި، ވެރިރަށް ރިޔާޟްގެ ކިންގް ޚާލިދު އިންޓަނޭޝަނަލް އެއާޕޯޓަށް ދިން ހަމަލާގައި އެކަކު މަރުވެ އަށް މީހުން ވަނީ ޒަޚަމްވެފައެވެ. އަދި އަބްހާ އެއާޕޯޓަށް ދިން ހަމަލާގައި ދެ މީހުން މަރުވެ 28 މީހުން ވަނީ ޒަޚަމްވެފައެވެ. މި ހަމަލާތަކުގެ ރައްދުގައި ސައޫދީ އިސްވެއޮންނަ އަސްކަރީ އިއްތިހާދުން ވަނީ ޔަމަންގެ ސާދާ، ހުދައިދާ، ޖައުފް އަދި މައާރިބްގެ ތެރޭގައިވާ ހޫޘީންގެ 80 އަށްވުރެ ގިނަ އަސްކަރީ ސައިޓްތަކަށް ވަރުގަދަ ވައިގެ ހަމަލާތަކެއް ދީފައެވެ.

މީގެއިތުރުން، ހޫޘީން ވަނީ ޔަމަންގެ ސަރުކާރުގެ ކޮންޓްރޯލް އޮންނަ އަދަން އިންޓަނޭޝަނަލް އެއާޕޯޓަށްވެސް ބެލިސްޓިކް މިސައިލާއި ޑްރޯން ހަމަލާތަކެއް ދީފައެވެ. މި ހަމަލާގެ ތެރެއިން މިސައިލެއް ވެއްޓިފައިވަނީ ކައިރޯއިން އައި ފްލައިޓެއް ޖައްސަން މަދު މިނެޓުކޮޅަކަށް ވެފައިވަނިކޮށް، އެއާޕޯޓުގެ ރަންވޭ ކައިރިއަށެވެ. މި ހަނގުރާމައިގެ ސަބަބުން 200,000 އަށްވުރެ ގިނަ މީހުން ގެދޮރުގެއްލި، ބޮޑު އިންސާނީ ކާރިސާއެއް ވަނީ އުފެދިފައެވެ.

ބާބު އަލްމަންދަބު ކަނޑުއޮޅި ކައިރީގައި ހަނގުރާމަ ވަރުގަދަވަމުންދާއިރު، ސައޫދީގެ ސަލާމަތީ ކަންކަން ވަރުގަދަކުރުމަށް ތުރުކީއާއި ސޫރިޔާއިން އަސްކަރީ އެހީތެރިކަން ފޯރުކޮށްދިނުމަށް ދަނީ މަޝްވަރާކުރަމުންނެވެ. ހޫޘީންގެ އަސްކަރީ ތަރުޖަމާނު ޔަހްޔާ ސަރީ ވަނީ ރިޔާޟްގެ އެއާޕޯޓަށް ޑްރޯން ހަމަލާތަކެއް ދިންކަމަށް އިއުތިރާފުވެފައެވެ.