އިންތިޚާބަކާ ނުލައި އިތުރު ކައުންސިލެއްގެ ރައީސްކަން ޕީއެންސީއަށް ލިބިއްޖެ!

އިންތިޚާބަކާ ނުލައި އިތުރު ކައުންސިލެއްގެ ރައީސްކަން ސަރުކާރު ހިންގާ ކޮންގްރެސް ޕާޓީ ނުވަތަ ޕީއެންސީއަށް ލިބިއްޖެއެވެ.

އިންތިޚާބަކާ ނުލައި މި ފަހަރު ލިބިފައި ވަނީ މާލެ އަތޮޅު ގުރައިދޫ ކައުންސިލްގެ ރައީސްގެ ގޮނޑިއެވެ.

މި ގޮނޑި ޕީއެންސީއަށް ލިބުނީ ގުރައިދޫ ކައުންސިލްގެ ރައީސްގެ މަގާމަށް އަމިއްލަ ގޮތުން ވާދަކުރި ކެންޑިޑޭޓްގެ ކެންޑިޑެންސީއާމެދު ސުޕްރީމް ކޯޓުން ނިންމި ނިންމުމަކާއި ގުޅިގެންނެވެ.

މި މައްސަލައަކީ ގުރައިދޫ ކައުންސިލްގެ ރައީސްކަމަށް ވާދަ ކުރަން ހުށަހެޅި އަމިއްލަ ކެންޑިޑޭޓް ޢަބްދުލްމަޖީދުގެ ކެންޑިޑެންސީ ބަލައި ނުގަތުމަށް އިލެކްޝަންސް ކޮމިޝަނުން ނިންމުމުން އޭނާ ސުޕްރީމް ކޯޓަށް ހުށަހެޅި މައްސަލައެކެވެ. އޭނާގެ ކެންޑިޑެންސީ ބަލައި ނުގަތުމަށް ނިންމީ ހުށަހަޅަންޖެހޭ ބައެއް މަޢުލޫމާތު ފުރިހަމަ ނުވާތީ ކަމަށް އިލެކްޝަނުން ވަނީ ބުނެފައެވެ.

މި މައްސަލާގައި ސުޕްރީމް ކޯޓުން ބުނީ އެ ކޯޓަށް އިހްތިސާސް ލިބެނީ އިލެކްޝަންސް ކޮމިޝަނުން ކެންޑިޑޭޓެއްގެ ޝަރުޠަކާއިމެދު ނިންމާ ނިންމުމަކާއި ގުޅޭ ގޮތުން ކަމަށެވެ.

ސުޕްރީމް ކޯޓުގެ މި ނިންމުމާއިއެކު އިލެކްޝަނުން ވަނީ ކ. ގުރައިދޫ ކައުންސިލްގެ ރައީސް ކަމަށް އެރަށު އޯޝަންމީޑް އިބުރާހީމް ޝަލީޒް އެކަނި ކުރިމަތިލާފައިވާ ކަމަށް ނިންމައި އެ މަގާމަށް އޭނާ އިންތިޚާބުވެފައިވާ ކަމަށް ކަނޑައަޅައިފައެވެ. އިބުރާހީމް ޝަލީޒް މި އިންތިޚާބުގައި ވާދަކުރަނީ ޕީއެންސީ ޓިކެޓުގައެވެ.

މި ގޮނޑި ލިބުމާއިއެކު އަންނަ އޭޕްރީލް މަހުގެ 4 ގައި ބާއްވަން ތައްޔާރުވަމުން އަންނަ ލޯކަލް ކައުންސިލް އަދި ޑަބުލިއުޑީސީގެ އިންތިޚާބުގައި ވޯޓު ކުރިން މިހާތަނަށް މަދުވެގެން 70 ގޮނޑި ޕީއެންސީއަށް ކަށަވަރުވެފައިވާ ކަން ފާހަގަ ކުރެވެއެވެ.