ސުމޫދު ފްލޮޓީލާއަށް އިސްރާއީލުން ހުރަސްއެޅުން ރައީސް ކުށްވެރިކުރައްވަައިފި

ޣައްޒާއަށް ބޭނުންވާ އެހީ ހިފައިގެން ކަނޑު މަގުން ދަތުރުކޮށްފައިދާ ގްލޯބަލް ސުމޫދު ފްލޯޓިލާއަށް އިސްރާއީލުން ހުރަސްއެޅުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ކުށްވެރިކުރައްވައިފިއެވެ. 

ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ރައީސް ވިދާޅުވީ ބައިނަލްއަގުވާމީ ކަނޑުގައި ދަތުރުކުރަަމުންދަނިކޮށް ގްލޯބަލް ސުމޫދު ފްލޯޓިލާއަށް އިސްރާއީލުން ހުރަސްއެޅުން ހަރުކަށި އިބާރާތުން ކުށްވެރިކުރައްވާ ކަމަށެވެ. އަދި ފްލޯޓިލާގައި ހިމެނެނީ ޣައްޒާއަށް ބޭނުންވާ އަސާސީ އިންސާނީ އެހީ ހިފައިގެން ދަތުރުކުރަމުންދާ މަދަނީ އުޅަނދުފަހަރުކަން އެމަނިކުފާނު ފާހަގަކުރެއްވިއެވެ. 

އަދި މިގޮތަށް ބިރުދެއްކުމަކީ ބަލައިގަނެވޭ ކަމެއް ނޫންކަމަށާއި، އެފަދަ ކަންކަން ތަހައްމަލުކޮށްގެން ނުވާނެ ކަމުގައި ރައީސް ވިދާޅުވިއެވެ. މިނިވަަންކަމާއި އަސާސީ ޒަރޫރަތްތަކުން މަހުރޫމުކޮށްފައިވާ އާބާދީއަކަށް ނުހަނު ބޭނުންޖެހިފައިވާ އިންސާނީ އެހީއާއެކު ދަތުރުކުރާ ގާފިލާއެއް އަމާޒުފަތްގަނޑަކަށް ހަދައިލުމަކީ އިންސާނިއްޔަތުކަމާއި، ބައިނަލްއަގުވާމީ ގާނޫނުތަކާ ހިލާފު ކަމެއް ކަމުގައި ރައީސް ވިދާޅުވިއެވެ. 

މީގެ އިތުރުން ރައީސްވަނީ ތަކުރާރުކޮށް އިސްރާއީލުން ބައިނަލްއަގުވާމީ ގާނޫނުތަކާ ހިލާފަށް ހިންގަމުންދާ އަމަލުތަކާ ގުޅިގެން ވަރުގަދަ ފިޔަވަޅުތަކެއް އެޅުމަށް ބައިނަލްއަގުވާމީ މުޖުތަމައަށް ގޮވާލައްވާފައެވެ.

މިދިޔަ އޮގަސްޓު މަހު ދަތުރު ފެށި ސުމޫދު ފްލޮޓިލާގައި ދުނިޔޭގެ 44 ގައުމެއްގެ 500 މީހުން ހިމެނެއެވެ. މި ފްލޮޓިލާގެ ބައިވެރިންގެ ތެރޭގައި ދިވެއްސެއް ކަމަށްވާ އިބްރާހިމް ޝާޒް (ބޮޑޭ) ވެސް ހިމެނެއެވެ. ޣައްޒާގެ ސަރަހައްދީ ކަނޑުގެ ބޭރުން، އިސްރާއީލުގެ ކަނޑުގެ ސިފައިން ހަރަކާތްތެރިވާ ސަރަހައްދާ ކައިރިވުމުން، އިސްރާއީލުގެ ސިފައިން ވަނީ މި އުޅަނދުތައް ހުއްޓުވަން ފަށައިފައެވެ. ފްލޮޓިއްލާ އިންތިޒާމުކުރާ ފަރާތްތަކުން ބުނާ ގޮތުގައި، މިހާތަނަށް 200 އަށް ވުރެ ގިނަ މީހުން ތިބި 15 އުޅަނދެއް ވަނީ ހުއްޓުވައިފައެވެ. މި ހާދިސާގެ ވީޑިއޯތަކުން ފެންނަ ގޮތުގައި އިސްރާއީލު ސިފައިން ހަތިޔާރާއެކު ބައެއް އުޅަނދުތަކަށް އަރައި، އެތަނުގައި ތިބި މީހުން ހިފަހައްޓާފައިވެއެވެ.