ކަރަންޓުގެ ޚިދުމަތް ރަނގަޅު ކުރުމަށް 12 ރަށަކަށް ޖަނަރޭޓަރު ފޮނުވަންފަށައިފި

ކުރިއަށް އޮތް ޕީކް ސީޒަނަށް ތައްޔާރުވުމަށް 12 ރަށަކަށް ބޭނުންވާ ޖެން ސެޓް ފޮނުވުމުގެ މަސައްކަތް ސްޓޭޓް އިލެކްޓްރިކް ކޮމްޕެނީ ލިމިޓެޑް، ސްޓެލްކޯއިން ފަށައިފިއެވެ.

ސްޓެލްކޯއިން ބުނީ ކުރިއަށް އޮތް ޕީކް ސީޒަނަށް ތައްޔާރުވުމަށާއި، ދެމެހެއްޓެނިވި ގޮތެއްގައި ފެންވަރު ރަނގަޅު ޚިދުމަތެއް ފޯރުކޮށްދިނުމަށްޓަކައި މަސައްކަތްތަކެއް ކުރަމުންދާކަމަށާއި އެގޮތުން ރަށްރަށުގެ ކަރަންޓު އުފެއްދުމުގެ ޤާބިލުކަން އިތުރުކުރުމަށް އަލަށް ގެނައި ޖަނަރޭޓަރު ސެޓުތައް ފޮނުވުމުގެ މަސައްކަތް މިހާރު ފަށާފައިވާކަމަށެވެ.

މި މަސައްކަތުގެ ދަށުން 12 ރަށަކަށް ބޭނުންވާ 12 ޖެންސެޓު ފޮނުވުމަށް ވަނީ ނިންްމާފައެވެ. މީގެތެރޭގައި ހިމެނެނީ 600ކިލޯވޮޓް، 800ކިލޯވޮޓް، އަދި 1000ކިލޯވޮޓް، ގެ ޖެން ސެޓްތައް ކަަމަށެވެ.

މި ޖެންސެޓްތައް މިރަށްރަށަށް ގެންގޮސް ރޯދައިގެ ކުރިން އިންސްޓޯލްކޮށް ނިމޭނެކަމަށާއި މި މަސައްކަތުގެ ސަބަބުން އެ ކުންފުނިން ރަށްރަށުގައި ފޯރުކޮށްދޭ ކަރަންޓުގެ ޚިދުމަތުގެ އިތުބާރު ބޮޑުވެ، ރައްޔިތުންނަށް ލިބޭ ޚިދުމަތުގެ ފެންވަރު އިތުރަށް ރަނގަޅުވެގެންދާނެކަމަށް ސްޓެލްކޯއިން ބުންޏެވެ.

ސްޓެލްކޯއިން ވަނީ ކުރިއަށް އޮތް ޕީކް ސީޒަނަށް ތައްޔާރުވުމަށް ވިލިމާލޭ އިންޖީނުގެއަށް 1200 ކިލޯވޮޓްގެ ޖަނަރޭޓަރު ސެޓް ކޮމިޝަންކޮށް މިހާރު ދަނީ ބޭނުން ކުރަމުންކަން ފާހަގަ ކުރެވެއެވެ.