ޚާމަނާއީ އަވަހާރަކޮށްލާފައިވާކަން އީރާނުން އިއުލާނުކޮށްފި

މުހައްމަދު ރިފާއު2026 މާރިޗު 01

އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ އިޒްރޭލާއި އެމެރިކާގެ ހަމަލާތަކުގައި އަަވަހާރަކޮށްލާފައިވާ ކަމަށް ބުނާ ވާހަކަ ދޮގުކުރަމުން ދިއުމަށް ފަހު އީރާނުން އެންމެ ފަހުން އެކަމަށް އެއްބަސްވެ ރަސްމީކޮށް އިއުލާނުކޮށްފި އެވެ. 

އިރާނުގެ މީޑިއާތަކުން ބުނާ ގޮތުގައި ޚާމަނާއީގެ އިތުރުން އޭނާގެ ދަރިކަނބަލުންނާއި، ދަނބިދަރިފުޅާއި، ކާފަ ދަރިފުޅުވެސް ވަނީ މި ހަމަލާތަކުގައި މަރުވެފައެވެ.

ހޮނިހިރު ދުވަހު އިޒްރޭލުން ދިން މިސައިލް ހަމަލާތަކަށް ފަހު، އިރާނުގައި "ބޮޑު އަސްކަރީ އޮޕަރޭޝަނެއް" ފަށާފައިވާކަން އިއުލާން ކުރެއްވި އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އޭނާގެ މަގުސަދުތައް ހާސިލްވަންދެން މުޅި ހަފުތާގެ ތެރޭގައި ނުވަތަ ބޭނުންވާ މުއްދަތަކަށް މެދުނުކެނޑި ބޮން އެޅުން ކުރިއަށްދާނެ ކަމަށެވެ.

އިރާނުގެ ދެކުނުގެ ސްކޫލަކަށް ދިން ހަމަލާއެއްގައި މަދުވެގެން 108 މީހުން މަރުވެފައިވާ ކަމަށާއި، މުޅި އިރާނުގެ 24 ޕްރޮވިންސަކުން ޖުމުލަ 201 މީހުން މިހާތަނަށް މަރުވެފައިވާ ކަމަށް އިރާނުގެ މީޑިއާތަކުން ރިޕޯޓުކުރެއެވެ.

އުމުރުން 86 އަހަރުގެ ޚާމަނާއީ އަވަހާރަޮށްލާފައިވާ ކަމަށް އެމެރިކާ އާއި އިޒްރޭލުން އިއުލާނުކުރި ނަމަވެސް އީރާނުން ބުނަމުން ދިޔައީ އެއީ ދޮގެއް ކަމަށެވެ. 

އެކަމަކު މިއަދު ހެނދުނު އީރާންގެ ގައުމީ ޓީވީން ވަނީ ޚާމަނާއީ އަވަހާރަވެފައިވާ ކަމަށާއި އެކަމުގެ ބަދަލު ހިތިކޮށް ހިފާނެ ކަމުގެ އިންޒާރު ދީފަ އެވެ. 

ޚާމަނާއީގެ އިތުރުން އީރާންގެ ޖުޑީޝަރީން ވަނީ އީރާންގެ އިންގިލާބީ ލަޝްކަރުގެ ވެރިޔާ ޖެނެރަލް މުހައްމަދު ޕަކްޕޫރް  އާއި އިސް މުޝީރު އަލީ ޝަމްޚާއީ ވެސް އަވަރާވެފައިވާ ކަމަށް ބުނެފަ އެވެ. 

އީރާންގެ ގައުމީ ޓީވީން ބުނި ގޮތުގައި އީރާން ހިންގުން މިހާރު ވަނީ ރައީސް މަހްމޫދު ޕެޚެޝްކިއަން އާއި އިތުރު ދެ އޮފިޝަލަކު ހިމެނޭ ވަގުތީ ކޮމިޓީއަކާ ހަވާލުކޮށްފަ އެވެ.