ދިވެހި ޑޮކްޓަރުންގެ ޚިދުމަތް ޤައުމުގެ ކުރިއެރުމަށް ވަރަށް މުހިއްމު: ޞިއްޙީ ވަޒީރު ނާޒިމް

ދިވެހި ޑޮކްޓަރުންގެ ޚިދުމަތް ޤައުމުގެ ކުރިއެރުމަށް ވަރަށް މުހިއްމުކަމަށް ޞިއްޙީ ވަޒީރު ޢަބްދުﷲ ނާޡިމް އިބްރާހީމް ވިދާޅުވެއްޖެއެވެ.

މިއަދު ފާހަގަކުރާ ދިވެހި ޑޮކްޓަރުންގެ މުނާސަބާގައި ވަޒީރު ނާޒިމް މީސްމީޑިއާގައި ކުރެއްވި ޕޯސްޓެއްގައި ވިދާޅުވީ ދިވެހި
ޑޮކްޓަރުންގެ ދުވަހަކީ ޞިއްހީ ދާއިރާގެ ކުރިއެރުމަށް މާޒީއާއި މިހާރުގެ ޑޮކްޓަރުންކުރައްވާ މަސައްކަތް އަގުވަޒަންކުރުމުގެ ދުވަހެއް ކަމަށެވެ.

އަދި މިހާރު ޒަމާނީ ވަޞީލަތްތަކާއި ޒަމާނީ ކުރިއެރުންތަކާއެކު ޑޮކްޓަރުން ޚިދުމަތްކުރައްވާއިރު، އެއީޤައުމުގެ ކުރިއެރުމަށް މުހިއްމު ޚިދުމަތެއްކަމަށް ވަޒީރު ވިދާޅުވިއެވެ.

ވަޒީރު ވަނީ ޑޮކްޓަރުންކުރައްވާ ޤައުމީ ބުރަ ޚިދުމަތަށް ޝުކުރު އަދާކުރައްވައިފައެވެ.

ޑޮކްޓަރުންނަށް ދިމާވާ އެކި ދަތިތައް ހައްލުކޮށްދިނުމަށް ކުރާ މަސައްކަތުގެ ތެރެއިން ސަރުކާރުން ދަނީ އެސްޓީއޯ ފާމަސީތަކުގެ ސްޓޮކްގައި ހުރި ބޭސްތަކުގެ މަޢުލޫމާތު ވަގުތުން ބެލޭނެގޮތަށް، ޑޮކްޓަރުންނަށް ޚާއްޞަކޮށްގެން އޮންލައިން ޕްލެޓްފޯމެއް ޤާއިމުކުރުމުގެ މަސައްކަތް ކުރަމުުންނެވެ.

ކޮންމެ އަހަރަކުވެސް ދިވެހި ޑޮކްޓަރުންގެ ދުވަސް ފާހަގަކުރަނީ އެޕްރީލް މަހުގެ 18ވަނަ ދުވަހުއެވެ. ދިވެހިރާއްޖޭގައި ޑޮކްޓަރުންގެ ދުވަސް ފާހަގަ ކުރަންފެށީ 1964ވަނަ އަހަރުން ފެށިގެންނެވެ.