ކުރީގެ ސަރުކާރުން އޮތީ ހުކުރު މިސްކިތާ މެދު އިހުމާލުވެފައި: އާދަމް ނަސީރު

ނިމިދޔަ ސަރުކާރުން، މާލޭ ހުކުރު މިސްކިތް މަރާމާތުކުރަން ބޭނުންކުރި ކެމިކަލްގެ ސަބަބުން އެ މިސްކިތުގެ އަސްލަށް ގެއްލުންވެފައިވާ ކަމަށް ކަލްޗާ އެންޑް ހެރިޓޭޖް މިނިސްޓަރު އާދަމް ނަސީރު އިބްރާހީމް މިއަދު ވިދާޅުވެއްޖެ އެވެ.

ހުކުރު މިސްކިތް އާބާތުރަ ފިލުވުމުގެ މަސައްކަތް ހުއްޓިފައިވާތީ ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާޙިމް (ކުޑޫ) ކުރެއްވި ސުވާލަކަށް ޖަވާބު ދެއްވަމުން، މަޖިލީހުގައި އާދަމް ނަސީރު ވިދާޅުވީ މި ސަރުކާރު ވެރިކަމާ ހަވާލުވުމުގެ ކުރިން ވެސް އެ މަސައްކަތް ހުއްޓިފައިވާ ކަމަށެވެ.

އޭނާ ވިދާޅުވި ގޮތުގައި، ރައީސް ޑރ. މުހައްމަދު މުއިއްޒު ނޮވެންބަރު، 2023 ގައި ވެރިކަމާ ހަވާލުވެވަޑައިގަތުމުގެ ހަ މަސް ދުވަސް ކުރިން، މެއި 2023 ގައި އެ މަސައްކަތް ހުއްޓިފައިވާ ކަމަށް ފެންނަން އެބައޮތް ކަމަށެވެ.

މިއާއެކު ވަޒީރު ވިދާޅުވީ މިސްކިތުގެ ބެރިތައް ވަަރަށް ބޮޑަށް ހަލާކުވެފައިވާ ކަމަށާއި މަރާމާތަށް ބޭނުންކުރި ކެމިކަލެއްގެ ސަބަބުން ވަރަށް ބޮޑެތި ގެއްލުންވެފައިވާ ކަމަށެވެ. 

މިއަދުގެ މަޖިލީހުގައި ވަޒީރު ވަނީ ހުކުރު މިސްކިތަށް އިހުމާލު ވުމުގެ ސަބަބުން، އެ މިސްކިތުގެ އަސްލަށް ބަދަލު އައިސްފައިވާ ގޮތް ދައްކުވައިދޭ ފޮޓޯވެސް މެންބަރުންނަށް ދައްކަވާފައެވެ.