ދެވަނަ ކުއާޓަރުގައި އެސްޓީއޯގެ ސާފު ފައިދާއަށް ކުރިއެރުމެއް

މުހައްމަދު ރިފާއު2026 ޖުލައި 29

މިއަހަރުގެ ފުރަތަމަ ކުއާޓަރާ އަޅާބަލާއިރު، ނިމިގެންދިޔަ ދެވަނަ ކުއާޓަރުގައި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އަށް ލިބުނު ސާފު ފައިދާ އިތުރުވެއްޖެއެވެ.

އެސްޓީއޯއިން އާންމުކޮށްފައިވާ މިއަހަރުގެ ދެވަނަ ކުއާޓަރުގެ މާލީ ހިސާބުތަކަށް ބަލާއިރު، އެ ކުންފުންޏަށް ސާފު ފައިދާގެ ގޮތުގައި 280 މިލިއަން ރުފިޔާ ވަނީ ލިބިފައެވެ. މިއީ ފުރަތަމަ ކުއާޓަރުގައި ސާފު ފައިދާގެ ގޮތުގައި ލިބުނު 276 މިލިއަން ރުފިޔާ އާ އަޅާބަލާއިރު ރަނގަޅު ކުރިއެރުމެކެވެ.

ނިމުނު ކުއާޓަރުގައި އެސްޓީއޯއަށް ޖުމްލަ 6.9 ބިލިއަން ރުފިޔާ ގެ އާމްދަނީއެއް ލިބިފައިވާއިރު، މުދާ ވިއްކުމަށް ކުރި ޚަރަދުގެ ގޮތުގައި 6.2 ބިލިއަން ރުފިޔާ ވަނީ ރެކޯޑުކުރެވިފައެވެ.

އާމްދަނީ 7 ބިލިއަން ރުފިޔާއާ ގާތްކުރި އިރު، މިއީ ކުރީ ކުއާޓަރާ އަޅާބަލާއިރު 27 އިންސައްތައިގެ ބޮޑު އިތުރުވުމެކެވެ.

• އާމްދަނީ އިތުރުވި މައިގަނޑު ސަބަބު: މެދުއިރުމަތީގައި ހިނގަމުންދާ ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގުތައް އުފުލިގެން ދިއުމެވެ.
• ތެލުގެ ފައިދާ ދަށްވުން: ދުނިޔޭގެ ބާޒާރުގައި ތެލުގެ އަގު ބޮޑުވި ނަމަވެސް، ދިވެހި ރައްޔިތުންނަށް ފޯރުކޮށްދޭ ތެލުގެ އަގު ބޮޑުނުކޮށް ހިފެހެއްޓުމަށް ސަރުކާރާއި އެސްޓީއޯއިން ކުރި މަސައްކަތުގެ ނަތީޖާއެއްގެ ގޮތުން ތެލުގެ މާޖިން ވަނީ ކުޑަވެފައެވެ. މީގެ ސަބަބުން ތެލުގެ ވިޔަފާރިން ލިބުނު ޖުމްލަ ފައިދާ ދަށްވިއެވެ.
• އެހެނިހެން ދާއިރާތަކުގެ ކުރިއެރުން: ތެލުގެ މާޖިން ކުޑަވި ނަމަވެސް، ކުންފުނީގެ އެހެނިހެން ވިޔަފާރިތަކުން ލިބުނު ފައިދާ އިތުރުވުމާ ގުޅިގެން، ޖުމްލަ ފައިދާއަށް ކުރި ނޭދެވޭ އަސަރު ވަނީ ކަންކުރެވިފައެވެ.

ދެވަނަ ކުއާޓަރުގައި އެސްޓީއޯއަށް ޖުމްލަ ފައިދާގެ ގޮތުގައި 757 މިލިއަން ރުފިޔާ ލިބިފައިވެއެވެ. ޖުމްލަ ފައިދާއަށް ބަދަލުތަކެއް އައި ނަމަވެސް، އިދާރީ ހިންގުމާއި ފައިނޭންސް ކުރުމުގެ ޚަރަދުތައް ކާމިޔާބުކަމާއެކު މެނޭޖްކުރުމުން، ޓެކްސް ކެނޑުމުގެ ކުރިން ފައިދާގެ ގޮތުގައި 335 މިލިއަން ރުފިޔާ ވަނީ ލިބިފައެވެ.

އެސްޓީއޯގެ މާލީ ބަޔާނުން ފާހަގަކޮށްލެވޭ އެންމެ މުހިންމު އެއް ކަމަކީ ކުރީގެ ކުއާޓަރުތަކާ އަޅާބަލާއިރު އިދާރީ ޚަރަދުތައް ކުޑަކުރެވިފައިވުމެވެ. ނަމަވެސް، މުދާ ވިއްކުމަށްޓަކައި ކުރަންޖެހުނު ހޭދަ ވަނީ ކުރީގެ ކުއާޓަރުތަކަށްވުރެ އިތުރުވެފައެވެ.