ރައީސް ޑރ. މުޢިއްޒުގެ ދިފާޢީ ސިޔާސަތަކީ ބޭރުގެ ބަޔަކަށް ބަރޯސާނުވުން: ދިފާޢީ ވަޒީރު

ޒައުޖަތު އަޙުމަދު2026 ނޮވެމްބަރު 04

ރައީސްގެ ދިފާޢީ ސިޔާސަތަކީ ދިވެހިންގެ މިނިވަންކަމާއި ސިޔާދަތު، ބޭރުގެ ބަޔަކަށް ބަރޯސާނުވެ އަމިއްލައަަށް ދިފާޢުކޮށް ދެމެހެއްޓުންކަމަށް ދިފާޢީ އަދި ވަޠަނީ ޚިދުމަތާބެހޭ ވަޒީރު ހަސަން ރަޝީދު ވިދާޅުވެއްޖެއެވެ.

ވަޒިރު މިފަދައިން ވިދާޅުވީ ދިވެހިރާއްޖޭގެ 38 ވަނަ ނަޞްރުގެ ދުވަހުގެ މުނާސަބާގައި ޖުމްހޫރީ މައިދާނުގައި ރޭ ބޭއްވި ރަސްމީ ޖަލްސާގައި ވާހަކަދައްކަވަމުންނެވެ.

ވަޒީރު ވަނީ ދުނިޔޭގެ ސަލާމަތީ މަސްރަހަށް ބޮޑެތި ބަދަލުތަކެއް އަންނަމުންދާކަން ފާހަގަކުރައްވާ ބަދަލުވަމުންދާ ދުނިޔޭގައި ކުރިމަތިލާންޖެހޭ ނުރައްކާތައް ގިނަކަމަށް ވިދާޅުވެފައެވެ.

ރައްޔިތުން ޤަބޫލުކުރަންވީ ހަޤީގަތަކީ ދިވެހިންނަކީ މިސަރަޙައްދުގައި އޮތް އެންމެ ޒަމަންވީ މިނިވަން ދަޢުލަތްކަމަށާއި މި ފަޚުރުވެރި މިނިވަންކަން ގުޅިފައިވަނީ ދިވެހި ރައްޔިތުން އިސްލާމްދީނުގެ މަތިވެރި ޙިދާޔަތުގައި އެއް އަޒުމެއްގައި ދެމިތިބޭ ތިބުމުގެ މައްޗަށްކަމަށް ވަޒީރު ވިދާޅުވިއެވެ.

ރައީސް ގެ ދިފާޢީ ސިޔާސަތަކީ ދިވެހިންގެ މިނިވަންކަމާއި ސިޔާދަތު ބޭރުގެ ބަޔަކަށް ބަރޯސާނުވެ އަމިއްލައަަށް ދިފާޢުކޮށްދެމެހެއްޓުންކަމަށް ވިދާޅުވެ ވަޒީރު ވިދާޅުވީ ދިވެހި އަސްކަރިއްޔާގެ ޤާބިލުކަން އިތުރުކުރުމަށް ކުރެވެމުންދާ މަސައްކަތްތަކަކީ މި ސިޔާސަތުގެ ދަށުން ކުރަމުންދާ މަސައްކަތްކަމަށާއި ސިފައިންގެ ޤާބިލުކަން އިތުރުކުރުމަށް އެއްގަމާއި ވަޔާއި ކަނޑުގެ އޮޕަރޭޝަންތަކަށް މީހުން ތަމްރީނުކުރުމާއި ޒަމާނީ ވަޞީަލަތްތައް ހޯދުމަށް ސަރުކާރުން މަސައްކަތް ކުރަމުންދާކަމަށެވެ.

"ނޮވެންބަރު 3ގެ ދުޝްމަނުންނާ ދެކޮޅަށް މަސައްކަތް ކުރި ސިފައިން ދެއްކި ނަމޫނާއިން އަދުގެ ޒުވާނުން އިބްރަތް ހާސިލްކުރަން ޖެހޭ. އަދި އެބޭފުޅުންގެ ޒިކުރާ ތާޢަބަދު އާއުކަރަންޖެހޭ. ޝަހީދުވެގެން ދިޔަ ސިފައިން ފުރާނައިން ޤުރުބާން ވެގެން ދިޔައީ ދީނާއި ޤައުމަށްޓަކައި ރައްޔިތުންގެ ސަލާމަތާއި ރައްކާތެރިކަމަށްޓަކައި ކުރި މަސައްކަތުގެ ތެރެއިން." ވަޒީރު ވިދާޅުވިއެވެ.

ނަޞްރުގެ ދުވަސް ހަނދާންކޮށްދެނީ މާޒީގައި ކަބާފައިން ދައްކައިިދިން ނަމޫނާއާ އެއްގޮތަށް ޤައުމީ މަސްލަހަތް އިސްކުރަންޖެހޭ ކަންކަމަށް ވަޒީރު ވިދާޅުވިއެވެ. އަދި އަމިއްލަ އެދުމުގެ ކުރިއަށް ދީނާ ޤައުމުގެ މަސްލަހަތު އިސްކުރަންޖެހޭކަމަށާއި އެއްވެސް ބައެއްގެ ބާރުގެ ދަށުގައި އޮތުމުގެ ބަދަލުގައި މަސައްކަތް ކުރަންޖެހޭނީ އަމިއްލަ ފައިމައްޗަށް ތެދުވުމަށްކަމަށްް ވަޒީރު ވިދާޅުވިއެވެ.