ތެލެސީމިއާ ދުވަސް ހަނދާންކޮށްދީ، އިންސާނިއްޔަތުކަމާއި އޯގާތެރިކަމުގެ ސިފަތައް އިސްކުރުމަށް: ރައީސް

ޒައުޖަތު އަޙުމަދު2026 މޭ 08

ތެލެސީމިއާ ދުވަސް ހަނދާންކޮށްދީ، އިންސާނިއްޔަތުކަމާއި އޯގާތެރިކަމުގެ ސިފަތައް އިސްކުރުމަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

މިއަދު ފާހަގަ ކުރާ ދުނިޔޭގެ ތެލެސީމިއާ ދުވަހާ ގުޅިގެން، އެމަނިކުފާނުގެ ރަސްމީ އެކައުންޓުން އެކްސްގައި ހިއްސާ ކުރެއްވި  މެސެޖެއްގައި ވިދާޅުވީ ތެލެސީމިއާ ދުވަސް ހަނދާންކޮށްދީ، ދަސްކޮށްދެނީ އިންސާނިއްޔަތުކަމާއި އޯގާތެރިކަމުގެ ސިފަތައް އިސްކޮށް، ކޮންމެ ދިވެހި ދަރިއަކާއި ޢާއިލާއަކަށްމެ، މުޖުތަމަޢުގެ އެހީތެރިކަމާއި އެއްބާރުލުންދީގެން ބަދަހި ޤައުމެއް ބިނާކުރުމަށް ކަމަށެވެ.

ތެލެސީމިއާ ބަލި ތަޙައްމަލުކުރަމުންދާ ކޮންމެ ފަރުދަކަށާއި އެ ފަރުދުން ނިސްބަތްވާ ޢާއިލާތަކަށް ބޭނުންވާނޭ ޞިއްޙީ އަދި އިޖުތިމާޢީ ރައްކާތެރިކަން ފަހިކޮށްދިނުމުގައި ސަރުކާރުން އަދާކުރާ ޒިންމާ އާއި މަސްއޫލިއްޔަތުގެ މުހިންމުކަންވެސް އެމަނިކުފާނުގެ މެސެޖުގައި ފާހަގަކުރައްވާފައިވެއެވެ.

ދުވަހުގެ މުނާސަބަތުގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދުވެސް ވަނީ، ތެލެސީމިއާ ޕޭޝަންޓުންނަށް، ހެޔޮ ދުޢާ ކުރައްވައި މެސެޖެއް ހިއްސާކުރައްވާފައެވެ.

އެކަމަނާގެ މެސެޖުގައި، އޯގާތެރިކަމާއި ހެޔޮބަސްތަކަކީ، ފަރުވާގެ ދެބައިކުޅަ އެއްބައިގެ ގޮތުގައި ސިފަކުރައްވައި، ތެލެސީމިއާއަށް ފަރުވާ ހޯދާ ކޮންމެ ކުއްޖަކަށްމެ، މުޖުތަމަޢުގެ ކުލުނާއި ލޯތްބާއި އެހީތެރިކަމާއެކު، އަވަސް ޝިފާއެއް މިންވަރުކުރެއްވުމަށް އެދިވަޑައިގެން ދުޢާކުރައްވާފައިވެއެވެ.

ދުނިޔޭގެ ތެލެސީމިއާ ދުވަސް ފާހަގަކުރަނީ ކޮންމެ އަހަރެއްގެ މޭ މަހުގެ 8 ވަނަ ދުވަހުއެވެ. ތެލެސީމިއާ ބަލި ތަޙައްމަލުކުރަމުންދާ ފަރުދުންނާއި ޢާއިލާތަކަށް، ފަރުވާއަށް ފަހި މާހައުލެއް ޤާއިމުކުރެއްވުމަކީ މި ސަރުކާރުން ޚާއްޞަ އަހުމިއްޔަތެއް ދެއްވާ މަސައްކަތެކެވެ.