ޕޯޗުގަލްގެ ޓީމު ދޫކޮށް ދިއުމުން އަދަބު ހައްގު، ނަމަވެސް ގައުމީ ޓީމުން ރިޓަޔަރ ނުކުރާނަން: ރޮނާލްޑޯ

މުހައްމަދު ރިފާއު2026 އޮކްޓޯބަރު 07

ޕޯޗުގަލްގެ ގައުމީ ފުޓްބޯޅަ ޓީމުގެ ކޯޗު ޖޯޖް ޖީސަސް ދެފަހަރެއްގެ މަތިން ވެވުނު ވައުދާ ހިލާފުވުމުން ކޭމްޕު ދޫކޮށް ދިޔަ މައްސަލައިގައި އޭނާއަށް އަދަބު ދޭންޖެހޭ ކަމަށާއި، ނަމަވެސް ގައުމީ ޓީމުން ރިޓަޔަރ ކުރުމުގެ ވިސްނުމެއް ނެތް ކަމަށް ކެޕްޓަން ކްރިސްޓިއާނޯ ރޮނާލްޑޯ ބުނެފިއެވެ.

އުމުރުން 41 އަހަރުގެ ރޮނާލްޑޯ ނޭޝަންސް ލީގުގައި ނޯވޭއާ ދެކޮޅަށް ކުޅުނު މެޗުގައި ބެންޗުގައި ބެހެއްޓުމަށްފަހު، ކުޅެން ނޭރުވުމުންނާއި، ޑެންމާކާ ދެކޮޅަށް ކުޅޭ މެޗުގެ ފުރަތަމަ އެގާރައިގައި ނުހިމެނޭނެ ކަން އެނގުމުން ވަނީ ގައުމީ ކޭމްޕު ދޫކޮށް ގޮސްފައެވެ. މިކަމާ ގުޅިގެން ނެރުނު ދިގު ބަޔާނެއްގައި ރޮނާލްޑޯ ބުނީ، އޭނާ ކުރި ކަންތަކުގެ ފުރިހަމަ ޒިންމާ ނަގާ ކަމަށާއި، ޕޯޗުގަލް ފުޓްބޯޅަ ފެޑަރޭޝަނުން އޭނާއަށް ދޭންޖެހޭ އަދަބެއް ކުޑަނުކޮށް ދޭންޖެހޭނެ ކަމަށެވެ. އަދި އޭނާގެ މި އަމަލަށްޓަކައި ޓީމުގެ ކުޅުންތެރިންނާއި ސަޕޯޓަރުންގެ ކިބައިން ވަނީ މާފަށް އެދިފައެވެ.

ނަމަވެސް، ކޯޗު ޖީސަސް ވަނީ ދެމެދުގައި ވެވުނު އެއްބަސްވުންތަކާ ހިލާފުވެ، އިތިބާރު އެއްކޮށް ނަގާލާފައި ކަމަށް ރޮނާލްޑޯ ތުހުމަތުކުރިއެވެ. ރޮނާލްޑޯ ބުނި ގޮތުގައި، ފިޓްނަސް މެނޭޖްކުރުމުގެ ގޮތުން ދެ މެޗުގައިވެސް ނުކުޅޭ ގޮތަށް ފުރަތަމަ އެއްބަސްވި ނަމަވެސް، ނޯވޭ މެޗު އޮތް ދުވަހު 30 މިނެޓަށް ކުޅެން ނެރޭނެ ކަމަށް ކޯޗު ބުންޏެވެ. ނަމަވެސް، މެޗުގެ ދެވަނަ ހާފު މުޅިންހެން ވޯމްއަޕްކުރަން ހުރުމަށްފަހުވެސް ކުޅެން ނެރެފައި ނުވާތީ، ކޯޗު ވަނީ އޭނާއަށް ވީ ވައުދު އުވާލާފައެވެ. މީގެއިތުރުން، މީޑިއާއަށް މައުލޫމާތު ދިނުމުގައި ދެމީހުން އެއްބަސްވި ގޮތާ ހިލާފަށް ކޯޗު އަމަލުކުރުމުން، ދެވަނަ ފަހަރަށްވެސް އިތިބާރު ގެއްލުނީ ކަމަށް އޭނާ ބުންޏެވެ.

މި މައްސަލައިގައި ކޯޗު ޖީސަސް މީގެކުރިން ބުނެފައިވަނީ ރޮނާލްޑޯއާ ދެމެދު އެއްވެސް މައްސަލައެއް ނެތް ކަމަށާއި، ގައުމީ ޓީމުގެ ދޮރު އޭނާއަށް އަދިވެސް އޮތީ ހުޅުވިފައި ކަމަށެވެ. ރޮނާލްޑޯވެސް ވަނީ ސަސްޕެންޝަންގެ މުއްދަތު ނިމުމުން، ފިޓްކޮށް ހުރެ ގައުމީ ޓީމަށް އަލުން ކުޅެން ތައްޔާރަށް ހުރި ކަމަށް ބުނެފައެވެ.

ޕޯޗުގަލްއަށް 234 މެޗުން 146 ގޯލު ޖަހައިދީ ދުނިޔޭގެ ރެކޯޑު ގާއިމުކޮށްފައިވާ ރޮނާލްޑޯ ވަނީ އެ ގައުމާއެކު ޔޫރޯ 2016 އާއި ދެ ނޭޝަންސް ލީގު ކާމިޔާބުކޮށްފައެވެ. ސައުދީ އަރަބިއްޔާގެ އަލް-ނަސްރަށް ކުޅެމުންދާ ރޮނާލްޑޯ މިހާރު ވަނީ އެ ކްލަބުގެ ފަރިތަކުރުންތަކާ ގުޅިފައެވެ. އޭނާ މިހާރު އަމާޒު ހިފާފައިވަނީ ކެރިއަރުގައި 1،000 ގޯލުގެ އިމަށް ވާސިލުވުމަށެވެ.