މަޖިލީހުގެ ނައިބު ރައީސްކަމުން ނާޒިމް ވަކިކުރާ މައްސަލައިގެ ކޮމެޓީ ބައްދަލުވުން މިއަދު

މުހައްމަދު ރިފާއު2026 މޭ 20

ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމްގެ އިތުބާރު ނެތް ކަމުގެ މައްސަލައިގެ ގަރާރަށް ބަހުސް ކުރާނެ ވަގުތާއި، އޭނާ ޖަވާބުދާރީވުމަށް ދޭނެ ވަގުތު ކަނޑައެޅުމަށް މަޖިލީހުގެ އާންމު ކޮމިޓީގެ ބައްދަލުވުމެއް މިއަދަށް ތާވަލުކޮށްފިއެވެ.

މިއަދު ހަވީރު 4:00 ގައި ބޭއްވުމަށް ހަމަޖެހިފައިވާ މި ބައްދަލުވުމުގައި ނިންމާނީ:

• ގަރާރުގެ ބަހުސްގައި ވާހަކަ ދައްކަވާނެ މެންބަރުންގެ އަދަދު ކަނޑައެޅުން.
• މެންބަރުންނަށް ވާހަކަ ދެއްކެވުމަށް ދޭނެ ވަގުތު ކަނޑައެޅުން.
• ނައިބު ރައީސް ނާޒިމަށް ޖަވާބުދާރީވެވަޑައިގަތުމަށް ދޭނެ ފުރުސަތުގެ އަދަދާއި ވަގުތު ކަނޑައެޅުން.

ނާޒިމް މަގާމުން ވަކިކުރަން ހުށަހެޅީ ސަރުކާރު ހިންގާ ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޕާލަމެންޓްރީ ގްރޫޕުން ބޭއްވި ބައްދަލުވުމެއްގައެވެ. މަޖިލީހަށް މި ގަރާރު ހުށަހަޅާފައިވަނީ ޕީއެންސީގެ 73 މެންބަރުންގެ ސޮޔާއެކުގައެވެ.

މަޖިލީހަށް ހުށަހެޅި ގަރާރުގައި ނާޒިމާ ދެކޮޅަށް މައިގަނޑު ދެ ތުހުމަތެއް ކޮށްފައިވެއެވެ:

1. މަގާމުގެ ނުފޫޒު ބޭނުންކުރުން: މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ނަގާކަމުގެ ތުހުމަތު.
2. މަސްލަހަތު ނަގާލުން: މަޖިލީހުގެ މަސްލަހަތު ނަގާލަން ހިތްވަރުދީ، މަގާމުގެ ޒިންމާތަކުން ބަރީއަވުން.

ގަރާރުގައި ބަޔާންކޮށްފައިވާ ގޮތުން، މަގާމުގެ މަސްއޫލިއްޔަތު އަދާކުރެއްވުމުގައި ނާޒިމް ވަކި އަތަކަށް ޖެހިފައިވާކަން "ސާފުވާން އޮތުމާއެކު"، މެންބަރުންގެ ހައްގުތަކާއި އިމްތިޔާޒުތައް ހިމާޔަތްކޮށްދިނުމުގައި އޭނާ ވަނީ ފުޅާ ދާއިރާއެއްގައި އިހުމާލުވެފައެވެ. އަދި ނާޒިމްގެ މި އަމަލުތަކުގެ ސަބަބުން، މެންބަރުންނާ މަތިކޮށްފައިވާ ގާނޫނީ ވާޖިބުތައް އަދާކުރުމަށް "ނައިބު ރައީސް ހުރަހަކަށް ވެފައިވާ" ކަމަށް ވެސް އެ ގަރާރުގައި ބުނެފައިވެއެވެ.

މަޖިލީހުގެ ގަވާއިދު ބުނާގޮތުން މަޖިލީހުގެ ރައީސް ނުވަތަ ނައިބު ރައީސް މަގާމުން ވަކިކުރަން ހުށަހެޅޭނީ މަޖިލީހުގެ ޖުމްލަ މެންބަރުންގެ ހަތަރުބައިކުޅަ އެއްބަޔަށްވުރެ މަދުނޫން އަދަދެއްގެ (މަދުވެގެން 24 މެންބަރުންގެ) ސޮޔާއެކުގައެވެ. ނާޒިމްގެ މައްސަލަ 73 މެންބަރުންގެ ސޮޔާއެކު ހުށަހަޅާފައިވާއިރު، މަޖިލީހުގެ ނައިބު ރައީސް މަގާމުން ވަކިކުރެވޭނީ ޖަލްސާއަށް ހާޒިރުވެ ވޯޓުދޭ މެންބަރުންގެ އަޣުލަބިއްޔަތުންނެވެ.

ޖުމްލަ 93 މެންބަރުން ހިމެނޭ ރައްޔިތުންގެ މަޖިލީހުގައި ސަރުކާރު ހިންގާ ޕީއެންސީގެ ސާފު އަޣުލަބިއްޔަތު އޮތްއިރު، އެ ޕާޓީގެ އެކަނި ވެސް 76 މެންބަރުން ތިއްބަވައެވެ. އެހެންކަމުން ޕީއެންސީގެ ޕާލަމެންޓްރީ ގްރޫޕުން ނިންމާފައިވާ ގޮތަށް ނާޒިމް މަގާމުން ވަކިކުރުމުގެ ފުރުސަތު ވަރަށް ބޮޑެވެ.