"ހިޔަނިތަކުގެ ތެރޭގައި" ފިލާ ނުތިބެ، އިންތިޚާބަށް ނިކުމޭ: ޕެރޭޒް

މުހައްމަދު ރިފާއު2026 މޭ 13

ތައްޓެއް ނުލިބި ނިމުނު ސީޒަނަށްފަހު، ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒް ކުއްލި ނޫސްވެރިންގެ ބައްދަލުވުމެއް ބާއްވައި، ކްލަބްގެ ރިޔާސީ އިންތިޚާބު ބާއްވަން ނިންމަވައިފިއެވެ. 90 މިނެޓަށް ދެމިގެންދިޔަ މި ބައްދަލުވުމުގައި 79 އަހަރުގެ ޕެރޭޒް ވަނީ އޭނާއާ ދެކޮޅަށް މަސައްކަތްކުރާ ފަރާތްތަކަށާއި މީޑިއާއަށް ވަރަށް ބޮޑަށް ފާޑުވިދާޅުވެފައެވެ.

ޕެރޭޒް ވިދާޅުވީ އޭނާ ބަލިވެ، ވަރުބަލިވެފައިވާ ކަމަށް ބުނެ ސްޕެއިންގެ ބައެއް ނޫސްތަކުން ފަތުރަނީ ދޮގު ޚަބަރުތަކެއް ކަމަށެވެ. "އަހަރެން މިހުރީ ބަލިވެ އެނދުމަތިވެފައެއް ނޫން. އަހަރެން މަސައްކަތް ކުރަނީ ވަރަށް ބުރަކޮށް. އެންމެ ކުރިން ހޭލައި، އެންމެ ފަހުން ނިދަނީ އަހަރެން،" ޕެރޭޒް ވިދާޅުވިއެވެ.

އޭނާގެ ލީޑަޝިޕާ ދެކޮޅަށް "ރޭވިގެން ހިންގާ ކެމްޕޭނެއް" އޮތްކަން ފާހަގަކުރައްވައި، ޕެރޭޒް ވަނީ އޭނާއާ ވާދަކުރަން ބޭނުންވާ ފަރާތްތަކުން "ހިޔަނިތަކުގެ ތެރޭގައި" ފިލާ ނުތިބެ، އިންތިޚާބަށް ނިކުތުމަށް ގޮވާލައްވާފައެވެ.

ނޫސްވެރިންގެ ބައްދަލުވުމުގައި ޕެރޭޒް ވަނީ ލަލީގާ އަކީ "ދުޝްމަނެއް"ގެ ގޮތުގައި ސިފަކުރައްވައި، ލީގުގެ ތެރޭގައި ކޮރަޕްޝަން އޮތް ކަމަށް ތުހުމަތުކުރައްވާފައެވެ. މީގެ އިތުރުން، ބައެއް ނޫސްތަކުން ލިޔެފައިވާ ލިޔުންތައް ފޯނުން ކިޔައިދެއްވައި، އެ ނޫސްވެރިންނާ ސީދާ ސުވާލުކުރައްވައި ބަހުގެ ހަމަލާތައް ބަދަލުކުރެއްވިއެވެ.

ކްލަބްގެ މިހާރުގެ ހާލަތު:

• ތަށި ނެތް ސީޒަނެއް: ބާސެލޯނާއިން ޖެހިޖެހިގެން ދެވަނަ ފަހަރަށް ލަލީގާ ކާމިޔާބުކުރިއިރު، ރެއާލްއަށް މި ސީޒަނުގައި އެއްވެސް ބޮޑު ތައްޓެއް ނުލިބެއެވެ.
• ކޯޗުގެ މައްސަލަ: ޖެނުއަރީ މަހު ޒަބީ އެލޮންސޯ ވަކިކުރުމަށްފަހު އައްޔަންކުރި އާބެލޯއާގެ ބަދަލުގައި، ކުރިއަށް އޮތް އިންތިޚާބަށްފަހު ހޯސޭ މޮރީނިއޯ ގެންނާނެ ކަމުގެ އިޝާރާތެއް ވަނީ ލިބިފައެވެ.
• ކުޅުންތެރިންގެ މެދުގައި މައްސަލަ: ފެޑެރިކޯ ވަލްވާޑޭ އާއި ޗުއަމެނީގެ މެދުގައި ހިނގި ހަމަނުޖެހުމާއި، ކީލިއަން އެމްބާޕޭއާ ދެކޮޅަށް ސަޕޯޓަރުން ހިންގާ ކެމްޕޭންތަކުގެ ސަބަބުން ޓީމުގެ އެތެރޭގެ މަސްލަހަތު ވަނީ ގެއްލިފައެވެ.

ޕެރޭޒްގެ ވާހަކަތަކާ ގުޅިގެން ވާދަވެރި ބާސެލޯނާއިން ވަނީ ބަޔާނެއް ނެރެފައެވެ. އެ ކްލަބުން ބުނީ ޕެރޭޒް ކުރެއްވި ތުހުމަތުތައް އެ ކްލަބްގެ ގާނޫނީ ޓީމުން ދިރާސާކުރަމުންދާ ކަމަށާއި، ކުރިއަށް އޮތްތަނުގައި އަޅާނެ ފިޔަވަޅުތައް ނިންމާނެ ކަމަށެވެ.

2009 ވަނަ އަހަރުން ފެށިގެން ރެއާލްގެ ރައީސްކަން ކުރައްވާ ޕެރޭޒް ވިދާޅުވީ، ކްލަބްގެ 100،000 މެންބަރުންގެ ފުރިހަމަ ތާއީދު އޭނާއަށް އެބައޮތް ކަމަށާއި، އޭނާއަކީ ރެއާލްގެ ތާރީޚުގައިވެސް އެންމެ ކާމިޔާބު ރައީސް ކަމަށެވެ. އޭނާގެ ދައުރުގައި މިހާތަނަށް ރެއާލްއިން ވަނީ 37 ތަށި ކާމިޔާބުކޮށްފައެވެ.