ބިމާއި ފްލެޓަށް ކުރިމަތިލުމުގެ މުއްދަތު ޖޫން 15 ގެ ނިޔަލަށް އިތުރުކޮށްފި

މުހައްމަދު ރިފާއު2026 މޭ 23

މި ސަރުކާރުގެ ފުރަތަމަ ބޯހިޔާވަހިކަމުގެ މަޝްރޫޢުގެ ދަށުން މާލެ ސަރަހައްދުން ދޫކުރުމަށް ހަމަޖެހިފައިވާ ގޯއްޗާއި ފްލެޓްތަކަށް ކުރިމަތިލުމުގެ ސުންގަޑި، އަންނަ ޖޫން މަހުގެ 15 ވަނަ ދުވަހުގެ ނިޔަލަށް ހައުސިންގް މިނިސްޓްރީން މިއަދު އިތުރުކޮށްފިއެވެ.

މިނިސްޓްރީން ބުނި ގޮތުގައި މީގެ ކުރިން މި މަހުގެ ނިޔަލަށް ހަމަވާ ގޮތަށް އޮތް ސުންގަޑި އިތުރުކުރަން ނިންމީ، ކުރިއަށް އޮތް އަޟްޙާ ޢީދުގެ ބޮޑު ބަންދާ ދިމާކޮށް ގިނަ ބަޔަކު ރަށުން ބޭރަށް ދިއުމާއި، ސަރުކާރު ބަންދުވުމުގެ ސަބަބުން ފޯމަށް ބޭނުންވާ ލިޔެކިޔުންތައް ހަމަކުރުމުގައި އާންމުންނަށް ބޮޑެތި ދަތިތަކަކާ ކުރިމަތިވަމުންދާތީ، އާންމުންގެ ޝަކުވާތަކަށް ރިއާޔަތްކުރުމަށްފަހުގައެވެ.

އައު އިއުލާނުގައިވާ ގޮތުން، ޕޯޓަލް މެދުވެރިކޮށް ފޯމު ހުށަހެޅުމުގެ ފުރުސަތު 15 ޖޫން 2026 (ހޯމަ ދުވަހުގެ) ރޭގަނޑު 23:59 އާ ހަމައަށް ހުޅުވާލެވިފައި ހުންނާނެއެވެ.

މުއްދަތު އިތުރުކުރެވުނު ޚާއްޞަ ކެޓަގަރީތަކާއި ސްކީމްތައް

މި ބަދަލާއެކު، ތިރީގައިމިވާ ހުރިހާ ދާއިރާތަކަކުން ފޯމު ހުށަހެޅުމުގެ މުއްދަތު އިތުރުވާނެއެވެ:

• ހިޔާ/ވެށިފަހި މާލެ ލިޔުން ލިބިފައިވާ ފަރާތްތައް: ފްލެޓް ލިބޭނެކަމުގެ ރަސްމީ ލިޔުން އޮވެ، މިހާތަނަށް ފްލެޓް ހަވާލުނުކުރެވި ތިބި އާއިލާތަކަށް ޚާއްޞަ ކެޓަގަރީ.
• ނުކުޅެދުންތެރިކަން ހުންނަ ފަރާތްތައް: ޚާއްޞަ އެހީއަށް ބޭނުންވާ މީހުންނަށް ކަނޑައެޅިފައިވާ ކެޓަގަރީ.
• މާލޭ ރަށްވެހިންގެ ދިރިއުޅުމަށް ދޫކުރާ ބިން: މާލޭގެ ރައްޔިތުންނަށް ދިރިއުޅުމަށް ދޫކުރާ ބަންޑާރަ ގޯތިތައް.
• "ބިންވެރިޔާ" ސްކީމް ކެޓަގަރީ 1: ކުރީގެ ބިންވެރިޔާ ސްކީމްގެ ދަށުން ޖޮއިންޓް އެޕްލިކޭޝަން ހުށަހަޅައިގެން ގޯތި ލިބިފައިވާ ފަރާތްތަކުގެ ތެރެއިން، ވަކިން ގޯއްޗަށް އެދެން ބޭނުންވާ ފަރާތްތައް.
• "ބިންވެރިޔާ" ސްކީމް ކެޓަގަރީ 2: ބިންވެރިޔާ ސްކީމަށް ހުށަހެޅިއިރު ފްލެޓެއް އޮތުމުގެ ސަބަބުން ޝަރުތު ހަމަނުވި، ނަމަވެސް މިހާރު ފްލެޓް ދޫކޮށްލާފައި ގޯއްޗަށް އެދެން ބޭނުންވާ ފަރާތްތައް.
• "ގޯތިގެދޮރު" ޕްރޮގްރާމް: މާލޭގައި ދިރިއުޅޭ ރައްޔިތުންނަށް ދިރިއުޅުމަށް ދޫކުރާ ބަންޑާރަ ގޯތި.

މިދިޔަ ޖެނުއަރީ 18 ގައި ސަރުކާރުން އިފްތިތާޙުކުރި "އާއިލީ ބޯހިޔާވަހިކަން" ޕްރޮގްރާމްގެ ދަށުން ޖުމްލަ 7,900 ފްލެޓާއި 1,250 އަކަފޫޓުގެ 15,000 ގޯތިދޫކުރުމަށް ވަނީ ނިންމާފައެވެ.

މާލޭގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމުގެ ގޮތުން ހިއްކަމުންދާ ރަސްމާލެއިން ޖުމްލަ 25,000 ގޯތި ދޫކުރުމަށް ރައީސް ޑރ. މުހައްމަދު މުއިއްޒު ވަނީ ނިންމަވާފައެވެ. ނަމަވެސް، މި ފުރަތަމަ ބުރުގެ ދަށުން އެ ސަރަހައްދުން ދޫކުރުމަށް ހަމަޖެހިފައިވަނީ 15,000 ގޯއްޗެވެ.

މި ފްލެޓްތަކަށް ކުރިމަތިލުމުގެ ފުރުސަތު އެންމެ ފުރަތަމަ މިދިޔަ އޭޕްރީލް 17 އަށް އަދި ގޯއްޗަށް މާޗު 4 އަށް ހަމަވާގޮތަށް އޮތް ނަމަވެސް، އާންމުންނަށް ލުއިތަކެއް ދިނުމުގެ ގޮތުން މިނިސްޓްރީން ވަނީ ތަރުތީބުން މުއްދަތު އިތުރުކޮށް، އެންމެ ފަހުން ޖޫން މަހުގެ މެދަކާ ހަމައަށް ފުރުސަތު ދަންމާލާފައެވެ.