ޤަވާޢިދާ ޚިލާފަށް ރާއްޖެއިން ބޭރުކުރަން އުޅުނު ގިނަ އަދަދެއްގެ ބޭރު ފައިސާ އަތުލައިގެންފި

ޒައުޖަތު އަޙުމަދު2026 އޮކްޓޯބަރު 12

ޤަވާޢިދާ ޚިލާފަށް ރާއްޖެއިން ބޭރުކުރަން އުޅުނު ގިނަ އަދަދެއްގެ ބޭރު ފައިސާ އަތުލައިގެންފިއެވެ.

މޯލްޑިވްސް ކަސްޓަމްސް ސާވިސްއިން ބުނީ ޤަވާއިދާ ޚިލާފަށް ރާއްޖެއިން ބޭރުކުރަން އުޅުނު 09 ލައްކައަށްވުރެ ގިނަ ރުފިޔާއާ އެއްވަރުގެ ބޭރު ފައިސާ ކަސްޓަމްސްއިން އަތުލައިގެންފައިވާ ކަމަށެވެ.

ކަސްޓަމްސްއިން ބުނި ގޮތުގައި މި ފައިސާ އަތުލައިގެންފައި ވަނީ މި އޮކްޓޫބަރު މަހުގެ 7 ވަނަ ދުވަހު ވެލާނާ އިންޓަރނޭޝަނަލް އެއާޕޯޓުންނެވެ.

އެ އިދާރާއިން ހާމަކުރި ގޮތުގައި 905،669.80 ( ނުވަ ލައްކަ ފަސްހާސް ހަ ސަތޭކަ ފަސްދޮޅަސް ނުވަހާސް އަށްޑިހަ ލާރި) އަށްވާވަރަށް ބޭރު ފައިސާ ފެނިފައިވަނީ ރާއްޖެއިން ބޭރަށް ފުރަން ގޮސްހުރި އިންޑިއާ މީހެއްގެ އަތުންނެވެ.

ކަސްޓަމްސްއަށް ޑިކްލެއާ ނުކޮށް ބޭރު ކުރަން އުޅުނު މި ފައިސާގެ ތެރޭގައި އެކި ޤައުމުތަކުގެ ބޭރު ފައިސާ ހިމެނޭ ކަމަށް ކަސްޓަމްސްއިން ބުންޏެވެ.

ރާއްޖެއިން ބޭރަށްދާއިރު، 10،000 ޑޮލަރަށް ވުރެ އިތުރު އަދަދެއް ގެންދާނަމަ ކަސްޓަމްސްއަށް ޑިކްލެއަރ ކުރަންޖެހޭއިރު، އެ ފައިސާ ހޯދި ގޮތުގެ ލިއުންވެސް ހުށަހަޅަންޖެހޭ ގޮތަށް ޤާވާޢިދުގައިވެއެވެ. އަދި 10,000 ޑޮލަރަށްވުރެ މަދު އަދަދެއް އަތުގައި ހުރިނަމަވެސް، އެއީ ކުށް ކޮށްގެން ހޯދާފައިވާ ފައިސާއެއް ކަމަށް ޝައްކުކުރެވޭނަމަ ނުވަތަ ފައިސާ ހޯދި ގޮތް ސާފުކޮށްނުދެވޭނަމަ، މަނީ ލޯންޑްރިންގް ހުއްޓުވުމުގެ ޤާނޫނުގެ ދަށުން އެ ފައިސާ ހިފެހެއްޓުމުގެ ބާރު ކަސްޓަމްސް އޮފިސަރުންނަށް ލިބިގެންވެއެވެ.