އައިޖީއެމްއެޗްގައި ބަރުދަން ލުއިކޮށްދޭ ބެރިއަޓްރިކް ސާޖަރީ ހަދަން ފަށައިފި

ބަރުދަން ލުއިކޮށްދޭ ބެރިއަޓްރިކް ސާޖަރީ އައިޖީއެމްއެޗްގައި ހަދަން ފަށައިފިއެވެ.

މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ހަލީމް، ސޯޝަލް މީޑިއާގައި ކުރެއްވި ޕޯސްޓުގައި ވިދާޅުވީ ހަޖަމްކުރާ ނިޒާމު މަސައްކަތް ކުރާ ގޮތަށާއި ގޮހޮރުގެ ސައިޒަށް ބަދަލު ގެނެސް ކުރާ މި އޮޕަރޭޝަންގެ ސަބަބުން، ބަރުދަން ބަރުވުމުގެ ސަބަބުން ޖެހޭ ގައިންގަޔަށް ނާރާ ބައެއް ބަލިތަކަށް ދެން ބޭސްކުރަން ނުޖެހޭނެ ކަމަށެވެ.

އޭގެ ތެރޭގައި ޓައިޕް 2 ހަކުރުބައްޔާއި ލޭ މައްޗަށް ދިއުމާއި ކޮލެސްޓެރޯލް މަތިވުމާއި ހިތުގެ ބަލިތައް އަދި ބައެއް ބާވަތުގެ ކެންސަރުން ރައްކާތެރިވާން ވެސް އެ އޮޕަރޭޝަންގެ ސަބަބުން އެހީދޭނެ ކަމަށް ވިދާޅުވި އެވެ.

ސަރުކާރުގެ ހޮސްޕިޓަލެއްގައި މުޅިން އަލަށް އެފަދަ މުހިންމު ހިދުމަތެއް ފެށުމަށް ސާޖަރީ ޑިޕާޓްމަންޓުގެ ޓީމުން މަސައްކަތްކުރާތާ ދުވަސްތަކެއް ވެފައިވާ ކަމަށާއި އެ މަސައްކަތް ކާމިޔާބުވެފައިވަނީ އެތައް ބައެއްގެ މަސައްކަތުންނާއި އެހީތެރިކަމާ އެކުގައި ކަމަށް ވެސް ވިދާޅުވިއެވެ. ހަލީލް ވަނީ އެ ހޮސްޕިޓަލުގެ ސަރޖަނުންނާއި، އެފަރާތްތަކާއެކު މަސައްކަތްކުރާ ހޭނައްތާ ޑޮކްޓަރުން، ނަރުހުން، އެހެނިހެން ޓެކްނިކަލް/ކްލިނިކަލް މަސައްކަތްތެރިންނާއި އިދާރީ މުވައްޒަފުން އަދި ސަޕޯޓް ސްޓާފުން ފާހަގަކުރައްވާފައެވެ. އަދި ރާއްޖޭގެ ފުރަތަމަ ބެރިއަޓްރިކް ސާޖަން، ޑރ. އަޒްނާގެ ނަން ވަކިން ފާހަގަކޮށް މަރުޙަބާ ދަންނަވާފައިވެއެވެ.

ހަލީލް ވިދާޅުވީ ރައީސް މުއިއްޒުގެ ސަރުކާރުން ސިއްހީ ދާއިރާއަށް ގެންނަވަމުންދާ ހަރުދަނާ އަދި ތަރައްގީގެ ކުރިއެރުންތަކަކީ ފަހުގެ ތާރީހެއްގައި އެ ދާއިރާއިން ދެކުނު ފާހަގަކޮށްލެވޭ އެންމެ ބޮޑެތި ކާމިޔާބީތަކެއް ކަމަށެވެ.