މުއްސަނދިންނަށް އާސަންދައިން ލިބޭ މިންވަރު ބަދަލު ކުރަނީ

ޒައުޖަތު އަޙުމަދު2026 ސެޕްޓެމްބަރު 07

މުއްސަނދިންނަށް އާސަންދައިން ލިބޭ މިންވަރު ބަދަލުކުރަން ނިންމާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވީ، 60،000 ރުފިޔާ އަށްވުރެ ބޮޑު އާމްދަނީއެއް ލިބޭނަމަ އާސަންދައިގެ ފުލް ކަވަރޭޖް ނުލިބޭގޮތަށް ހަމަޖައްސަން ނިންމަވާފައިވާކަމަށެވެ.

އާސަންދަ މިހާރު އޮންނަ ގޮތުން އެންމެ މުއްސަނދި މީހާއަށްވެސް އަދި އާދައިގެ މީހާއަށްވެސް އެ ނިޒާމުގެ ދަށުން އެއްވެސް ތަފާތެއް ނެތި ޚިދުމަތް ލިބޭކަން ފާހަގަކުރައްވާ ރައީސް ވިދާޅުވީ އެއީ އެންމެ ރަނގަޅު ގޮތްކަމަށް ކަމާއި ގުޅޭ ފަންނީ މާހިރުންވެސް ޤަބޫލު ނުކުރައްވާކަމަށެވެ.

އެހެންކަމުން ކުރިއަށް އޮތް ދުވަސްތަކުގައި 60،000 ރުފިޔާއިން މަތިން މުސާރަ ލިބޭ ފަރާތްތަކަށް މިހާރު އޮންނަ ގޮތަށް ފުލް ކަވަރޭޖުގެ އާސަންދަ ނުލިބޭނެކަމަށް ރައީސް މުޢިއްޒު ވިދާޅުވިއެވެ.

"60،000 ރުފިޔާއިން މައްޗަށް މުސާރަ ލިބޭ ފަރާތްތަކުން ކޯޕޭ ނުވަތަ ޕްރީޕޭ ނިޒާމެއްގެ ތެރެއިން އާސަންދަ ލިބޭނެ. އޭގެ ސަބަބުން އަހަރު ދުވަހުގެ ތެރޭގައި 287 މިލިއަން ރުފިޔާ ރައްޔިތުންގެ އެހެންކަންކަމަށް ޚަރަދުކުރަން ލިބޭނެ." ރައީސް ޑރ.މުޙައްމަދު މުޢިއްޒު ވިދާޅުވިއެވެ.

މުއްސަނދިންނަށް އެހެން އާއްމުންނާއި އެއްފަދައިން އާސަންދަ ނިޒާމުގެ ތެރެއިން ހުރިހާ ފަރުވާއެއް ލިބުމަކީ ހަމަޖެހޭ އުސޫލެއް ނޫންކަމަށް ރައީސް ވިދާޅުވިއެވެ. ރައީސް ވިދާޅުވީ، އެ ބަދަލުތައް އަންނަ މަހުން ފެށިގެން ގެނައުމަށް ހަމަޖެހިފައިވާ ކަމަށެވެ. އަދި މި ބަދަލުގެ ސަބަބުން މި އަހަރުވެސް އާސަންދައަށް ކުރާ ޚަރަދު ކުޑަކުރެވޭނެކަމަށާއި ނަމަވެސް އެ ބަދަލުގެ ސަބަބުން ޚަރަދަށް ބޮޑު ބަދަލެއް އަންނާނީ އަންނަ އަހަރުކަމަށް ރައީސް ވިދާޅުވިއެވެ.

އާސަންދަ ނިޒާމަށް ގެންނަ ބަދަލުތަކުގެ އިތުރު ތަފްސީލުތައް އެކަމާއި ގުޅުންހުރި އިދާރާތަކުން ހާމަކުރައްވާނެ ކަމަށްވެސް ރައީސް ވިދާޅުވިއެވެ.

އާސަންދައަކީ، ދިވެހިރާއްޖޭގެ ހުރިހާ ރައްޔިތުންނަށް ބޭސްފަރުވާގެ ޚިދުމަތް ހިލޭ ލިބޭނެ މަގުފަހިކޮށްދިނުމަށްޓަކައި ދިވެހި ސަރުކާރުން ގާއިމުކޮށްފައިވާ ޤައުމީ ހެލްތު އިންޝުއަރެންސް ނިޒާމެވެ.