"ޑީލް ނުހަދައިފިނަމަ އީރާންއެއް ނޯންނާނެ" – އީރާނަށް ޓްރަމްޕް ވަރުގަދަ އިންޒާރެއް!

މުހައްމަދު ރިފާއު2026 މޭ 18

އެމެރިކާގެ ރައީސް ޑޮނަލްޑް ޓްރަމްޕް އެގައުމުގެ ގައުމީ ސަލާމަތާ ބެހޭ އިސް ޓީމާ ބައްދަލުކުރެއްވުމަށްފަހު، އީރާނާ ދެކޮޅަށް ކުރަމުންދާ ހަނގުރާމައިގައި ވަރަށް ހަރުކަށި އަދި ވަރުގަދަ އިންޒާރެއް އީރާނަށް ދެއްވައިފިއެވެ.

އާދިއްތަ ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އީރާނަށް އޮތް ވަގުތު ކުޑަތަންވަމުންދާ ކަމަށާއި، އެގައުމުން "ވަރަށް އަވަހަށް" ފިޔަވަޅުތަކެއް އަޅަންޖެހޭނެ ކަމަށެވެ. އަދި އަވަސް ނުކޮށްފިނަމަ "އީރާނުން ސަލާމަތްވާނެ އެއްވެސް އެއްޗެއް ބާކީ ނޯންނާނެ" ކަމަށް ވިދާޅުވެ ޓްރަމްޕް ވަނީ ބިރުދައްކަވާފައެވެ.

މި އިންޒާރު ޓްރަމްޕް ދެއްވީ ހޮނިހިރު ދުވަހު ވާޖިނިއާގައި ހުންނަ އޭނާގެ ގޮލްފް ކްލަބުގައި ގައުމީ ސަލާމަތާ ބެހޭ ޓީމާއެކު ބޭއްވި ކުއްލި ބައްދަލުވުމަކަށްފަހުއެވެ. މި ބައްދަލުވުމުގައި ނައިބު ރައީސް ޖޭޑީ ވެންސް، ސެކްރެޓަރީ އޮފް ސްޓޭޓް މާކޯ ރޫބިއޯ، ސީއައިއޭގެ ޑިރެކްޓަރު ޖޯން ރެޓްކްލިފް އަދި ޚާއްސަ މަންދޫބު စީވް ވިޓްކޮފް ބައިވެރިވެވަޑައިގަތެވެ.

މި ބައްދަލުވުން ބާއްވާފައިވަނީ އީރާނާ ގާތް ގުޅުމެއް ބާއްވާ ޗައިނާއަށް ޓްރަމްޕް ކުރެއްވި މުހިންމު ދަތުރުފުޅަށްފަހު، ވޮޝިންގްޓަނަށް އެނބުރި ވަޑައިގަތްތާ މަދު ގަޑިއިރުތަކެއްގެ ތެރޭގައެވެ. އެމެރިކާގެ އިސް އޮފިޝަލުން ބުނާގޮތުގައި، ޓްރަމްޕާއި ޗައިނާގެ ރައީސް ޝީ ޖިންޕިންއާ ދެމެދު ދެކެވުނު ވާހަކަތަކަށް ބެލުމަށްފަހު ނޫނީ އީރާނާ މެދު ފިޔަވަޅެއް ނޭޅުމަށް ކުރިން އޮތީ ނިންމާފައެވެ.

ޚަބަރުތައް ބުނާގޮތުން، ޑިޕްލޮމެޓިކް މަޝްވަރާތައް އީރާނުން ކުރިއަށްގެންދާ ގޮތާ މެދު ޓްރަމްޕް ހުންނެވީ ވަރަށް ބޮޑަށް ކެތްތެރިކަން ކޮޅުންލާފައެވެ. ޚާއްސަކޮށް ހޮރްމޫޒް ކަނޑުއޮޅި ބަންދުކޮށްފައި އޮތުމުގެ ސަބަބުން ދުނިޔޭގެ ބާޒާރުގައި ތެލުގެ އަގު އުފުލެމުންދާތީ އެމެރިކާއިން ކަންބޮވުން ފާޅުކުރެއެވެ.

މަޝްވަރާގެ މޭޒަށް އީރާނު ގެނައުމަށްޓަކައި، އަލުން ބޮޑެތި އަސްކަރީ ހަމަލާތަކެއް ދޭން ފެށުމަށް ޓްރަމްޕް މިހާރު ދަނީ ސީރިއަސްކޮށް ވިސްނަމުންނެވެ. ޕެންޓަގަނުން މިހާރު ވަނީ އީރާނުގެ ހަކަތައާއި އިންފްރާސްޓްރަކްޗާ ސައިޓުތަކަށް އަމާޒުކޮށް ހަމަލާދޭނެ އަސްކަރީ ޕްލޭންތަކެއް ތައްޔާރުކޮށްފައެވެ. މީގެއިތުރުން، އާދިއްތަ ދުވަހު ޓްރަމްޕް ވަނީ އިސްރާއީލްގެ ބޮޑުވަޒީރު ބެންޖަމިން ނަތަންޔާހޫއާ ވެސް ފޯނުން ގުޅުއްވައި ވާހަކަދައްކަވާފައެވެ.

އެމެރިކާގެ ޕްރެޝަރުތަކަށް ދޫދޭނެ އެއްވެސް ނިޝާނެއް އީރާނުގެ ފަރާތުން ފެންނާކަށް ނެތް ކަމަށް މީޑިއާތަކުން ރިޕޯޓްކުރެއެވެ. އާދިއްތަ ދުވަހު އީރާނުގެ ރައީސް މަސްއޫދު ޒެޝްކިއަން ވަނީ، އެމެރިކާ-އީރާނު ސުލްހައިގެ ވާހަކަތަކުގައި މެދުވެރިއެއްގެ ބައިގާ ހަރަކާތްތެރިވާ ޕާކިސްތާނުގެ ދާޚިލީ ވަޒީރު މުހުސިން ނަގްވީއާ ބައްދަލުކުރައްވާފައެވެ.

މި ބައްދަލުވުމުގައި އީރާނުން ބުނެފައިވަނީ މެދުއިރުމަތީގައި އެމެރިކާގެ ސިފައިން ތިބުމަކީ ސަރަހައްދުގެ ހަމަޖެހުން ގެއްލޭ ކަމެއް ކަމަށެވެ. ރައީސް ޒެޝްކިއަން ވިދާޅުވީ، އެމެރިކާއާއި އިސްރާއީލުން އަބަދުވެސް މަސައްކަތް ކުރަނީ އިސްލާމީ ގައުމުތަކުގެ މެދުގައި ބައިބައިވުން އުފައްދައި ނުތަނަވަސްކަން އުފެއްދުމަށް ކަމަށާއި، ނަމަވެސް އީރާނުން އަވަށްޓެރި އިސްލާމީ ގައުމުތަކާއެކު ބާއްވަން ބޭނުންވަނީ އިތުބާރު ހުރި ސާބިތު ގުޅުމެއް ކަމަށެވެ.