މޮރީނިއޯ އަލުން ރެއާލް މެޑްރިޑަށް އަންނަނީ

މުހައްމަދު ރިފާއު2026 މޭ 13

ދުނިޔޭގެ އެންމެ ކާމިޔާބު އެއް ކޯޗު، ހޯސޭ މޮރީނިއޯ އަލުން ރެއާލް މެޑްރިޑްގެ ހެޑް ކޯޗުކަމާ ހަވާލުވުމުގެ ފަހުގެ މަޝްވަރާތައް ފަށާފައިވާކަމަށް ރިޕޯޓްތަށް ބުނެފިއެވެ. މިއީ މީގެ 13 އަހަރު ކުރިން އޭނާ އެ ކްލަބް ދޫކޮށްލި ފަހުން އެނބުރި އަންނަ ފުރަތަމަ ފަހަރެވެ.

އުމުރުން 63 އަހަރުގެ މޮރީނިއޯ އަކީ މިވަގުތު ރެއާލްގެ ރައީސް ފްލޮރެންޓީނޯ ޕެރޭޒް ބޭނުންވާ ހަމައެކަނި ކެންޑިޑޭޓެވެ. އޭނާ މަގާމާ ހަވާލުވާނީ، ޒަބީ އެލޮންސޯ ވަކިވުމުން މިދިޔަ ޖެނުއަރީ މަހު ޓީމާ ހަވާލުވި އަލްވާރޯ އާބެލޯއާގެ ބަދަލުގައެވެ.

މިހާރު ބެންފީކާގެ ކޯޗަކަށް ހުރި މޮރީނިއޯގެ ކޮންޓްރެކްޓްގައިވާ ގޮތުން، ސީޒަންގެ ފަހު މެޗަށްފަހު 10 ދުވަހުގެ ތެރޭގައި 3 މިލިއަން ޔޫރޯ (2.6 މިލިއަން ފައުންޑް) ދެއްކުމަށްފަހު އޭނާއަށް ކްލަބް ދޫކޮށްލެވޭނެއެވެ. މިއީ ރެއާލް ފަދަ ކްލަބަކަށް ވަރަށް ކުޑަ އަދަދެކެވެ.

ބެންފީކާގެ ސީޒަންގެ ފަހު މެޗު އަންނަ ހޮނިހިރު ދުވަހު އެސްޓޮރީލްއާ ދެކޮޅަށް ކުޅުމަށްފަހު، އަންނަ ހޯމަ ދުވަހު މޮރީނިއޯ އޭނާގެ މުސްތަގުބަލާ ބެހޭގޮތުން ރަސްމީ ބަހެއް ބުނާނެ ކަމަށް ބެލެވެއެވެ.

ރެއާލްއިން މޮރީނިއޯ ބޭނުންވަނީ ކީއްވެ؟

މި ނިންމުމުގެ ފަހަތުގައިވަނީ ހަމައެކަނި ކުޅިވަރުގެ ނަތީޖާއެއް ނޫނެވެ. ރެއާލްގެ ޑްރެސިން ރޫމްގައި މިހާރު އުފެދިފައިވާ ނުތަނަވަސްކަން ހައްލުކުރުމަށް މޮރީނިއޯ ފަދަ ވަރުގަދަ ލީޑަރެއް ބޭނުންވާ ކަމަށް ޕެރޭޒް ގަބޫލުކުރައްވައެވެ.

• ޑްރެސިން ރޫމްގެ މައްސަލަތައް: މި މަހު ޗުއަމެނީ އާއި ވަލްވާޑޭގެ މެދުގައި ހިނގި ހަމަނުޖެހުމާ ގުޅިގެން ކްލަބުން ވަނީ އެ ދެ ކުޅުންތެރިން 1 މިލިއަން ޔޫރޯއިން ޖޫރިމަނާކޮށްފައެވެ.
• އެމްބާޕޭގެ މައްސަލަ: އަނިޔާގައި ހުރި ވަގުތު ކީލިއަން އެމްބާޕޭ ސާޑީނިއާއަށް ދަތުރުކުރުމުން ސަޕޯޓަރުންގެ ބޮޑު ނުރުހުމެއް އޭނާއަށް ވަނީ އަމާޒުވެފައެވެ. އޭނާ ޓީމުން ބޭރުކުރުމަށް އެދި 73 މިލިއަނަށް ވުރެ ގިނަ މީހުން ވަނީ ޕެޓިޝަނެއްގައި ސޮއިކޮށްފައެވެ.

މޮރީނިއޯ ވަނީ 2010 އިން 2013 އަށް ރެއާލްގައި ހޭދަކުރި ދުވަސްވަރު ލަލީގާ، ކޮޕަ ޑެލް ރޭ އަދި ސްޕެނިޝް ސުޕަ ކަޕް ކާމިޔާބުކޮށްދީފައެވެ. އޭގެ ފަހުން އޭނާ ވަނީ ޗެލްސީ، މެންޗެސްޓާ ޔުނައިޓެޑް، ޓޮޓެންހަމް، ރޯމާ އަދި ފެނަބާޗޭ ފަދަ ކްލަބްތަކަށް ކޯޗުކޮށްދީ ގިނަ ކާމިޔާބީތަކެއް ހޯދާފައެވެ.

މި ސީޒަނަކީ ރެއާލްއަށް ވަރަށް ހިތްދަތި ސީޒަނެކެވެ. އެއްވެސް ތައްޓެއް ނުލިބި ސީޒަން ނިންމާލަން ޖެހުނުއިރު، ލަލީގާގެ ތަށި ވާދަވެރި ބާސެލޯނާއިން ކާމިޔާބުކުރީ 14 ޕޮއިންޓުގެ ބޮޑު ތަފާތަކުންނެވެ. އެހެންކަމުން، މޮރީނިއޯގެ އަމާޒަކަށް ވާނީ އަންނަ ސީޒަނުގައި އަލުން ރެއާލްއަކީ ދުނިޔޭގެ އެންމެ ވަރުގަދަ ބާރުގެ ގޮތުގައި ބިނާކުރުމެވެ.