މާލޭސިޓީ ކައުންސިލުން ބާއްވާ ޙަފްލާތަކުގައި ދުފާއެއްޗެހި ނުބަހައްޓަން މޭޔަރު ނިންމައިފި!

މާލޭސިޓީ ކައުންސިލުން ބާއްވާ ޙަފްލާތަކުގައި ދުފާއެއްޗެހި ނުބަހައްޓަން މާލޭގެ މޭޔަރު އާދަމް އާޒިމް ނިންމައިފިއެވެ.

މޭޔަރު އާޒިމް މިއަދު މީސްމީޑިއާގައި ހިއްސާކުރެއްވި މެސެޖެއްގައި ވިދާޅުވީ މީގެ ފަހުން މާލެ ސިޓީ ކައުންސިލުން ބާއްވާ އެއްވެސް ބާވަތެއްގެ، އެއްވެސް ޙަފުލާއެއްގައި، ދުފުމަށް ބޭނުންކުރާ އެއްވެސް ބާވަތެއް ނުބަހައްޓަން ނިންމަވާފައިވާކަމަށެވެ.

އާޒިމް ވިދާޅުވީ، އެންމެ މުހިއްމު ވާނީ، ރައްޔިތުންގެ އުފާވެރިކަމާއި ޞިއްޙީ ދުޅަހެޔޮކަމާއި ހަމަޖެހުމާއި ފުދުންތެރިކަން ކަމަށެވެ.

އެގޮތުން ރައްޔިތުންނަށް މަންފާ ކުރާނެ ކޮންމެ ކަމަކީ، މޭޔަރު އެންމެ އިސްކަންދެއްވާނެ ކަންތައް ކަމަށާ އަދި މޭޔަރުގެ މަސައްކަތުގެ އެޖެންޑާގެ އެންމެ ކުރީގައި، އަބަދު ވެސް އެ ފަދަ ކަންކަން ހިމެނޭނެ ކަމަށެވެ.

އާޒިމް ވިދާޅުވީ އެގޮތަށް ނިންމެވީ ކެންސަރު ސޮސައިޓީގެ އެދިލެއްވުމަށް ކަމަށެވެ.

"މި ހަމައިން ވިސްނައި، ކެންސަރ ސޮސައިޓީން އެދި ލެއްވި ގޮތަށް، މީގެ ފަހުން މާލެ ސިޓީ ކައުންސިލުން ބާއްވާ އެއްވެސް ބާވަތެއްގެ، އެއްވެސް ޙަފުލާއެއްގައި، ދުފުމަށް ބޭނުންކުރާ އެއްވެސް ބާވަތެއް ނުބަހައްޓަން އަޅުގަނޑު ނިންމައިފިން."

މޭޔަރުގެ މި ނިންމެވުމަށް މާލޭސިޓީ ކައުންސިލްގެ ބައެއް މެމްބަރުންގެ ފާޑުކިޔުން އަމާޒުވެފައިވާކަން ފާހަގަ ކުރެވެއެވެ.