ޓީމު ވަރުގަދަކުރަން 400 މިލިއަން ޕައުންޑް ހަރަދުކުރި ޓޮޓެންހަމް ބްރެންޓްފޯޑް އަތުން ބަލިވެއްޖެ

މުހައްމަދު ރިފާއު2026 އޯގަސްޓު 23

ޓޮޓެންހަމް ހޮޓްސްޕަރ އަލުން ބިނާކުރުމުގެ މަސައްކަތުގައި ކޯޗު ރޮބާޓޯ ޑެ ޒާބީ 400 މިލިއަން ޕައުންޑާ ގާތްކުރާ އަދަދަކަށް ފައިސާ ޚަރަދުކުރި ނަމަވެސް، އިނގިރޭސި ޕްރިމިއާ ލީގުގެ އައު ސީޒަންގެ ފުރަތަމަ މެޗުން އެކަނިވެސް ބޮޑު ހަގީގަތެއް ވަނީ ހާމަވެފައެވެ. އެއީ ދުނިޔޭގައި ހުރި ހުރިހާ ފައިސާއެއް އޮއްސާލި ނަމަވެސް، ޓީމުގެ ކިބައިގައި އަށަގަނެފައިވާ ބަލިވުމުގެ ފިކުރު ފިލުވައިލުމަކީ ފަސޭހަކަމެއް ނޫންކަމެވެ.

މިދިޔަ މާރިޗު މަހު ޓީމާ ހަވާލުވެ، ރެލިގޭޝަނުން ޓޮޓެންހަމް ސަލާމަތްކުރުމަށްޓަކައި ކޯޗެއްގެ އިތުރުން ނަފްސާނީ އެހީތެރިއެއްގެ ދައުރު އަދާކުރަންޖެހުނުކަމަށް ޑެ ޒާބީ އޭރު އަމިއްލައަށްވެސް އެއްބަސްވިއެވެ. އެ ފަހަރު ފަހު މެޗުގައި އެވަޓަން ބަލިކޮށްގެން ކިރިޔާ ލީގުގައި ސަލާމަތްވި ނަމަވެސް، މި ފަހަރުގެ ސީޒަން ފެށުން އެއްގޮތަކަށްވެސް ރަނގަޅެއް ނޫނެވެ.

ބޮޑެތި އުންމީދުތަކަކާއެކު އައު ކުޅުންތެރިންނާއެކު ޓޮޓެންހަމުން ސީޒަން ފެށި ނަމަވެސް، ބްރެންޓްފޯޑް އަތުން 3-0 އިން ލިބުނު ބޮޑު ބަލިވުމާއެކު ޓީމުގެ ކުރީގެ ބަލިކަށިކަން އަނެއްކާވެސް ވަނީ ފެންމަތިވެފައެވެ. މެޗުގެ ފުރަތަމަ ހާފުގައި ކީން ލުވިސް-ޕޮޓަރ އަދި ވިޓާލީ ޖެނެލްޓް ޖެހި ލަނޑުތަކާއެކު ބްރެންޓްފޯޑުން މެޗުގެ ކޮންޓްރޯލް ހޯދިއެވެ. އަދި ދެވަނަ ހާފު ފެށިގެން 49 ވަނަ މިނިޓުގައި މައިކަލް ކަޔޯޑޭ ބްރެންޓްފޯޑުގެ ތިންވަނަ ލަނޑު ޖެހުމާއެކު، މާޔޫސްވި އެތައް ސަޕޯޓަރުންނެއް ވަނީ ދަނޑު ދޫކޮށް ގޮސްފައެވެ. މެޗު ނިމުނުއިރު ސަޕޯޓަރުންގެ ގިނަ ގޮނޑިތައް ހުރީ ހުސްކޮށެވެ. ބްރެންޓްފޯޑުގެ އީގޯ ތިއާގޯއަށް ލިބުނު ޕެނަލްޓީ ދަނޑިއަށް އަމާޒުވުމުން ޓޮޓެންހަމް އިތުރު ލަދުވެތިކަމަކުން ސަލާމަތްވި ނަމަވެސް، މަޝްހޫރު ލަވަކިޔުންތެރިޔާ ޖޮން ބޮން ޖޯވީވެސް ބަލަން އިން މި މެޗުގައި ޓޮޓެންހަމްގެ ފަރާތުން ފެނުނީ އިންތިހާއަށް ދަށް ކުޅުމެކެވެ.

މި މެޗުގައި ޑެ ޒާބީ ވަނީ އައު ހަތަރު ކުޅުންތެރިއަކަށް ފުރަތަމަ އެގާރައިން ފުރުސަތު ދީފައެވެ. އޭގެ ތެރޭގައި އެންޑްރޫ ރޮބަޓްސަން، މާކޯސް ސެނޭސީ، ޔާން ޕޯލް ވަން ހެކޭ އަދި ނިއުކާސަލްއިން 100 މިލިއަން ޕައުންޑަށް ސައިންކުރި ސަންޑްރޯ ޓޮނާލީ ހިމެނެއެވެ. ނަމަވެސް މި ކުޅުންތެރިންނަށް އެކަށީގެންވާ ކުޅުމެއް ނުދެއްކުނުއިރު، މުޅި މެޗުގައިވެސް ޓޮނާލީގެ މައްޗަށް ކުރީ ހޯދީ ބްރެންޓްފޯޑުގެ މަމަޑޫ ސަންގާރޭއެވެ. މީގެ އިތުރުން ވެސްޓްހޭމްއިން 85 މިލިއަން ޕައުންޑަށް ގެނައި މަތެއުސް ފެރްނާންޑޭސް ވެސް ވަނީ ބަދަލު ކުޅުންތެރިއެއްގެ ގޮތުގައި ކުޅެން ނުކުމެފައެވެ. ނަމަވެސް ޑެ ޒާބީއަށް އޮތް އެންމެ ބޮޑު ކަންބޮޑުވުމަކީ އަގުބޮޑު އައު ކުޅުންތެރިން ގެނައި ނަމަވެސް، ޕްރެޝަރު ވަގުތުތަކުގައި ޓީމުގެ ކިބައިގައި އެއްވެސް ހިތްވަރެއް އަދި ރޫހެއް ނެތުމެވެ.

މެޗަށްފަހު ވާހަކަދައްކަމުން ޑެ ޒާބީ ބުނީ، މިއީ ވަރަށް ދެރަ ކުޅުމެއް ފެނިގެންދިޔަ މެޗެއް ކަމަށާއި، ބްރެންޓްފޯޑުން މެޗު ކާމިޔާބުކުރީ ޓޮޓެންހަމަށްވުރެ ބޮޑަށް ހިތްވަރުކޮށްގެން ކަމަށެވެ. އަދި ވޯލްޑް ކަޕަށްފަހު އައި ކުޅުންތެރިންނާއި އައު ކުޅުންތެރިން ގިނަވުމުން ބައެއް ކުޅުންތެރިންގެ ފިޒިކަލް ފިޓްނަސް އެންމެ ރަނގަޅު ނޫންކަން އޭނާ ފާހަގަކުރިއެވެ. ނަމަވެސް އެއީ ބަހާނާއެއްގެ ގޮތުގައި ދައްކަން ބޭނުންނުވާކަމަށާއި، ބްރެންޓްފޯޑުން ދެއްކި ހިތްވަރާއި ރޫހަކީ ޓޮޓެންހަމުން ނަމޫނާއަކަށް ނަގަންޖެހޭ ކަމެއް ކަމަށް އޭނާ ބުންޏެވެ. ޖެހިޖެހިގެން ދެ ސީޒަނުގައި ލީގުގެ 17 ވަނައިގައި ނިންމާލަންޖެހުނު ޓޮޓެންހަމްގެ ފިކުރު ބަދަލުކުރުމަށްޓަކައި، ހަމައެކަނި ކުޅުންތެރިން ބަދަލުކުރުމުގެ ބަދަލުގައި ޑެ ޒާބީއަށް ދެން ޖެހިފައިވަނީ ބަލިވުމަށް އާދަވެފައިވާ ޓީމުގެ މުޅި ސަގާފަތް ބަދަލުކުރުމުގެ ބުރަ މަސައްކަތާ ކުރިމަތިލާށެވެ.