ފޯރިގަދަ ފައިނަލް: މެސީ އާއި ޔަމާލްގެ ކުރިމަތިލުމާއެކު ވޯލްޑް ކަޕްގެ ތާރީޚީ ފައިނަލް މިރޭ!

މުހައްމަދު ރިފާއު2026 ޖުލައި 19

ދުނިޔޭގެ ފުޓްބޯޅައިގެ އެންމެ ޝަރަފުވެރި މުބާރާތް، ފީފާ ވޯލްޑް ކަޕް 2026 ގެ ފައިނަލް މެޗުގައި މިރޭ ދުނިޔޭގެ ރޭންކިންގްގެ އެއްވަނަ އާޖެންޓީނާ އާއި ދެވަނަ ސްޕެއިން ބައްދަލުކުރާނެއެވެ. އެމެރިކާގެ ނިއު ޔޯކް-ނިއު ޖާޒީ ސްޓޭޑިއަމްގައި ކުޅޭ މި ފައިނަލަކީ ފުޓްބޯޅައިގެ ޖާދޫގަރު ލިއޮނަލް މެސީ އާއި ސްޕެއިންގެ ޒުވާން ދުވެލި ބާރު ތަރި ލަމީން ޔަމާލްގެ ކުރިމަތިލުމެކެވެ.

މި މެޗު ފެށުމަށް ހަމަޖެހިފައިވަނީ ރާއްޖޭގެ ގަޑިން މިރޭ މެންދަމު 00:00 ގައެވެ.

ދެ ޓީމު ފައިނަލަށް ދަތުރުކުރި ގޮތް

• ސްޕެއިން: ގްރޫޕް އެޗްގެ އެއްވަނަ ހޯދީ ސައުދީ އަރަބިއްޔާ އާއި އުރުގުއާއީ ބަލިކޮށް، ކޭޕް ވާޑްއާ އެއްވަރުވެގެންނެވެ. ނޮކްއައުޓް ބުރުގައި އޮސްޓްރިއާ (3-0)، ޕޯޗުގަލް (1-0)، ބެލްޖިއަމް (2-1) ބަލިކުރުމަށްފަހު، ސެމީ ފައިނަލްގައި ވަރުގަދަ ފްރާންސްގެ މައްޗަށް 2-0 އިން ކުރި ހޯދިއެވެ.
• އާޖެންޓީނާ: ގްރޫޕް ޖޭގެ އެއްވަނަ ހޯދީ އަލްޖީރިއާ، އޮސްޓްރިއާ އަދި އުރުދުން ބަލިކޮށްގެންނެވެ. ނޮކްއައުޓް ބުރުގައި ކޭޕް ވާޑް (އިތުރު ވަގުތުގައި 3-2)، މިސްރު (3-2)، ސްވިޒަލޭންޑް (އިތުރު ވަގުތުގައި 3-1) ބަލިކޮށް، ސެމީގައި އިންގްލޭންޑްގެ މައްޗަށް 2-1 އިން ކުރި ހޯދިއެވެ.

މެސީގެ ފަހު މެޗު؟

އުމުރުން 39 އަހަރުގެ ލިއޮނަލް މެސީ ވެގެންދާނީ ވޯލްޑް ކަޕް ފައިނަލެއްގައި ކުޅޭ އެންމެ ދުވަސްވީ އައުޓްފީލްޑް ކުޅުންތެރިޔާއަށެވެ. މިއީ އޭނާގެ ބައިނަލްއަގުވާމީ ކެރިއަރުގެ ފަހު މެޗަށް ވުން ގާތެވެ. އާޖެންޓީނާގެ އަމާޒަކީ ތާރީޚުގައި ޖެހިޖެހިގެން ދެވަނަ ފަހަރަށް ވޯލްޑް ކަޕް ކާމިޔާބުކުރި ތިންވަނަ ޓީމަށް ވުމެވެ.

އަނެއްކޮޅުން، މުޅި މުބާރާތުގައި އެންމެ ބަދަހި ޑިފެންސެއް ދައްކާފައިވާ ސްޕެއިން ނިކުންނާނީ 16 އަހަރަށްފަހު ފުރަތަމަ ފަހަރަށް ތަށި ކާމިޔާބުކުރުމުގެ އަޒުމުގައެވެ.

"އަހަރެމެން މިތިބީ ޓީމު މިދިޔަ އަހަރުތަކުގައި ހޯދި ކުރިއެރުމާ މެދު ވަރަށް ހިތްހަމަޖެހިފައި. އެކަމަކު އަހަރެމެން މިހިސާބުން ހުއްޓައެއް ނުލާނަން. އާޖެންޓީނާއަކީ ދުނިޔޭގެ ޗެމްޕިއަނުން، އެމީހުން ބަލިކުރަން އަހަރެމެން ކުޅުން އިތުރަށް ވަރުގަދަކުރަން ޖެހޭނެ،" — ރޮޑްރީ، ސްޕެއިންގެ ކެޕްޓަން

ލަފާކުރާ ނަތީޖާ

'އޮޕްޓާ ސުޕަސީޕީޔޫ' އިން ލަފާކުރާ ގޮތުގައި މި މެޗު ކާމިޔާބުކުރުމުގެ ފުރުސަތު ބޮޑީ ސްޕެއިންއަށެވެ. ސްޕެއިންއަށް 45 އިންސައްތަ ފުރުސަތު އޮތްއިރު، 90 މިނިޓުން އާޖެންޓީނާ މޮޅުވުމުގެ އޮތީ 26 އިންސައްތަ ފުރުސަތެކެވެ. މެޗު އެއްވަރުވެ އިތުރު ވަގުތަށް ދިއުމުގެ ފުރުސަތު އޮތީ 29 އިންސައްތައެވެ.

މި މެޗުގެ ހެޑް-ޓު-ހެޑް ރެކޯޑަށް ބަލާއިރު، ދެ ޓީމު މިހާތަނަށް ކުޅުނު 16 މެޗުގެ ތެރެއިން ދެ ޓީމުވެސް ވަނީ 6 މެޗުން މޮޅުވެ، 2 މެޗު އެއްވަރުވެފައެވެ. މިރޭގެ ފައިނަލް މެޗުގެ މެދުތެރެއިން އިންސާފުކުރާނީ ސްލޮވީނިއާގެ ރެފްރީ ސްލާވްކޯ ވިންޗިޗް އެވެ.

ދެ ޓީމުގެ ލަފާކުރާ ލައިނަޕް

މިހާތަނަށް ދެ ޓީމުގައި ވެސް އެއްވެސް ކުޅުންތެރިއަކަށް އަނިޔާގެ މައްސަލައެއް ކުރިމަތިވެފައެއް ނުވެއެވެ.

• ސްޕެއިން (4-2-3-1): ސިމޮން (ގޯލްކީޕަރު)؛ ޕޯރޯ، ކުބާސީ، ލަޕޯޓް، ކުކުރެއްލާ؛ ރޮޑްރީ، ރޫއިޒް؛ ޔަމާލް، އޮލްމޯ، ބައޭނާ؛ އޮޔާޒަބާލް.
• އާޖެންޓީނާ (4-1-3-2): މާޓީނޭޒް (ގޯލްކީޕަރު)؛ މޮލީނާ، ރޮމޭރޯ، ލިސަންޑްރޯ، ޓަގްލިއަފީކޯ؛ ޕަރޭޑޭސް؛ ޑި ޕޯލް، ފެނާންޑޭޒް، މެކް އެލިސްޓާ؛ މެސީ، އަލްވަރޭޒް.