ސުޕާ، ސެލޫން ފަދަ ތަންތަނަށް އަމާޒުކޮށް ހިންގި އޮޕަރޭޝަނެއްގައި 3 ތަނެއް ބަންދުކޮށްފި

ސުޕާ، ސެލޫން ފަދަ ތަންތަނަށް އަމާޒުކޮށް ހިންގި އޮޕަރޭޝަނެއްގައި 3 ތަނެއް ބަންދުކޮށްފިއެވެ.

އިމިގްރޭޝަނުން މިއަދު ބުނީ ސުޕާ އަދި ސެލޫން ފަދަ ތަންތަނުގައި ޤަވާޢިދާ ޚިލާފަށް މަސައްކަތް ކުރަމުންދާ ބިދޭސީންނަށް އަމާޒުކޮށް ޓާސްކްފޯސްއިން ރޭ މާލޭގައި އޮޕަރޭޝަނެއް ކުރިއަށްގެންގޮސްފައިވާ ކަމަށެވެ.

މި އޮޕަރޭޝަންގައި މާލޭގައި ހިންގަމުންދިއަ އެފަދަ 10 ތަނެއް ބަލައި ފާސްކޮށްފައިވާ ކަމަށް އިމިގްރޭޝަނުން ބުންޏެވެ.

އެ އިދާރާއިން ބުނީ މި އޮޕަރޭޝަންގައި 03 ތަނެއް ބަންދު ކޮށްފައިވާ ކަމަށެވެ.

އިމިގްރޭޝަނުން އާންމުކޮށްފައިވާ މަޢުލޫމާޓުތަކަށް ބަލާއިރު،މި މަހުގެ 9 ވަނަ ދުވަހުން ފެށިގެން ޓާސްކްފޯހުން ހިންގަމުން އަންނަ މި އޮޕަރޭޝަންތަކުގައި މިހާތަނަށް މިފަދަ 11 ތަނެއް ބަންދުކޮށްފައިވާކަން ފާހަގަ ކުރެވެއެވެ.

މަސާޖްޕާލާ ތަކަށް އަމާޒުކޮށް ބަލާފާސްކުރަން އޮޕަރޭޝަންތައް ފަށާފައި މިވަނީ ރައީސުލްޖުމްހޫރިއްޔާ މާލޭ ރައްޔިތުންނާއެކު މިފަހުން ބޭއްވި ބައްދަލުވުމުގައި މާލޭގައި ހިންގާ މަސާޖްޕާލާތައް ހުއްޓުވައިދިނުމަށް އެދިފައިވަނިކޮށް ކަން ފާހަގަ ކުރެވެއެވެ. މި ބައްދަލުވުންތަކުގައި އާންމުންގެ ފަރާތުން ހުށަހަޅާ މިފަދަ މައްސަލަތައް ވަރަށް ގާތުން ބައްލަވާ ފިޔަވަޅު އަޅުއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.