އާއިލާއިން ޖަނާޒާގެ ކަންކަން ފަށާފައިވަނިކޮށް، ނޭޕާލް ފެންބޮޑުވުމުގައި ގެއްލުނު އަންހެނަކު 10 ދުވަސް ފަހުން ސަލާމަތުން ފެނިއްޖެ

މުހައްމަދު ރިފާއު2026 ސެޕްޓެމްބަރު 07

ނޭޕާލަށް ކުރިމަތިވި ނުރައްކާތެރި ފެންބޮޑުވުމުގެ ކާރިސާގައި މަރުވެފައިވާ ކަމަށް ބަލައި އާއިލާއިން އަންހެނެއްގެ ޖަނާޒާގެ ކަންކަން ފަށާފައިވަނިކޮށް، 10 ދުވަސް ފަހުން އޭނާ ސަލާމަތުން އޮއްވައި ފެނިއްޖެއެވެ.

ސަލާމަތްކުރެވުނީ އުމުރުން ދުވަސްވީ އަންހެނެއް ކަމަށްވާ ޗަންދިކާ ކުމާރީ ޝްރެސްތާއެވެ. އޭނާ ފެނިފައިވަނީ ސިލާސާ ސަރަހައްދުގެ ބެޓްރާވަތީ އަވަށުގައި ހުރި އޭނާގެ ހަތަރު ބުރީގެ ގެ ވެއްޓި، ޗަކައާއި ފެނުގެ ތެރޭގައި އުފެދިފައިވާ ކުޑަކުޑަ ވައިރޯޅިއެއް ވަދެވޭފަދަ ޖާގައެއްގެ ތެރޭގައި ތާށިވެފައި އޮއްވައެވެ. ފުލުހުންގެ އޮފިސަރު މަހެންދުރަ ދަރުނާލް ވިދާޅުވީ، ސަލާމަތްކުރާ ޓީމަށް އޭނާގެ އަޑުއިވުނީ "އަހަރެން ސަލާމަތްކުރޭ" ކިޔައި ގޮވަނިކޮށް ކަމަށެވެ.

ނޭޕާލަށް ކުރިމަތިވި މި ކާރިސާގައި މަރުވި މީހުންގެ އަދަދު މިހާރު ވަނީ 1,300 އަށްވުރެ މައްޗަށް އަރާފައެވެ. އަދި ގްލޭޝިއާ ވެއްޓުމުގެ ސަބަބުން ހިނގި މި ކާރިސާއަށް 11 ދުވަސް ވެފައިވާއިރު، އަދިވެސް 5,000 އަށްވުރެ ގިނަ މީހުން ވަނީ ގެއްލިފައެވެ. ސަލާމަތްކުރާ ފަރާތްތަކުން ދަނީ ހައިޑްރޯޕަވަރ ޓަނަލްތަކާއި، ހަރުވެފައިވާ ޗަކަފަސްގަނޑުތަކުގެ ދަށުގައި ތާށިވެފައިވާ މީހުން ހޯދުމުގެ މަސައްކަތް ހުއްޓާނުލައި ކުރިއަށްގެންދަމުންނެވެ.

އުންމީދުތައް ފަނޑުވަމުންދިޔަ ނަމަވެސް، ޗަންދިކާގެ އިތުރުން ޓަނަލްތަކުގެ ތެރެއިން ޗައިނާގެ ރައްޔިތަކާއި، 8 އަހަރުގެ ކުޑަކުއްޖަކުވެސް ވަނީ ސަލާމަތްކޮށް، އެމީހުންގެ އާއިލާތަކާ ހަވާލުކުރެވިފައެވެ.