އިންޑިއާގެ ސިޔާސީ މަޝްރަހު ހޫނުވަނީ: ފުލުހުންނާއި އާންމުންނާ ދެމެދު ވަރުގަދަ ކުރިމަތިލުންތަކެއް!

މުހައްމަދު ރިފާއު2026 ޖުލައި 23

އިންޑިއާގެ ޤައުމީ އިމްތިޙާނު ނިޒާމުގައި ހުރި މައްސަލަތަކާއި ޕޭޕަރު ލީކުވުމުގެ މައްސަލައިގައި އިންސާފު ހޯދުމަށް، އިންޑިއާގެ ވެރިރަށް ނިއު ދިއްލީގެ މަގުތަކަށް އެތައް ހާސް ކުދިންނާއި ޒުވާނުން ނުކުމެ ވަރުގަދަ އިހުތިޖާޖުތަކެއް ކުރަން ފަށައިފިއެވެ.

މިއީ ފަހުގެ ތާރީޚެއްގައި ބޮޑުވަޒީރު ނަރެންދުރަ މޯދީގެ ސަރުކާރާ ދެކޮޅަށް ކުރެވުނު އެންމެ ބޮޑު އެއް އިހުތިޖާޖެވެ.

މި އިހުތިޖާޖުތައް އިންތިޒާމުކޮށް އިސްނަގާފައިވަނީ "ކޮކްރޯޗް ޖަންތާ ޕާޓީ" (ސީޖޭޕީ) ނަމަކަށް ކިޔާ ޒުވާނުންގެ ހަރަކާތަކުންނެވެ.

• ހަރަކާތުގެ ފެށުން: ބޮސްޓަން ޔުނިވަސިޓީގެ ގްރެޖުއޭޓެއް ކަމަށްވާ އަބީޖީތު ދިޕްކޭ އިސްވެ ހުރެ މެއި މަހު އުފެއްދި މި ހަރަކާތަކީ، އިންޑިއާގެ އުއްތަމަ ފަނޑިޔާރު ދެއްކެވި ވާހަކަފުޅެއްގައި ވަޒީފާނެތް ޒުވާނުން "ކޮކްރޯޗް" ގެ ގޮތުގައި ސިފަކުރެއްވި ކަމަށް ބުނެ، އެކަމާ ދެކޮޅަށް ސަމާސާ ގޮތަކަށް ފެށި ހަރަކާތެކެވެ.
• މައިގަނޑު މައްސަލަ: މެޑިކަލް ކޮލެޖުތަކަށް ވަނުމަށް ބާއްވާ ވާދަވެރި "ނީޓް" އިމްތިޙާނުގެ ޕޭޕަރުތައް ލީކުވެ، އެތައް މިލިއަން ދަރިވަރުންނެއްގެ މުސްތަޤުބަލަށް އަސަރުކުރުމާ ގުޅިގެން، ދަރިވަރުން ދަނީ އެޑިއުކޭޝަން މިނިސްޓަރު ދަރްމެންދުރަ އަލްމާސީ އިސްތިއުފާ ދެއްވުމަށާއި އިމްތިޙާނު ނިޒާމު އިސްލާހުކުރުމަށް ގޮވާލަމުންނެވެ.

އިއްޔެ ޕާލަމެންޓް އިމާރާތާ ދިމާލަށް ދާންއުޅުނު މުޒާހަރާގެ ބައިވެރިން ހުއްޓުވުމަށް ފުލުހުން ވަނީ ކަރުނަގޭހާއި ލައްޓުބުރި ބޭނުންކޮށްގެން ހަމަލާދީފައެވެ.

• އަނިޔާވުން: މުޒާހަރާގެ އިންތިޒާމުކުރާ ފަރާތްތަކުން ބުނި ގޮތުގައި ފުލުހުންގެ ހަމަލާތަކުގައި 150 އަށްވުރެ ގިނަ މުޒާހަރާގެ ބައިވެރިންނަށް އަނިޔާވެ ހޮސްޕިޓަލުގައި ދަނީ ފަރުވާދެމުންނެވެ. އަދި ދިއްލީ ފުލުހުން ބުނެފައިވަނީ ހަމަނުޖެހުންތަކުގައި 118 ފުލުހަކަށްވެސް އަނިޔާވެފައިވާ ކަމަށެވެ.
• އިންޓަނެޓް ކަނޑާލުން: ހަމަނުޖެހުންތަކާ ގުޅިގެން ސަރުކާރުން ވަނީ ދިއްލީގެ ބައެއް ސަރަހައްދުތަކުން އިންޓަނެޓްގެ ހިދުމަތް ކަނޑާލާފައެވެ.

އިހުތިޖާޖުތަކާ ގުޅިގެން އިންޑިއާގެ އިދިކޮޅު ލީޑަރު ރާހުލް ގާނދީ ވަނީ ބޮޑުވަޒީރު ނަރެންދުރަ މޯދީގެ ދިރިއުޅުއްވާ ގޭގެ ކުރިމަތީގައި އިހުތިޖާޖު ކުރައްވާފައެވެ. މީގެ ސަބަބުން ފުލުހުން ވަނީ އޭނާ ކުޑަވަގުތުކޮޅަކަށް ހައްޔަރުވެސް ކޮށްފައެވެ.

ބޮޑުވަޒީރު މޯދީ ސީދާ އިހުތިޖާޖާ މެދު އެއްޗެއް ވިދާޅުނުވި ނަމަވެސް، ޕާލަމެންޓަރީ އެފެއާޒް މިނިސްޓަރު މެދުވެރިކުރައްވައި ވިދާޅުވީ ކުރިއަށް އޮތް ތަނުގައި އިމްތިޙާނު ޕޭޕަރުތައް ލީކުނުވާނެކަން ކަށަވަރުކުރައްވާނެ ކަމަށެވެ. ނަމަވެސް، އިހުތިޖާޖު ކުރާ ޒުވާނުން ދަނީ ސަރުކާރާއި ބޮޑުވަޒީރު މޯދީ އިސްތިއުފާ ދެއްވަންދެން މަގުމަތީގައި ތިބޭނެ ކަމަށް ބުނެ އަޑުއުފުލަމުންނެވެ.