އެންސިސް މަސް ފެކްޓަރީ މިފްކޯއިން ގަނެ މަސް އެކްސްޕޯޓުކުރުން ވަރުގަދަ ކުރަނީ!

ހުޅުމާލޭގައި އެންސިސް ފިޝަރީޒްއިން ހިންގަމުންއައި މަސް ފެކްޓަރީ މިފްކޯއިން ގަތުމަށް މަސައްކަތްކުރައްވާކަމަށް ސަރުކާރުގެ މަސްކުންފުނި، މިފްކޯއިން ވިދާޅުވެއްޖެއެވެ.

މިފްކޯއިން ބުނީ މަސް ބަންދު ކުރުމުގެ އެންމެ ފަހުގެ މެޝިނަރީއާއި އާލަތްތަކާއެކު ހަދާފައިވާ ފެކްޓްރީ ދޮޅުއަހަރަށް ހުއްޓިފައި ހުރުމަށްފަހު އެތަން އޮޕަރޭޝަނަށް ގެނައުމުގެ މަސައްކަތް ފެށޭނެ އެވެ. 

އެންސިސް މަސް ފެކްޓްރީގައި ދުވާލަކު 25 ޓަނުގެ މަސް ދަޅު އުފެއްދުމުގެ ޤާބިލްކަން ހުރެއެވެ. އަދި 1000 ޓަނުގެ އައިސް ޕްލާންޓަކާއި 1200 ޓަނުގެ ފިނިކުރި މަސް ރައްކާކުރުމުގެ ޤާބިލުކަންވެސް މި ކާރުޚާނާގައި ހުރެއެވެ. މީގެ އިތުރުން މަހުން އުކާލެވޭ ބައިތައް ބޭނުންކޮށްގެން ގަސްކާނާ ބަންދުކުރެވޭނެ ފިޝްމީލް ޕްލާންޓެއްވެސް އެ ކާރުޚާނާގައި ގާއިމުކޮށްފައިވެއެވެ.

ދުއިސައްތައެއްހާ މުވައްޒަފުންނާއެކު ހިންގަމުން އައިި އެންސިސް މަސް ކާރުޚާނާ ހުއްޓާލަން ޖެހުނު މައިގަނޑު ސަބަބަކީ، ކުރީ ސަރުކާރުން ކަޅުބިލަމަހުގެ ކިލޯއެއް ގަންނަ އަގު 25 ރުފިޔާއަށް ބޮޑުކުރުމާއެކުއެ ކުންފުންޏަށް މާލީ ގެއްލުމާއި ކުރިމަތިލާން ޖެހުމެވެ.