އިއްޔެ ފެނުނު ހަށިގަނޑު އޮތީ ވަރަށް ބޮޑަށް ކުނިވެފައި: ފުލުހުން

ހުޅުމާލެއިން އިއްޔެ ފެނުނު ހަށިގަނޑު އޮތީ ވަރަށް ބޮޑަށް ކުނިވެފައި ކަމަށް ފުލުހުން މިއަދު ވިދާޅުވެއްޖެއެވެ.

ނިޔާވެފައި އޮތް މީހެއްގެ ހަށިގަނޑު ހުޅުމާލޭގެ ވޯޓާ ތީމް ޕާކު ހަދަން ދޫކޮށްފައިވާ ސަރަހައްދުން ފެނުނުކަން ފުލުހުން ހާމަކުރީ އިއްޔެ ހަވީރު 6 ޖަހާކަށްހާއިރުއެވެ.

އެ ސަރަހައްދުން ފެނިފައިވަނީ ފިރިހެނެއްގެ ހަށިގަނޑު ކަމަށާ އަދި އެއީ ކާކުކަން މިހާތަނަށް ދެނެގަނެވިފައި ނުވާ ކަމަށްވެސް ފުލުހުން ވިދާޅުވިއެވެ.

"މިހާތަނަށް މީހާގެ އައިޑެންޓިޓީ ކަށަވަރު ކުރެވިފައި ނުވި ނަމަވެސް، 21 އޯގަސްޓް 2025 ވަނަ ދުވަހުން ފެށިގެން ގެއްލިގެން ހޯދަމުންދާ ބިދޭސީ މީހާ ކަމަށް ބެލެވިދާނެ ބައެއް ކަންކަން ތަޙުޤީޤަށް މިހާތަނަށް ވަނީ ހޯދިފައި" ފުލުހުން މިއަދު މީޑިއާތަކަށް ފޮނުވި މެސެޖުގައި ވިދާޅުވިއެވެ.

ފުލުހުން ވިދާޅުވީ އެއީ ކާކުކަން ދެނެގަތުމުގެ މަސައްކަތް ކުރަމުންދާ ކަމަށެވެ.