ޗައިނާގެ ބީވައިޑީ، އަލީބާބާ އަދި ބައިދޫ އަކީ 'ޗައިނާ ސިފައިންނާ ގުޅުންހުރި ކުންފުނިތަކެއް' ކަމަށް އެމެރިކާއިން ކަނޑައަޅައިފި

މުހައްމަދު ރިފާއު2026 ޖޫން 09

ޗައިނާގެ ވިޔަފާރީގެ އެންމެ ބޮޑު ތިން ކުންފުނި ކަމަށްވާ އަލީބާބާ (Alibaba)، ބީވައިޑީ (BYD) އަދި ބައިދޫ (Baidu) އަކީ ޗައިނާގެ އަސްކަރިއްޔާއަށް ވާގިވެރިވާ ކުންފުނިތަކެއް ކަމަށް ބުނެ އެމެރިކާ ސަރުކާރުން އެ ކުންފުނިތައް ބްލެކް ލިސްޓް ކޮއްފިއެވެ.

އެމެރިކާގެ ދިފާއީ ވުޒާރާ،ޕެންޓަގަންއިން އިއްޔެ އާންމުކުރި މި ނިންމުމުގެ ސަބަބުން، ދާދިފަހުން އެމެރިކާގެ ރައީސް ޑޮނަލްޑް ޓްރަމްޕް އާއި ޗައިނާގެ ރައީސް ޝީ ޖިންޕިންގް ބޭއްވެވި ބައްދަލުވުމަށްފަހު ދެ ގައުމުގެ ދެމެދުގައި އުފެދެން ފެށި ހަމަހިމޭންކަމަށް އަނެއްކާވެސް ބޮޑެތި ލޮޅުންތަކެއް އަރާނެ ކަމަށް ބެލެވެއެވެ.

ޗައިނާ އެމްބަސީގެ ހަރުކަށި ރައްދު

ވޮޝިންގްޓަންގައި ހުންނަ ޗައިނާ އެމްބަސީން ވަނީ މި ނިންމުން ވަރަށް ބޮޑަށް ކުށްވެރިކޮށް، މިއީ ވަކި ފަރާތަކަށް ޖެހިފައިވާ އަދި ގައުމީ ސަލާމަތުގެ ނަން ބޭނުންކޮށްގެން އެމެރިކާއިން ހިންގި ބޭއިންސާފު އަމަލެއްގެ ގޮތުގައި ސިފަކޮށްފައެވެ.

"ބޭރު ގައުމުތަކުގައި ވިޔަފާރިކުރާ ޗައިނާގެ ކުންފުނިތަކުން އަބަދުވެސް އަންނަނީ އެ ގައުމުތަކުގެ ގާނޫނުތަކަށް ފުރިހަމައަށް ބޯލަނބަމުން. އެމެރިކާއިން މިފަދަ ނުރަނގަޅު އަމަލުތައް ހުއްޓާލައި، ޗައިނާގެ ކުންފުނިތަކަށް ހަމަހަމަ ވެއްޓެއް ގާއިމުކޮށްދޭންޖެހޭނެ،" ޗައިނާ އެމްބަސީގެ ތަރުޖަމާނު ވިދާޅުވިއެވެ.

މިކަމާ ގުޅޭގޮތުން އަލީބާބާ، ބީވައިޑީ އަދި ބައިދޫ ކުންފުނިން އަދި އެއްވެސް ބަހެއް ބުނެފައެއް ނުވެއެވެ.

ޕެންޓަގަނުން ކޮންމެ އަހަރަކު ނެރޭ "ޗައިނާގެ އަސްކަރީ ކުންފުނިތަކުގެ" ލިސްޓަށް މިއަހަރު ގެނައި ބަދަލާއެކު، ލިސްޓުގައި ހިމެނޭ ކުންފުނިތަކުގެ އަދަދު ވަނީ 2025 ވަނަ އަހަރު އޮތް 134 އިން 188 އަށް މަތިވެފައެވެ. 2021 ވަނަ އަހަރު އުފެއްދި މި ލިސްޓުގައި ހިމެނޭ ކުންފުނިތަކަށް އެމެރިކާގެ ދިފާއީ އެއްވެސް ކޮންޓްރެކްޓެއްގައި ބައިވެރިއެއް ނުވެވޭނެއެވެ.

ޕެންޓަގަނުން ބުނާގޮތުގައި މި ކުންފުނިތަކުން އަންނަނީ ޗައިނާގެ "މިލިޓަރީ ސިވިލް ފިއުޝަން" (އާންމު ޓެކްނޮލޮޖީ އާއި އަސްކަރީ ހޯދުންތައް އެއްކޮށްލުމުގެ ސިޔާސަތު) އަށް ބޮޑެތި އެހީތަކެއް ވަމުންނެވެ.

• ބީވައިޑީ (BYD): ޗައިނާގެ އެންމެ ބޮޑު އިލެކްޓްރިކް ކާރު އުފައްދާ ކުންފުނި.
• އަލީބާބާ (Alibaba): އީ-ކޮމާސްގެ އެންމެ ބޮޑު ސައިޓް.
• ބައިދޫ (Baidu): ޗައިނާގެ އެންމެ ބޮޑު އިންޓަނެޓް ސާޗް އިންޖީނު.
• އެހެން ކުންފުނިތައް: މީގެ އިތުރުން އޭއައި އަދި ރޮބޮޓިކްސް ކުންފުންޏެއް ކަމަށްވާ ރޮބޯސެންސް (RoboSense) އާއި ޔުނިޓްރީ ރޮބޮޓިކްސް (Unitree Robotics) ވެސް ވަނީ މި ލިސްޓަށް އިތުރުކޮށްފައެވެ. މިދިޔަ އަހަރު މި ލިސްޓަށް ވީޗެޓްގެ ވެރި ޓެންސެންޓް (Tencent) ވެސް ވަނީ އިތުރުކޮށްފައެވެ.

މި ސިޔާސަތާ މެދު ގައުމީ ސަލާމަތާ ބެހޭ މާހިރުން ވަނީ ސުވާލު އުފައްދާފައެވެ. ސީއައިއޭ (CIA) އަދި ވައިޓް ހައުސްގައި ކުރިން މަސައްކަތް ކުރެއްވި ޗައިނާގެ މާހިރު ޑެނިސް ވައިލްޑާ ވިދާޅުވީ، އެމެރިކާގެ ގިނަ ކުންފުނިތަކަކުން މިހާރުވެސް ބޮޑެތި މި ކުންފުނިތަކާއެކު ވިޔަފާރީގެ ގުޅުންތައް ބާއްވަމުން އަންނަ ކަމަށެވެ.

އަދި ހަގީގީ ބޮޑެތި އަދަބުތަކެއް ނުދޭނަމަ އެމެރިކާގެ ކުންފުނިތަކުން މި ގުޅުންތައް ކަނޑާނުލާނެ ކަމަށާއި، އެމެރިކާއިން ޗައިނާގެ އިގްތިސާދާ މުޅިން ވަކިނުވާނަމަ، މިފަދަ ފުޅާ ދަތިކުރުމުގެ ފިޔަވަޅުތަކަކީ އެއްވެސް ނަތީޖާއެއް ނުނިކުންނާނެ، ހަމައެކަނި ސިޔާސީ ދެއްކުންތެރިކަމެއް ކަމަށް އޭނާ ވިދާޅުވިއެވެ.