ވޯލްޑްކަޕްގެ 1000 ވަނަ މެޗުގައި، ވޯލްޑް ކަޕް ތާރީޚުގައި ޖަޕާނުން ހޯދި އެންމެ ބޮޑު މޮޅު ހޯދައިފި

މުހައްމަދު ރިފާއު2026 ޖޫން 21

ވޯލްޑް ކަޕް ފުޓްބޯޅަ މުބާރާތުގެ ތާރީޚުގައި ކުޅުނު 1000 ވަނަ މެޗުގައި ޖަޕާނުން ތާރީޚީ މޮޅެއް ހޯދައިފިއެވެ.

މޮންޓެރޭގައި ކުޅުނު މި މެޗުގައި ޖަޕާނުން ވަނީ 4-0 ގެ ތަފާތު ބޮޑު ނަތީޖާއަކުން ޓިއުނީޝިއާ ބަލިކޮށްފައެވެ. މިއީ ވޯލްޑް ކަޕްގެ ތާރީޚުގައި ޖަޕާނުން ހޯދި އެންމެ ބޮޑު މޮޅެވެ.

މެޗު ފެށިގެން ހަތަރުވަނަ މިނެޓުގައި ޑައިޗީ ކަމާޑާ ވަނީ ލަނޑެއް ޖަހައި ޖަޕާނަށް ކުރިހޯދައިދީފައެވެ. މި މެޗުގައި އެންމެ ފާހަގަކޮށްލެވޭ ކުޅުމެއް ދެއްކީ ދެ ލަނޑު ކާމިޔާބުކުރި އަޔާސޭ އުއެޑާއެވެ. އޭނާ ވަނީ ދުރުން ފޮނުވާލި ބާރު ހަމަލާއަކާއި ބޮލުން ފޮނުވާލި ހަމަލާއަކުން ދެ ލަނޑު ކާމިޔާބުކޮށްފައެވެ. ޖަޕާނުގެ އަނެއް ލަނޑު ކާމިޔާބުކޮށްދިނީ ޖޫންޔާ އިޓޯއެވެ.

މި މޮޅާއެކު ގްރޫޕް އެފްއިން ދެވަނަ ބުރަށް ދިއުމުގެ ފުރުސަތު ޖަޕާނަށް ވަނީ ވަރަށް ބޮޑަށް ތަނަވަސްވެފައެވެ. މީގެ ކުރިން ނެދަލޭންޑްސްއާ ކުޅުނު މެޗު އެއްވަރުވެފައި އޮތުމުން، މިހާރު ޖަޕާން އޮތީ ގްރޫޕްގެ ވަރުގަދަ މަގާމެއްގައެވެ.

އަނެއްކޮޅުން ޖެހިޖެހިގެން ދެ މެޗުން ބަލިވުމާ ގުޅިގެން ޓިއުނީޝިއާ އޮތީ މުބާރާތުން ކެޓުމުގެ ބިރުގައެވެ. އެ ޓީމަށް ދެން އޮތް ފުރުސަތަކީ ގްރޫޕްގެ ފަހު މެޗުގައި ބޮޑު މޮޅެއް ހޯދުމެވެ.