މޯދީ ރާއްޖެ ވަޑައިގަންނަވަނީ މިނިވަން ދުވަހުގެ ޝަރަފުވެރި މެހެމާނުގެ ހައިސިއްޔަތަކުން ނޫން!

އިންޑިއާގެ ބޮޑުވަޒީރު ނަރެންދުރަ މޯދީ، ރާއްޖޭގެ މިނިވަން ދުވަހާ ދިމާކޮށް ރާއްޖެ ވަޑައިގަންނަވަނީ މިނިވަން ދުވަހުގެ ޝަރަފުވެރި މެހެމާނުގެ ހައިސިއްޔަތަކުން ނޫން ކަމަށް ރައީސް އޮފީހުގެ ކޮމިއުނިކޭޝަން މިނިސްޓަރ އިބުރާހީމް ޚަލީލް ވިދާޅުވެއްޖެއެވެ.

އިންޑިއާގެ ބޮޑުވަޒީރު މޯދީ އަންނަ ހުކުރު ދުވަހު ރާއްޖެ ވަޑައިގަންނަވަނީ މިނިވަންދުވަހުގެ ރަސްމީ ޖަލްސާގެ ޝަރަފްވެރި މެހެމާނުގެ ހައިސިއްޔަތުން ކަމަށް ބުނެ ރާއްޖޭގެ އޮންލައިން ނޫހެއް ކަމަށްވާ އަދަދު ނޫހުގައި މިއަދު ޝާޢިއު ކުރި ޚަބަރަކާއި ގުޅިގެން މި ނޫހުން ދެންނެވި ސުވާލަކަށް ޖަވާބު ދެއްވަމުން ޚަލީލް ވިދާޅުވީ މޯދީ ރާއްޖެ ވަޑައިގަންނަވަނީ މިނިވަންދުވަހުގެ ޚާއްޞަ މެހުމާނެއްގެ ހައިސިއްޔަތުން ކަމަށާ ޝަރަފްވެރި މެހެމާނެއްގެ ހައިސިއްޔަތުން ނޫން ކަމަށެވެ.

އަދަދު ނޫހުގައި މިއަދު ހަވީރު ޝާޢިއު ކުރި އެ ޚަބަރުގައި ބުނީ ދިވެހިރާއްޖޭގެ 60 ވަނަ މިނިވަން ދުވަހުގެ މުނާސަބަތު ފާހަގަ ކުރަން ބާއްވާ ރަސްމީ ޖަލްސާގެ ޝަރަފުވެރި މެހެމާނަކީ އިންޑިއާގެ ބޮޑުވަޒީރު ނަރެންދުރަ މޯދީ ކަމަށް އެ ޤައުމުގެ އެކްސްޓާނަލް އެފެއާޒް މިނިސްޓްރީ އިން މިއަދު ބުނެފި ކަމަށެވެ.

އެ ނޫހުގައި ވާގޮތުން އަންނަ ހޮނިހިރު ދުވަހު ބާއްވާ މިނިވަން ދުވަހުގެ ޖަލްސާގައި ބައިވެރިވެވަޑައިގަތުމަށް މޯދީ ވަޑައިގަންނަވާނީ ޖުލައި 25، ގައެވެ. ޖަލްސާގައި ބައިވެރިވެވަޑައިގެންނެވުމަށްފަހު ޖުލައި 26، ގައި މޯދީ ރާއްޖެއިން ފުރާވަޑައިގަންނަވާނެ އެވެ.

އަދަދު ނޫހުން މިފަދައިން ވާހަކަތައް ފަތުރާފައިވާއިރު، މޯދީ ޖުލައި 25 ގައި ރާއްޖެ ވަޑައިގަތުމަށްފަހު ޖުލައި 26 ގައި އެނބުރި ވަޑައިގަންނަވާ ކަމަށާ މިނިވަން ދުވަހުގެ ރަސްމީ ޖަލްސާ އޮންނާނީ ޖުލައި 27 ވަނަ ދުވަހުގައި ކަމަށް ރައީސް އޮފީހުގެ އޮފިޝަލަކު މި ނޫހަށް މަޢުލޫމާތު ދެއްވިއެވެ.

ރާއްޖޭގެ 60 ވަނަ މިނިވަން ދުވަހާއި ދިމާކޮށް ބޮޑުވަޒީރު މޯދީ، ރައީސުލްޖުމްހޫރިއްޔާގެ ޚާއްޞަ ދަޢުވަތަކަށް، ޚާއްޞަ މެހުމާނެއްގެ ހައިސިްޔަތުން ރާއްޖެ ވަޑައިގަންނަވަނީ ރާއްޖެ - އިންޑިއާގެ ސިޔާސީ ގުޅުމަށް 60 އަހަރު ފުރޭ މުނާސަބަތާ ގުޅިގެން ކަން ފާހަގަ ކުރެވެއެވެ.