މޫސާ ޖަލީލުގެ ކެމްޕޭނު ޖަގަހަ ހުޅުވުން އާދީއްތަ ދުވަހުގެ ރޭ ބާއްވަނީ

ކޮންގްރެސް ޕާޓީ، ޕީއެންސީގެ ޓިކެޓުގައި މާލޭ ސިޓީގެ މޭޔަރު ކަމަށް ވާދަކުރައްވާ މޭޖަރ ޖެނެރަލް ރިޓަޔާޑް މޫސާ ޢަލީ ޖަލީލުގެ ކެމްޕޭނު ޖަގަހަ ހުޅުވުން އާދީއްތަ ދުވަހުގެ ރޭ ބާއްވާނެ ކަމަށް ކޮންގްރެސް ޕާޓީން ބުނެފިއެވެ.

ކައުންސިލް އިންތިޚާބުގެ ޕީއެންސީގެ ކެމްޕޭނު ލީޑަރު އަދި އެ ޕާޓީގެ ޕީޖީ ލީޑަރު އިބުރާހީމް ފަލާޙް މިއަދު ކުރެއްވި ޕޯސްޓެއްގައި ވިދާޅުވީ މޭޖަރ ޖެނެރަލް ރިޓަޔާޑް މޫސާ ޢަލީ ޖަލީލުގެ ކެމްޕޭނު ޖަގަހަ ހުޅުވުން އާދީއްތަ ދުވަހުގެ ރޭ ބާއްވާނެ ކަމަށެވެ.

މޫސާ ޖަލީލުގެ ކެމްޕޭނު ޖަގަހަ ހަދާފައި ވަނީ ޕީއެންސީގެ އޮފީސް ކުރިން ހިންގި ދޮންމަނިކު ސްކައިވިއު ރެސްޓޯރެންޓްގެ ތިރީ ބައިގައެވެ.

މި ޖަގަހަ ހުޅުވަން ހަމަޖެހިފައި ވަނީ ޖަނަވަރީ 18 ވާ އާދީއްތަ ދުވަހުގެ ރޭ 8:30 ގައެވެ.

މި ޙަރަކާތަށް ވަޑައިގެންދެއްވުމަށް ފަލާޙް ވަނީ މޫސާ ޖަލީލުގެ ހުރިހާ ސަޕޯޓަރުންނަށް ދަޢުވަތު ދެއްވައިފައެވެ.

ލޯކަލް ކައުންސިލްތަކުގެ އަދި ޑަބުލިއުޑީސީތަކުގެ އިންތިޚާބު ބާއްވަން ހަމަޖެހިފައި ވަނީ އަންނަ އޭޕްރީލް މަހުގެ 4 ގައެވެ.

މޫސާ ޢަލީ ޖަލީލުގެ އިތުރުން މާލޭގެ މޭޔަރު ކަމަށް ވާދަކުރައްވާ ބޭފުޅުންގެ ތެރޭގައި އެމްޑީޕީގެ ޓިކެޓުގައި މިހާޜުގެ މޭޔަރު އާދަމް އާޒިމް އަދި ރައީސް ޔާމީނު އުފެއްދެވި ޕާޓީ ޕީއެންއެފުގެ ޓިކެޓުގައި ވާދަ ކުރައްވާ އިސްމާޢީލު ޒަރިޔަންދު ފާހަގަ ކުރެވެއެވެ.