ގޯއްޗާއި ފުލެޓަށް އެދި ފޯމު ހުށަހެޅުމުގެ ސުންގަޑި މިރޭ 2:00އަށް އިތުރުކޮށްފި

ޒައުޖަތު އަޙުމަދު2026 ޖޫން 15

ގޯއްޗާއި ފުލެޓަށް އެދި ފޯމު ހުށަހެޅުމުގެ ސުންގަޑި މިރޭ 2:00އަށް އިތުރުކޮށްފިއެވެ.

"ބޯހިޔާވަހިކަން" ޕޯޓަލްއަށް ޓެކްނިކަލް މައްސަލައެއް ދިމާވެ ޚިދުމަތް ވަގުތީގޮތުން މިރޭ ވަނީ މެދުކެނޑިފައެވެ.

ނަމަވެސް ކުޑަ ވަގުތުކޮޅެއްގެ ތެރޭގައި އެ މައްސަލަ މިހާރު ހައްލުކޮށް އަލުން ވަނީ ޚިދުމަތްދޭން ފަށައިފައެވެ.

ގެދޮރުވެރިކަމާބެހޭ ވުޒާރާއިން ބުނީ "ބޯހިޔާވަހިކަން އެންމެންނަށް" ސިޔާސަތުގެ ދަށުން ގްރޭޓަރ މާލެ ސަރަޙައްދުން ގޯއްޗާއި ފްލެޓަށް އެދި އެޕްލިކޭޝަން ހުށަހެޅުމަށް ގާއިމްކޮށްފައިވާ "ބޯހިޔާވަހިކަން" ޕޯޓަލްއަށް ދިމާވި ޓެކްނިކަލް މައްސަލަ މިހާރު ވަނީ ހައްލުކުރެވިފައި ކަމަށެވެ.

އެ ވުޒާރާއިން ބުނީ މައްސަލައާއި ގުޅިގެން މި ސްކީމްތަކަށް އެޕްލިކޭޝަން ހުށަހެޅުމުގެ ވަގުތު މިރޭ ދަންވަރު 2:00 އަށް އިތުރުކުރެވިފައިވާ ކަމަށެވެ.

ގޯއްޗާއި ފްލެޓަށް އެދި އެޕްލިކޭޝަން ހުށަހެޅުމަށް ދީފައިވާ ސުންގަޑި ހަމަވާނީ މިރޭ 11:59 އަށް ކަމަށް އެ ވުޒާރާއިން ކުރިން ވަނީ ބުނެފައެވެ.

މި ސިޔާސަތުގެދަށުން ގޯއްޗާއި ފުލެޓަށް އެދި އެޕްލިކޭޝަން ހުށަހެޅުމަށް މިއަހަރުގެ ޖަނަވަރީގައި ހުޅުވާލުމަށްފަހު ދީފައިވާ މުއްދަތު 3 ފަހަރަކު އިތުރުކޮށްފައިވާކަން ފާހަގަ ކުރެވެއެވެ.