ސަރުކާރާ ހަވާލުވިއިރު ވިޔަފާރިތަކަށް ދައްކަންހުރި ބިލުތަކުގެ ފައިސާ 5 ހަފްތާތެރޭ ދައްކާ ނިންމަނީ

ސަރުކާރާ ހަވާލުވިއިރު ވިޔަފާރިތަކަށް ނުދީ ހުރި އެތައްހާސް ބިލުގެ ފައިސާ 5 ހަފްތާތެރޭ ދައްކާ ނިމޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު އެކްސްގައި ކުރެއްވި ޕޯސްޓެއްގައި ވިދާޅުވީ 17 ނޮވެމްބަރު 2023 ގައި ސަރުކާރު ހިންގުމާ ހަވާލުވިއިރު، ދިވެހި ވިޔަފާރިތައް މެދުވެރިކޮށް ކުރުވާ، ފައިސާނުދީ ހުރި އެތައްހާސް ބިލުތައް ހިމެނޭ ކަމަށެވެ.

ރައީސް ވިދާޅުވީ ޤާނޫނުތަކާއި ޤަވާޢިދުތަކުގައި ކަނޑައަޅާފައިވާ އުޞޫލުތަކާ އެއްގޮތްވާ ގޮތުގެ މަތީން، ދިވެހި ސަރުކާރަށާއި ސަރުކާރު ހިއްސާވާ ކުންފުނިތަކަށް ހުށަހަޅާފައިވާ އެންމެހައި ބިލުތަކަށް އަދާކުރަންޖެހޭ ފައިސާ، ކުރިޔަށް އޮތް 5 ހަފްތާ ތެރޭ ދައްކާ ނިމޭނެކަމަށެވެ.

ރައީސް އިތުރަށް ވިދާޅުވީ ބިލުތައް އަދާ ކުރުމަކީ، އެމަނިކުފާނު ވެރިކަމާއި ހަވާލުވެލެއްވިއިރު، ފުން އަނދަވަޅެއްގައި އޮތް ދިވެހި އިޤްތިޞާދު ނަގާ ކޮޅަށްޖެހުމުގައި ކުރެވެމުންދާ މަސަައްކަތުގެ ތެރެއިން ޙާސިލްކުރެވޭ ވަރަށް ބޮޑު ކާމިޔާބިއެއް ކަމަށެވެ.

ސަރުކާރާ ހަވާލުވިއިރު ދިވެހި ކޮންޓްރެކްޓަރުންނަށް ދައްކަންޖެހޭ 500 މިލިއަން ރުފިޔާ ނުދެއްކި ހުރިކަމަށް ރައީސުލްޖުމްހޫރިއްޔާ ކުރިން ވަނީ ވިދާޅުވެފައެވެ.