އެމެރިކާ އާއި އިސްރާއީލުން އީރާނާ ދެކޮޅަށް ކުރާ ހަނގުރާމައަށް 100 ދުވަސް

މުހައްމަދު ރިފާއު2026 ޖޫން 07

އެމެރިކާގެ ރައީސް ޑޮނަލްޑް ޓްރަމްޕް "ވަރަށް އަވަހަށް" ނިމޭނެ ކަމަށް ވިދާޅުވި ހަނގުރާމައަށް މިއަދު މިވަނީ 100 ދުވަސް ފުރިފައެވެ. ފާއިތުވި ފެބްރުއަރީ 28 ގައި ފެށި މި ހަނގުރާމައިގައި، އޭޕްރިލް 8 ގައި ހަނގުރާމަ މެދުކަނޑާލިމަށް އެއްބަސްވި ނަމަވެސް، މަޝްވަރާތައް ނާކާމިޔާބުވެ ހުރުމޫޒް ކަނޑުއޮޅި އަދިވެސް އޮތީ ބަންދުވެފައެވެ.

މަރުވި މީހުންނާއި ރެފިއުޖީންގެ އަދަދު ލައްކައަކަށް

މި ހަނގުރާމައިގައި އެންމެ ބޮޑު ގެއްލުމެއް ލިބިފައިވަނީ ހަނގުރާމައިގެ މައިގަނޑު އަމާޒަކަށް ނުވި ނަމަވެސް، ލުބުނާނަށެވެ. މަރުވި މީހުންގެ އަދަދުތައް ހުރީ އަންނަނިވި ގޮތަށެވެ:

• ލުބުނާނުން: މަދުވެގެން 3,593 މީހުން މަރުވެފައިވެއެވެ.
• އީރާނުން: 3,468 މީހުން މަރުވެފައިވެއެވެ.
• އެހެނިހެން ގަލްފު ގައުމުތަކުން: 29 މީހުން މަރުވެފައިވެއެވެ.
• އީރާނުގެ ހަމަލާތަކުން: އިސްރާއީލުގެ 26 މީހުންނާއި އެމެރިކާގެ 13 ސިފައިން މަރުވެފައިވެއެވެ.

އިސްރާއީލުން މިހާރު ވަނީ ލުބުނާނުގެ ފަސްބައިކުޅަ އެއްބައި (ގާތްގަނޑަކަށް 2,000 އަކަކިލޯމީޓަރު) ހިފާފައެވެ. މީގެ އިތުރުން ހަނގުރާމައިގެ ފުރަތަމަ ދެ ހަފުތާގެ ތެރޭގައި އެކަނިވެސް އީރާނުގެ 3 މިލިއަނަށްވުރެ ގިނަ މީހުން ވަނީ ގެދޮރު ދޫކޮށް ދާންޖެހިފައެވެ.

ދުނިޔޭގެ އިގްތިސާދަށް އައި ބޮޑު ލޮޅުން

• ހުރުމޫޒް ކަނޑުއޮޅި ބަންދުވުން: ދުނިޔޭގެ ތެލާއި ގޭހުގެ ފަސްބައިކުޅަ އެއްބައި ދަތުރުކުރާ މި ކަނޑުއޮޅިން ކުރިން ދުވާލަކު 100 އަށްވުރެ ގިނަ އުޅަނދު ދަތުރުކުރެއެވެ. ނަމަވެސް، ހަނގުރާމައާއެކު މި އަދަދު ވަނީ ދުވާލަކު އެވްރެޖްކޮށް 7 އުޅަނދަށް ދަށްވެފައެވެ.
• ތެލުގެ އަގު އުފުލުން: ބްރެންޓް ކުރޫޑް ތެލުގެ އަގު ފީފާއަކަށް 70 ޑޮލަރުގައި ހުރުމަށްފަހު، ހަނގުރާމަ ފެށުނުތާ ހަފުތާއެއްގެ ތެރޭގައި 100 ޑޮލަރަށް އަރައި، އެންމެ މަތިވި ބާޒާރުގައި 120 ޑޮލަރާ ގާތްކުރިއެވެ. މިހާރު އަގު ހުރީ 100 ޑޮލަރުގައެވެ.
• 146 ގައުމެއްގައި ޕެޓްރޯލް އަގުބޮޑުވުން: އެންމެ ބޮޑު އަސަރެއް ކުރީ އޭޝިއާގެ ގައުމުތަކަށެވެ. މިޔަންމާގައި ޕެޓްރޯލް އަގު 90 އިންސައްތަ އުފުލުނުއިރު، ނައިޖީރިއާގައި 50 އިންސައްތަ އަދި ޕެރޫގައި 40 އިންސައްތަ އަގު ވަނީ މަތިވެފައެވެ.

ބައިނަލްއަޤުވާމީ މާލީ އިދާރާތަކުން ހާމަކުރާ ގޮތުގައި، ތެލާއި ގޭހުގެ އަގު ބޮޑުވުމުން ދަނޑުވެރިކަމަށް ބޭނުންވާ ފާޓިލައިޒާގެ އަގު ބޮޑުވެ، ދުނިޔޭގެ ކާބޯތަކެތީގެ އަގުތައް ވެސް ވަނީ މަތިވެފައެވެ. މިއާއެކު ދުނިޔޭގެ ޖީޑީޕީ ދަށްވެ، ބޮޑު އިގްތިސާދީ ކާރިސާއެއްގެ ބިރު ވަނީ ހީވެފައެވެ. ނަމަވެސް، އާޓިފިޝަލް އިންޓެލިޖެންސް ސެކްޓާއަށް އައި ބޫމްގެ ސަބަބުން އެމެރިކާގެ ހިއްސާގެ ބާޒާރު ވަނީ ރެކޯޑް މިންވަރަކަށް ކުރިއަރާފައެވެ.

ނާކާމިޔާބު މަޝްވަރާތަކާއި ޓްރަމްޕްގެ މަގުބޫލުކަން

އޭޕްރިލް 11-12 ގައި ޕާކިސްތާނުގެ އިސްލާމްއާބާދުގައި އެމެރިކާ އާއި އީރާނާ ދެމެދު ކުރެވުނު ސުލްހައިގެ މަޝްވަރާތައް ވަނީ ނިއުކްލިއަރ މައްސަލައިގައި އެއްބަސްވުމަކަށް ނާދެވިގެން ހުއްޓިފައެވެ. އީރާނުން ބުނާ ގޮތުގައި އެމެރިކާގެ ރައީސް ޓްރަމްޕް ސޮއިކުރައްވާ އެއްބަސްވުމަކަށް އަމަލުކުރައްވާނެ ކަމުގެ އެއްވެސް އިތުބާރެއް ނެތެވެ.

މި ހަނގުރާމައިގެ ސަބަބުން އެމެރިކާގެ ރައްޔިތުންގެ މެދުގައި ރައީސް ޓްރަމްޕަށް އޮތް ތާއީދު ވަނީ ވަރަށް ބޮޑަށް ދަށްވެފައެވެ. އެންމެ ފަހުގެ ހިސާބުތަކުން ދައްކާ ގޮތުގައި ޓްރަމްޕްގެ މަގުބޫލުކަން އުޅެނީ 40.3 އިންސައްތައިގައެވެ. އަދި 57 އިންސައްތަ އެމެރިކާ ރައްޔިތުން އޭނާގެ ސިޔާސަތުތަކާ މެދު ހިތްހަމަނުޖެހެއެވެ.