އީރާނާ ދެކޮޅަށް ޓްރަމްޕް ކުރާ ހަނގުރާމަ ހުއްޓާލުމަށް ގޮވާލާ ކޮންގްރެސްއިން ގާރާރެއް ފާސްކޮށްފި

މުހައްމަދު ރިފާއު2026 ޖޫން 24

ރައީސް ޑޮނަލްޑް ޓްރަމްޕް އިސްވެ ހުރެ އީރާނާއެކު ކުރިއަށްގެންދާ ހަނގުރާމަ ހުއްޓާލުމަށް ނުވަތަ އަސްކަރީ އެއްވެސް ހަރަކާތެއް އިތުރަށް ކުރިއަށްގެންދިއުމުގެ ކުރިން ކޮންގްރެސްގެ ހުއްދަ ހޯދުމަށް މަޖުބޫރުކުރާ ގަރާރެއް އެމެރިކާގެ ސެނެޓުން ފާސްކޮށްފިއެވެ.

ރިޕަބްލިކަން ޕާޓީގެ އަޣްލަބިއްޔަތު އޮންނަ ސެނެޓުން މި ގަރާރު ފާސްކުރީ ޑިމޮކްރެޓުންނާ ރިޕަބްލިކަން ޕާޓީގެ ބައެއް މެންބަރުން ގުޅިގެން، 48 ވޯޓާ ދެކޮޅަށް 50 ވޯޓުންނެވެ. މި ގަރާރު މި މަހުގެ ކުރީކޮޅު އެމެރިކާގެ ހައުސް އޮފް ރެޕްރެޒެންޓެޓިވްސްއިންވެސް ވަނީ ފާސްކޮށްފައެވެ.

މިއީ 1973 ވަނަ އަހަރުގެ "ވޯ ޕަވަރސް ރިޒޮލިއުޝަން" ގާނޫނު ހެދިފަހުން، ރައީސަކު ކުރަމުންދާ އަސްކަރީ ހަރަކާތެއް ހުއްޓާލުމަށް ކޮންގްރެސްގެ ދެ މަޖިލީހުންވެސް މިފަދަ ގަރާރެއް ފާސްކުރި ފުރަތަމަ ފަހަރެވެ. ނަމަވެސް، މިއީ "ކޮންކަރަންޓް ރިޒޮލިއުޝަން" އެއް ނުވަތަ ކޮންގްރެސްގެ ޝުއޫރު ފާޅުކުރާ ގަރާރަކަށް ވެފައި، ގާނޫނީ ގޮތުން ރައީސް މައްޗަށް މިއަށް އަމަލުކުރުން މަޖުބޫރު ނުވާތީ، މިއީ ރައީސް ޓްރަމްޕްގެ ނިންމެވުންތަކަށް ހުރަސްއެޅުމަށްވުރެ ބޮޑަށް ދެވުނު "ހަނދާންކޮށްދިނުމެއް" ކަމަށް މާހިރުން ސިފަކުރެއެވެ.

މި ވޯޓާ ގުޅިގެން ރައީސް ޓްރަމްޕް ވަނީ އޭނާގެ "ޓްރުތް ސޯޝަލް" ޕްލެޓްފޯމުގައި ކޮންގްރެސްއަށް ވަރަށް ބޮޑަށް ފާޑުވިދާޅުވެފައެވެ. ޓްރަމްޕް ވިދާޅުވީ އީރާނު ބަލިވާން ކައިރިވެފައިވަނިކޮށް، ސެނެޓުން މިފަދަ ވޯޓެއް ނެގުމަކީ ކުރި ބޭކާރު ކަމެއް ކަމަށާއި، މީގެ ސަބަބުން އޭނާގެ މަސައްކަތްތަކަށް އުނދަގޫތަކެއް ކުރިމަތިވި ނަމަވެސް ކޮންމެ ގޮތަކުންވިޔަސް މިކަން ކާމިޔާބު ކުރައްވާނެ ކަމަށެވެ.

މި ހަނގުރާމައަށް ފަސް މަސް ފުރެން ކައިރިވެފައިވާއިރު، ތެލުގެ އަގުތައް އުފުލުމުގެ ސަބަބުން އެމެރިކާގެ ރައްޔިތުންގެ މެދުގައި މި ހަނގުރާމައަށް އޮތް ތާއީދު ވަނީ ވަރަށް ބޮޑަށް ދަށްވެފައެވެ. އަދި ނޮވެމްބަރު މަހު ބޭއްވުމަށް ހަމަޖެހިފައިވާ މިޑްޓާމް އިންތިޚާބާ ދިމާކޮށް ރިޕަބްލިކަން ޕާޓީގެ އެތެރޭގައި ބޮޑެތި ޚިޔާލުތަފާތުވުންތަކެއް ހުރިކަން މި ވޯޓުން ހާމަވެއެވެ. އެގޮތުން ރިޕަބްލިކަން ޕާޓީގެ ހަތަރު ސެނެޓަރުން ކަމަށްވާ ރޭންޑް ޕޯލް، ލީސާ މުރްކޯވްސްކީ، ސޫޒަން ކޮލިންސް އަދި ބިލް ކެސިޑީ ވަނީ ޓްރަމްޕާ ދެކޮޅަށް ޑިމޮކްރެޓުންނާއެކު ވޯޓު ދެއްވާފައެވެ.

އެމެރިކާގެ ގާނޫނު ބުނާގޮތުން ކޮންގްރެސްގެ ހުއްދައާ ނުލައި އަސްކަރީ ހަރަކާތްތައް ކުރިއަށްގެންދެވޭނީ 60 ދުވަހުގެ މުއްދަތަކަށެވެ. އެމެރިކާ އާއި އިސްރާއީލުން އީރާނަށް ހަމަލާދޭން ފެށީ ފެބްރުއަރީ 28 ގައެވެ. ނަމަވެސް، ވައިޓް ހައުސްއިން ބުނާ ގޮތުގައި އޭޕްރީލް 7 ގައި ދެގައުމުގެ މެދުގައި އެއްބަސްވި ސީޒްފަޔަރ ނުވަތަ ހަމަލާބަދަލުކުރުން ހުއްޓާލުމުގެ ނިންމުމާއެކު، އެ މުއްދަތު ގުނުން ވަނީ އަލުން ފެށިފައެވެ. މިހާރު ދެ ގައުމުން ވަނީ އީރާނުގެ ނިއުކްލިއާ ޕްރޮގްރާމް ހުއްޓާލުމާ ބެހޭގޮތުން މަޝްވަރާކުރުމަށް 60 ދުވަހުގެ މުއްދަތެއް ކަނޑައަޅައި، ސުލްހައިގެ އެއްބަސްވުމަކަށް ދިއުމަށް މަސައްކަތް ފަށާފައެވެ.