ލަންކާއަށް ފައިސާގެ އެހީވުމަށާއި މަސްދަޅު ކޭސް ފޮނުވުމަށް ސަރުކާރުން ނިންމައިފި

ސްރީލަންކާއަށް މިހާރު ކުރަމުންދާ ވިއްސާރައާ ގުޅިގެން، އެ ޤައުމަށް ފައިސާގެ އެހީގެ ގޮތުގައި 50،000 (ފަންސާސް ހާސް) އެމެރިކާ ޑޮލަރު އަދި މަސްދަޅުގެ 25،000 (ފަންސަވީސް ހާސް) ކޭސް  ހަދިޔާ ކުރަން ދިވެހި ސަރުކާރުން ނިންމައިފިއެވެ.

ދިވެހި ޚާރިޖިއްޔާއިން ބުނީ ސަރުކާރުގެ މި ނިންމުމަކީ، “ޑިޓްވާ” ތޫފާންގެ ސަބަބުން ސްރީލަންކާ ގެ އެކި ހިސާބުތަކަށް ބޯކޮށް ވާރޭވެހި އެ ޤައުމުގެ ރައްޔިތުންނަށް ލިބިފައިވާ ގެއްލުންތަކާއި ދަތިތަކުން އަރައިގަތުމަށް އެ ޤައުމަށް އެހީތެރިވުމުގެ ގޮތުން ނިންމި ނިންމުމެއް ކަމަށެވެ.

އެ ވުޒާރާއިން ނެރުނު ނޫސް ބަޔާނެއްގައި ބުނީ މި އެހީތެރިކަން ރަމްޒުކޮށްދެނީ ދެ ޤައުމުގެ ދެމެދުގައި އޮތް ގާތް އެކުވެރި ގުޅުމާއި މިފަދަ އުނދަގޫ ދަނޑިވަޅެއްގައި އެ ޤައުމުގެ ރައްޔިތުންނާއެކު ދިވެހި ރައްޔިތުން ތިބިކަން ކަމަށެވެ.

މި އެހީގެ ސަބަބުން ޙާލުގައި ޖެހިފައިވާ ސްރީލަންކާ ރައްޔިތުންނަށް ކޮންމެވެސް ވަރެއްގެ ތަސައްލީއެއް ލިބި، ސްރީލަންކާ ސަރުކާރުން ކުރަމުންދާ މަސައްކަތައް ކޮންމެވެސް ވަރެއްގެ ލުއިކަމެއް ލިބޭނެކަމަށް ދިވެހި ސަރުކާރުން އުއްމީދުކުރާ ކަމަށާއި އަދި މިފަދަ ކަންކަމުން ދައްކުވައިދެނީ ދެ ޤައުމުގެ ދެމެދުގައި އާއި ދެ ޤައުމުގެ ރައްޔިތުންގެ މެދުގައި ހިއްސާކުރާ ގާތް އެކުވެރި ގުޅުން ކަމަށް ވެސް ޚާރިޖިއްޔާއިން ނެރުނު ބަޔާނުގައި ބުނެފައިވެއެވެ.

ޑިޓްވާގެ ނަމުން ނަންދީފައިވާ ތޫފާނުގެ ސަބަބުން ސްރީލަންކާއަށް ކުރަމުން އަންނަ ވިއްސާރާގައި ފެންބޮޑުވެ ބިންގަނޑު ކަނޑައިގެން ދިއުމުގެ ސަބަބުން މިހާތަނަށް 123 މީހަކު މަރުވެ 130 މީހުން ގެއްލިފައިވާ ކަމަށް ލަންކާގެ ޚަބަރުފަތުރާ ވަޞީލަތްތަކުން ބުނެއެވެ. އަދި މި ތޫފާނުގެ އަސަރު 373 ހާސް މީހުނަށް ކޮށްފައިވާއިރު، 43 ހާސް މީހުން ތިބީ ގެދޮރު ގެއްލިފައެވެ.

މި ދުވަސްވަރު ލަންކާއަށް ދަތުރުކުރި ދިވެހި ޢާއިލާއެއްގެ 2 މީހަކު ވީނުވީއެއް ނޭނގި ގެއްލިފައިވާ ކަމަށް އެ ޢާއިލާއިން ބުނެފައިވާ ކަން ފާހަގަ ކުރެވެއެވެ.