އޭޓީއެމް ބެހެއްޓުމަކީ ކުރެވޭ އިންވެސްޓްމަންޓެއް: ފިރާޤް

ގިނަ ރަށްތަކުގައި އޭޓީއެމް ބެހެއްޓުމަކީ ކުރެވޭ ސްޓްރެޓެޖިކް އިންވެސްޓްމަންޓެއް ކަމަށް އެމްއޭސީއެލްގެ ކުރީގެ ބޯޑު މެމްބަރު އަދި ފަތުރުވެރިކަމުގެ ދާއިރާގައި އިސްކޮށް ޙަރަކާތްތެރިވާ މުޙައްމަދު ފިރާޤް ވިދާޅުވެއްޖެއެވެ.

މީސްމީޑިއާގައި ކުރެއްވި ޕޯސްޓެއްގައި ފިރާޤް ވިދާޅުވީ ގިނަ ރަށްތަކުގައި އޭޓީއެމް ބެހެއްޓުމަކީ މައްސަލައެއްގެ ގޮތުގައި ބަލަން ނުޖެހޭނެ ކަމަށާ އެކަމަކީ ބޭންކަށާ އިޤްތިޞާދަށް ބޮޑެތި ފައިދާތަކެއް ލިބިދާނެ ކަމެއް ކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެއްގެ ގޮތުގައި ހިމެނިގެން ރާއްޖޭގެ ހުރިހާ ރަށެއްގައި އޭޓީއެމް ބެހެއްޓުމުގެ މަސައްކަތް، ބޭންކް އޮފް މޯލްޑިވްސް، ބީއެމްއެލްއިން ދަނީ ކުރަމުންނެވެ. އަދި މިކަމަށް ސިޔާސީ ފަރާތްތަކުން ފާޑު ކިޔަމުން އަންނަކަން ވެސް ފާހަގަ ކުރެވެއެވެ.

ފިރާޤް ވިދާޅުވީ ދަތުރުކުރާ ފަތުރުވެރިންގެ ދަތުރުތައް އެއްވަރަކަށް ކުރިއަށްދާއިރު، އެކްސެސިބަލް އޭޓީއެމްތައް ހުރުމުން ފަސޭހަކަމާއެކު ސީދާ ބޭންކިން ނިޒާމުން ފައިސާ ނެގޭނެ ކަމަށާއި މިއީ ފަތުރުވެރިންނަށް އިތުރު ހޭދަތައް ކުރުމަށް ފަސޭހަކަން އިތުރުކޮށްދިނުމުގެ އިތުރުން ބޭންކަށް އިތުރު ޑޮލަރު އިންފްލޯތައް ލިބި މެނޭޖްކުރެވޭނެ ކަމެއް ކަމަށެވެ.

"މިވަގުތު ގެސްޓްހައުސްތަކާއި ހޮޓަލްތަކުގައި މަޑުކުރާ ގިނަ ފަތުރުވެރިން ހޮޓަލުގެ ޕީއޯއެސް ސިސްޓަމް އިން މެދުވެރިކޮށް ފައިސާ މާރުކުރެއެވެ، މިފަދަ ހާލަތްތަކުގައި އަބަދު ބޭރު ފައިސާގެ ކޮންޓްރޯލް ހަރުދަނާ ގޮތަކަށް ބޭންކުތައް މެދުވެރިކޮށް މުއާމަލާތްތައް ނުހިނގެވި ދާނެ އެވެ. އޭޓީއެމްތަކުގެ ޙިދުމަތް ފުޅާކޮށްގެން ބޭންކު އަށް މި މުޢާމަލާތްތައް މޮނިޓަރ ކުރެވޭނެ ފައިދާހުރި ގޮތެކެވެ. ، މިއީ އާޚިރުގައި ހާމަކަން ބޮޑުވެ، ބޭންކިންގ ނެޓްވޯކްގެ ތެރޭގައި ބޭރު ފައިސާ ދައުރުވުން އިތުރުކޮށްދޭ ކަމެކެވެ." ފިރާޤގެ ޕޯސްޓުގައި ވިދާޅުވެފައިވެއެވެ.

ފިރާޤް ވިދާޅުވީ އޭޓީއެމްތަކުގެ ސަބަބުން ނުރަސްމީ ކޭޝް ޗެނަލްތަކަށް ބަރޯސާވުން މަދުވެ، ނިޒާމަށް އިތުރު އިތުބާރު އުފެދި، ބޭންކިން ދާއިރާއަށާއި ލޯކަލް ވިޔަފާރިތަކަށް ވެސް ދިގު މުއްދަތުގެ ފައިދާތަކެއް ލިބިގެންދާނެ ކަމަށެވެ.

ފަތުރުވެރިންނަށް އެއީ އެމީހުންގެ ފައިސާ ރައްކާތެރިކަމާއެކު ލިބޭނެކަން އެނގި އިތުބާރު އިތުރުކޮށްދޭ ކަމެއް ކަމަށާ އަދި އެކަމަކީ ބޭންކަށް ބޭރު ފައިސާގެ ހިފެހެއްޓުމެއް ބިނާކޮށްދޭ ކަމެއް ކަމަށް ވެސް ފިރާޤް ވިދާޅުވިއެވެ.

ފިރާޤް އިތުރަށް ވިދާޅުވީ އެކި ހިސާބުތަކުގައި އޭޓީއެމް ބެހެއްޓުމަކީ ހަމައެކަނި އަމަލީ ފިޔަވަޅެއް ނޫން ކަމަށާ އެއީ މުސްތަޤުބަލަށް ކުރެވޭ ސްޓްރެޓެޖިކް އިންވެސްޓްމަންޓެއް ކަމަށް ގަބޫލު ކުރައްވާ ކަމަށާއި ރިސޯޓުތަކުގައި ވެސް އޭޓީއެމް ބެހެއްޓޭނަމަ ބަހައްޓަންވީ ކަމަށް އޭނާ ވިދާޅުވިއެވެ.