ތޫފާން މިހާރު ހުރީ ތުރާކުނުގެ އިރުއުތުރުން 875 ކިލޯމީޓަރު ދުރުގައި: މެޓް އޮފީސް

ޑިޓްވާ ތޫފާން މިހާރު ހުރީ ހއ. ތުރާކުނުގެ އިރުއުތުރުން، ގާތްގަނޑަކަށް 875 ކިލޯމީޓަރު ދުރުގައި ކަމަށް މެޓް އޮފީހުން ބުނެފިއެވެ.

މޫސުމާބެހޭ ޤައުމީ އިދާރާ، މެޓް އޮފީހުން މިއަދު ބުނީ ޑިޓްވާ ތޫފާން މިހާރު ހުރީ ސްރީލަންކާގެ އުތުރު އައްސޭރިފަށާއި ބޭ އޮފް ބެންގާލްގެ ހުޅަނގު ދެކުނު ސަރަހައްދުގައި ކަމަށެވެ. މި ތޫފާން އިއްޔެ ހުރީ ހއ. ކެލާގެ އިރުއުތުރުން ގާތްގަނޑަކަށް 876 ކިލޯ މީޓަރު ދުރުގައި ކަމަށް މެޓް އޮފީހުން އިއްޔެ ވަނީ ބުނެފައެވެ.

މެޓް އޮފީހުން ބުނީ މި ތޫފާން ދަތުރުކުރާނެ ކަމަށް ލަފާ ކުރެވެނީ އުތުރު ހުޅަނގުއުތުރުން ރާއްޖެއާ ދުރަށް ކަމަށެވެ.

މި ތޫފާން މާދަމާގެ، 30 ނޮވެމްބަރުގެ ހެނދުނުގެ ވަގުތެއްގައި އިންޑިއާގެ އުތުރު ޓެމިލްނާޑޫ، ޕޫޑޫޗެރީ އަދި އަންދުރަ ޕްރެދޭޝްގެ ދެކުނު އައްސޭރިފަށަށް ޖެހޭނެ ކަމަށް ލަފާކުރެވޭ ކަމަށް ވެސް މެޓް އޮފީހުން ވަނީ ބުނެފައެވެ.

މި ތޫފާނާއި ގުޅިގެން ކުރިއަށް އޮތް 24 ގަޑިއިރުވެސް ރާއްޖެއަށް ވިއްސާރަ ކުރާނެ ކަމަށާއި، ޚާއްޞަކޮށް މެދުރާއްޖެތެރޭގެ އެކި ހިސާބުތަކަށާއި ދެކުނުގެ ބައެއް އަތޮޅުތަކަށް ވިއްސާރަ ކުރުމާއިއެކު ގުގުރާނެ ކަމަށް މެޓް އޮފީހުން ބުންޏެވެ.

ޑިޓްވާގެ ނަމުން ނަންދީފައިވާ ތޫފާނުގެ ސަބަބުން ސްރީލަންކާއަށް ކުރަމުން އަންނަ ވިއްސާރާގައި ފެންބޮޑުވެ ބިންގަނޑު ކަނޑައިގެން ދިއުމުގެ ސަބަބުން މިހާތަނަށް 123 މީހަކު މަރުވެ 130 މީހުން ގެއްލިފައިވާ ކަމަށް ލަންކާގެ ޚަބަރުފަތުރާ ވަޞީލަތްތަކުން ބުނެއެވެ. އަދި މި ތޫފާނުގެ އަސަރު 373 ހާސް މީހުނަށް ކޮށްފައިވާއިރު، 43 ހާސް މީހުން ތިބީ ގެދޮރު ގެއްލިފައެވެ.