ޖީޕީއީގެ ބޯޑް އޮފް ޑިރެކްޓަރުންގެ ބައްދަލުވުމުގައި ތަޢުލީމީ ވަޒީރު ބައިވެރިވެވަޑައިގެންފި

ޒައުޖަތު އަޙުމަދު2026 ޖޫން 05

ގްލޯބަލް ޕާޓްނަޝިޕް ފޯ އެޑިޔުކޭޝަން (ޖީ.ޕީ.އީ) ގެ ބޯޑް އޮފް ޑިރެކްޓަރުންގެ ބައްދަލުވުމުގައި މިނިސްޓަރ ޑރ. އިސްމާޢީލް ޝަފީޢު ބައިވެރިވެވަޑައިގެންފިއެވެ.

ޖޫން 3 އިން 4 އަށް، ފްރާންސްގެ ޕެރިހުގައި ކުރިއަށްދިޔަ މި ބައްދަލުވުމުގައި ވަޒީރު ޑރ. އިސްމާޢީލް ޝަފީޢު ބައިވެރިވެވަޑައިގެންނެވީ އޭޝިއާ އަދި ޕެސިފިކް ކޮންސްޓިޓުއެންސީގެ މަންދޫބެއްގެ ގޮތުގައެވެ.

ތަޢުލީމާ މަތީ ތަޢުލީމާ ހުނަރުތައް ތަރައްޤީކުރުމާބެހޭ ވުޒާރާއިން ބުނި ގޮތުގައި މި ސެޝަންތަކުގެ ތެރޭގައި، ބައިނަލްއަޤްވާމީ މާޙައުލުގެ ސަބަބުން ތަޢުލީމީ ދާއިރާއަށް ކުރާ މާލީ އަސަރުތަކާ ބެހޭގޮތުންނާއި، ފައިނޭންސް އެންޑް ރިސްކް ކޮމިޓީން ހުށަހަޅާފައިވާ މުހިންމު ނިންމުންތަކާ ގުޅޭގޮތުން ވަޒީރު ވަނީ އިސްތިރާޖީ މަޝްވަރާތައް ކުރައްވާފައެވެ.

މީގެއިތުރުން ގްލޯބަލް ޕާޓްނަޝިޕް ފޯ އެޑިޔުކޭޝަން (ޖީ.ޕީ.އީ) ފައުންޑޭޝަން އިފްތިތާޙުކުރުމުގެ ރަސްމިއްޔާތުގައި މިނިސްޓަރ ޑރ. އިސްމާޢީލް ޝަފީޢު އާއި ސްޓޭޓް މިނިސްޓަރ ޑރ. އަޙްމަދު މުޙައްމަދު ބައިވެރިވެވަޑައިގެންފައިވެއެވެ. މި އިފްތިތާޙީ ރަސްމިއްޔާތު ބޭއްވުނީ 2026 ޖޫން 2 ގައި ފްރާންސްގެ ޕެރިހުގައެވެ. މި ރަސްމިއްޔާތު ކުރިއަށް ދިޔައީ ޖީ.ޕީ.އީ ގެ ބޯޑް ބައްދަލުވުމުގެ ހަވާސާގައެވެ.

ޖީ.ޕީ.އީ ފައުންޑޭޝަނަކީ އަމިއްލަ ފަރާތްތަކާއި ހިލޭސާބަހަށް މަސައްކަތްކުރާ ޖަމްޢިއްޔާތައް ގުޅިގެން އައު އަދި އީޖާދީ ގޮތްގޮތަށް ބައިވެރިވުންތައް އިތުރުކޮށް، އާމްދަނީ ދަށް ޤައުމުތަކުގެ ތަޢުލީމީ ނިޒާމު ބަދަލުކުރުމަށް ޖީ.ޕީ.އީ އިން ކުރަމުންދާ މަސައްކަތްތަކަށް އެހީތެރިވެދޭ ފައުންޑޭޝަނެކެވެ.