މޭޓްލޭންޑް-ނައިލްސްގެ ފަހުވަގުތުގެ ގޯލުން އެވަޓަންއިން މެންޗެސްޓާ ޔުނައިޓެޑް ސިއްސުވާލައިފި

މުހައްމަދު ރިފާއު2026 ސެޕްޓެމްބަރު 07

އިނގިރޭސި ޕްރިމިއާ ލީގުގައި ރޭ މެންޗެސްޓާ ޔުނައިޓެޑާ ދެކޮޅަށް ކުޅުނު މެޗުގެ އެންމެ ފަހު ސިކުންތުކޮޅުގެ ތެރޭގައި އެއިންސްލީ މޭޓްލޭންޑް-ނައިލްސް ޖެހި ހިތްގައިމު ގޯލާއެކު، 2-2 އިން ނަތީޖާ އެއްވަރުކޮށް އެވަޓަންއިން ޔުނައިޓެޑް ސިއްސުވާލައިފިއެވެ.

އެވަޓަންގެ ހިލް ޑިކިންސަން ސްޓޭޑިއަމްގައި ކުޅުނު މި މެޗުގެ 87 ވަނަ މިނެޓުގައި ބެންޖަމިން ސެސްކޯ ބޯޅަ ގޯލުގެ ތެރެއަށް ވަދެ، ޔުނައިޓެޑަށް މޮޅު ލިބުނު ކަމަށް ހީވި ނަމަވެސް، ބަދަލު ކުޅުންތެރިއެއްގެ ގޮތުގައި ނުކުތް މޭޓްލޭންޑް-ނައިލްސް ވަނީ 30 ޔާޑު ދުރުން ފޮނުވާލި ބާރު ހަމަލާއަކުން މެޗުގެ ނަތީޖާ އެއްވަރުކޮށްދީފައެވެ.

ފުރަތަމަ ހާފުގައި ޔުނައިޓެޑްގެ ބްރޫނޯ ފެރްނާންޑޭސް ފޮނުވާލި ހަމަލާއެއް ގޯލުގެ ހުރަސް ދަނޑިއަށް އަމާޒުވިއިރު، އެވަޓަންގެ ތިއާނޯ ބާރީއަށް ލިބުނު ރަނގަޅު ފުރުސަތެއްގައި ބޮލުން ފޮނުވާލި ބޯޅަ ވަނީ ގޯލުގެ މަތިން ބޭރަށް ގޮސްފައެވެ.

ދެވަނަ ހާފު ފެށިގެން ފުރަތަމަ މިނެޓުގައި ބްރަޔަން އެމްބުއޭމޯ ވަނީ އޭރިއާ ތެރެއަށް ވަދެ، ވާތު ފައިން ފޮނުވާލި ސުޕަ ގޯލުން ޔުނައިޓެޑަށް ލީޑު ނަގައިދީފައެވެ. ނަމަވެސް، މެޗުގެ 82 ވަނަ މިނެޓުގައި ތައިރީކް ޖޯޖް ވަނީ ބާރު ހަމަލާއަކުން އެވަޓަންއަށް ނަތީޖާ އެއްވަރުކޮށްދީފައެވެ. އޭގެފަހުން ލޫކް ޝޯ ނަގައިދިން ހުރަހަކުން ސެސްކޯ އަލުން ޔުނައިޓެޑަށް ލީޑު ނަގައިދިން ނަމަވެސް، މޭޓްލޭންޑް-ނައިލްސްގެ ކާމިޔާބީއާއެކު މެޗު ނިމުނީ އެއްވަރުވެގެންނެވެ.

މި ނަތީޖާއާއެކު، ކުޅުނު ތިން މެޗުން ލިބުނު 4 ޕޮއިންޓާއެކު މެންޗެސްޓާ ޔުނައިޓެޑް އޮތީ ތާވަލުގެ 11 ވަނައިގައެވެ. ތިން މެޗުން 5 ޕޮއިންޓް ހޯދައިގެން އެވަޓަން އޮތީ ތާވަލުގެ 8 ވަނައިގައެވެ.