މޮރީނިއޯ އެނބުރި އައިސް ކުޅުނު ފުރަތަމަ މެޗުގައި ރެއާލްއަށް ހަނި މޮޅެއް!

މުހައްމަދު ރިފާއު2026 އޯގަސްޓު 23

ރެއާލް މެޑްރިޑުގެ ކޯޗުކަމާ ހޯސޭ މޮރީނިއޯ ދެވަނަ ފަހަރަށް ހަވާލުވިފަހުން ކުޅުނު ފުރަތަމަ ރަސްމީ މެޗުން، މެޗުގެ 90 ވަނަ މިނިޓުގައި ޖެހި ލަނޑުން 2-1 އިން އެސްޕެންޔޯލް ބަލިކޮށް އެފްސީ ރެއާލް މެޑްރިޑުން ފެށުން ރަނގަޅުކޮށްފިއެވެ.

މެޗުގެ މުހިންމު އުސްއަލިިތައް:

• ފުރަތަމަ ލަނޑު: މެޗުގެ 9 ވަނަ މިނިޓުގައި އާރްދާ ގުލޭރު ނަގައިދިން ހިލޭ ޖެހުމަކުން އިންގްލަންޑުގެ މިޑްފީލްޑަރު ޖޫޑް ބެލިންގހޭމް ވަނީ ބޮލުން ގޯލުގެ ތެރެއަށް ބޯޅަ ފޮނުވާލައިގެން ރެއާލް މެޑްރިޑަށް ކުރިއެރުން ހޯދައިދީފައެވެ.
• އެސްޕެންޔޯލްގެ އެއްވަރުކުރުން: މެޗުގެ 30 ވަނަ މިނިޓުގައި އެސްޕެންޔޯލްގެ އާ ސައިނިންގ ކާލާ ވަނީ ހާވީ ހެރެނަންޑޭޒް ތަނަވަސްކޮށްދިން ފުރުސަތަކުން ލަނޑެއް ޖަހައި ނަތީޖާ އެއްވަރުކޮށްފައެވެ.
• ރެއާލްގެ ނުރައްކާތެރި ހަމަލާތައް: މެޗުގެ ގިނަ ވަގުތު ރެއާލް މެޑްރިޑުން ކޮންޓްރޯލް ކުރިއިރު، ބެލިންގހޭމް ބޮލުން ފޮނުވާލި ހަމަލާއެއް އެސްޕެންޔޯލްގެ ގޯލްކީޕަރު މާކޯ ދްމިތުރޯވިޗް ވަނީ ދިފާއުކޮށް ގޯލުގެ ހުރަސް ދަނޑީގައި ޖައްސާފައެވެ. އަދި ފެޑެރިކޯ ވަލްވާޑޭ ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.
• ނިންމާލުމުގެ ލަނޑު: މެޗު ނިމެން އުޅެނިކޮށް ރެއާލް މެޑްރިޑް މޮޅުކޮށްދިނީ ބެންޗުން ކުޅެންނުކުތް، ލެވަންޓޭއިން 21 މިލިއަން ޕައުންޑަށް ސައިންކުރި ކާލޯސް އެސްޕީއެވެ. ޔާން ދިއޮމާންޑޭ، ކީލިއަން އެމްބާޕޭއަށް ދިން ބޯޅަ އެސްޕީއަށް ލިބުމާއެކު އޭނާ ވަނީ ހަމަޖެހިލާފައި ގޯލުގެ ތެރެއަށް ފޮނުވާލާފައެވެ.

މި މެޗުގައި މޮރީނިއޯ ވަނީ އާ ސައިނިންގތައް ކަމަށްވާ ޑެންޒެލް ޑަމްފްރީސް، އިބްރާހިމާ ކޮނާޓޭ އަދި ބެރްނާޑޯ ސިލްވާގެ އިތުރުން ބެންޗުން ޓްރެންޓް އަލެކްސަންޑަރ-އާނޯލްޑް، މާކް ކުކުރެޔާ އަދި 120 މިލިއަން ޕައުންޑުގެ ރެކޯޑް އަގަކަށް ސައިންކުރި ޔާން ދިއޮމާންޑޭ ބޭނުންކޮށްފައެވެ.

ޖުލައި މަހު 3 އަހަރުގެ އެއްބަސްވުމެއްގެ ދަށުން ހަވާލުވި 63 އަހަރުގެ މޮރީނިއޯ ވަނީ މީގެ ކުރިން (2010 އިން 2013 އަށް) ރެއާލްގައި ހޭދަކުރި 3 ސީޒަނުގައި ލާލީގާ، ކޮޕާ ޑެލް ރޭ އަދި ސްޕެނިޝް ސުޕާ ކަޕް ކާމިޔާބުކޮށްފައެވެ. މޮރީނިއޯ ވަނީ އޭނާގެ ކޯޗިންގ ކޭރިއަރުގައި ޖުމްލަ 26 މުހިންމު ތަށި ކާމިޔާބުކޮށްފައެވެ. މީގެ ތެރޭގައި ޗެލްސީއާއެކު 3 ޕްރިމިއާ ލީގު އަދި ޕޯޓޯ އާއި އިންޓަ މިލާނާއެކު ކާމިޔާބުކުރި ޗެމްޕިއަންސް ލީގު ހިމެނެއެވެ.

ފާއިތުވި ދެ ސީޒަނުގައި އެއްވެސް ތައްޓެއް ނުލިބި ދިއުމުން، މިއަހަރުގެ ޖެނުއަރީ މަހު ރެއާލުން ވަނީ ޒަބީ އަލޮންސޯ ވަކިކޮށް، ސީޒަން ނިމެންދެން ވަގުތީ ކޯޗެއްގެ ގޮތުގައި އަލްވާރޯ އަރްބެލޯއާ ހަވާލުކޮށްފައެވެ.