އިންޑިއާއިން އެކްސްޕޯޓްކުރާ ތެލުން ޑިއުޓީ ނުނަގާ ޤައުމުތަކުގެ ލިސްޓްގައި ރާއްޖެ ހިމަނައިފި

ޒައުޖަތު އަޙުމަދު2026 ޖުލައި 03

އިންޑިއާއިން އެކްސްޕޯޓްކުރާ ތެލުން ނަގާ ދެ ބާވަތެއްގެ ޑިއުޓީ ނުނަގާ ޤައުމުތަކުގެ ލިސްޓްގައި ރާއްޖެ ހިމަނައިފިއެވެ.

މިއީ އިންޑިއާއިން އަވަށްޓެރި ޤައުމުތަކަށް އިސްކަންދިނުމުގެ ސިޔާސަތު ނުވަތަ ނެއިބަހުޑް ފަސްޓް ޕޮލިސީގެދަށުން އެޅި ފިޔަވަޅެކެވެ.

މި ސިޔާސަތުގެ ދަށުން ކަނޑާލި ޑިއުޓީގެ ތެރެއިން އެސްއޭއީޑީ އަކީ ދުނިޔޭގެ ބާޒާރުގައި ތެލުގެ އަގުބޮޑުވާ ވަގުތުތަކުގައި އޭގެ ފައިިދާ ލިނބިގަތުމަށް އަމާޒުކޮށްގެން ނަގާ ޑިއުޓީ އެކެވެ. 

އިންޑިއާއިން ރާއްޖެ ހިމެނީ ސްޕެޝަލް އެޑިޝަނަލް އެކްސައިޒް ޑިއުޓީ (އެސްއޭއީޑީ) އާއި ރޯޑް އެންޑް އިންފްރާސްޓްރަކްޗާ ސެސް (އާރްއައިިސީ) ނުނަގާ ޤައުމުތަކުގެ ލިސްޓްގައެވެ.

މި ލިސްޓްގައި ކުރިން އޮތީ ނޭޕާލާއި ބޫޓާނާއި ބަންގްލަދޭޝް އަދި ސްރީ ލަންކާ އެވެ. ޖޫން 30 ގައި އެ ލިސްޓަށް ބަދަލު ގެނެސް އިތުރުކުރީ ރާއްޖެއާއި މޮރިޝަސްއެވެ.

އެސްއޭއީޑީގެ ގޮތުގައި ޕެޓްރޯލް ލިޓަރަކުން  ހަތަރު ރުޕީސް ޑީސަލް ލިޓަަރަކުން 8.5 ރުޕީސް އެސްއޭއީޑީގެ ގޮތުގައި މިހާރު ނަގަ އެވެ. ޑިއުޓީގެ ދެބައެއް ރާއްޖެއިން ދައްކަން ނުޖެހުމުން އިންޑިއާއިން ތެޔޮ އެތެރަކުރަން ރާއްޖޭން ކުރަން ޖެހޭ ހަރަދުކުޑަވާނެ އެވެ.

އިންޑިއާއިން ރާއްޖެއަށް މި ލުއި ދީފައި މިވަނީ އީރާން ހަނގުރާމައިގެ ސަބަބުން ތެލުގެ އަގު ބޮޑެ، ރާއްޖެއަށް ބޮޑެތި ދަތިތަކާ ކުރިމަތިވެފައިވާ ވަގުތެއްގައިކަން ފާހަގަ ކުރެވެއެވެ.