ޤަވާޢިދާ ޚިލާފަށް ހިންގަމުންދިޔަ 37 ވިޔަފާރިއެއް ބަންދުކޮށްފި

ޤަވާޢިދާ ޚިލާފަށް ހިންގަމުންދިޔަ 37 ވިޔަފާރިއެއް ބަންދުކޮށްފިއެވެ.

ވިޔަފާރިއާއި އިޤްތިޞާދީ ތަރައްޤީއާބެހޭ ވުޒާރާއިން އާންމުކޮށްފައިވާ ތަފާސްހިސާބުތަކަށް ބަލާއިރު ފާއިތުވި ނޮވެމްބަރު މަހުގެ 29 ން ފެށިގެން ޑިސެމްބަރު މަހުގެ 15 އާއި ހަމައަށް 37 ވިޔަފާރިއެއް ބަންދުކޮށްފައިވެއެވެ.

އެ ވުޒާރާއިން ހާމަކުރި ގޮތުގައި ޤަވާޢިދާއި ޚިލާފަށް ހިންގަމުންދާ ވިޔަފާރިތައް ރިޕޯޓް ކުރުމަށް ހުޅުވާލި ފުރުޞަތުގައި މިހާތަނަށް 252 ޝަކުވާ ލިބިފައިވެއެވެ. އަދި އޭގެތެރެއިން 98 ވިޔަފާރިއެއް ބަލާފާސްކޮށްފައިވެއެވެ.

މީގެތެރެއިން 25 ވިޔަފާރިއެއް ބަންދު ކުރީ ވިޔަފާރިއާބެހޭ ޤާނޫނުތަކާއި ޚިލާފުވެގެން ކަމަށް އެ ވުޒާރާއިން ބުންޏެވެ.

ހަމައެހެންމެ، އެހެނިހެން ޤާނޫނުތަކާއި ޚިލާފުވެގެން 12 ވިޔަފާރިއެއް ބަންދުކޮށްފައިވާ ކަމަށް ވިޔަފާރިއާބެހޭ ވުޒާރާއިން ބުނެފައިވެއެވެ.

އެ ވުޒާރާއިން ބުނީ އަލުން ހުޅުވުމަށް 8 ވިޔަފާރިއަކަށް ހުއްދަ ދީފައިވާ ކަމަށެވެ.

ޤަވާޢިދާއި ޚިލާފަށް ބިދޭސީން ހިންގާ ވިޔަފާރިތައް ރިޕޯޓުކުރަން ޚާއްޞަ ލިންކެއް އިޤްތިޞާދީ ތަރައްޤީއާއި ވިޔަފާރިއާބެހޭ ވުޒާރާއިން ތަޢާރަފްކޮށް އެފަދަ ވިޔަފާރިތައް ރިޕޯޓު ކުރުމަށް އާންމުންގެ ކިބައިން އެދިފައި ވަނީ ހުސްވި ނޮވެމްބަރު މަހުގެ 27 ވަނަ ދުވަހުކަން ފާހަގަ ކުރެވެއެވެ.