ރައީސްގެ އަމާޒަކީ މަސް ގަންނަ އަގު 20ރ. ގައި ހިފެހެއްޓުން

މުހައްމަދު ރިފާއު2026 ޖޫން 19

ސަރުކާރުގެ މަސްކުންފުނި މިފްކޯ އަށް މަަސް ގަންނަ ރޭޓު، ކިލޯއަކަށް 20ރ. އަށް ވުރެ ދަށް ނުކޮށް ހިފަހައްޓޭނެ ގޮތްތަކެއް ރޭވޭނެ ކަމަށާއި އެއީ އަމާޒު ކަމަށް ރައީސް ޑރ. މުހައްމަދު މުއިއްޒު އިއްޔެ ވިދާޅުވެއްޖެ އެވެ.

ރައީސް އޮފީހުން ކޮންމެ ހަފުތާއަކު ތައްޔާރުކުރާ "ދަ ޕަލްސް" ޕްރޮގްރާމްގައި "މިހާރު" އަށް ހާއްސަކުރި އެޕިސޯޑްގައި ރައީސް ވިދާޅުވީ މަހަށް ހަމަ އަގު ހޯދައިދޭން ސަރުކާރުން އެޅި އެންމެ މުހިއްމު ފިޔަވަޅަކީ މާކެޓް ރޭޓާ އެއްވަރަށް އަގު ފްލޯޓްކޮށްލުން ކަމަށާއި އޭގެ ނަތީޖާ ރަނގަޅު ކަމަށެވެ. އަގު ފްލޯޓް ކޮށްލި އިރު މަސްކިލޯއެއް 16ރ. އަށް ހުރި ނަމަވެސް މިހާރު އެ އަގު 20.ރ އަށް މަތި ކޮށްފައިވާތީ އެ ރޭޓްގައި ހިފަހައްޓަން ގިނަ މަސައްކަތްތަކެއް ކުރަން ޖެހޭ ކަމަށް ރައީސް ވިދާޅުވި އެވެ. 

މަސް ގަންނަ އަގު 20ރ. އަށް ވުރެެ ދަށް ނުކޮށް ހިފެެހެއްޓުމަށް ޓަކައި ކުރަން ޖެހޭ އެއް ކަމަކީ މަސް ރައްކާ ކުރުމުގެ ގާބިލުކަން އިތުރުކުރުމެވެ. ދެވަނަ ކަމަކީ މަހަށް ވެލިއު އެޑްކުރުމުގެ (ދަޅުގައި ބަންދުުކުރުން ފަދަ ގޮތް) ހެދުމުގެ ގާބިލުކަން އިތުރުން ކަމަށް ވެސް އެ މަނިކުފާނު ވިދާޅުވި އެވެ.

ރައީސް ވިދާޅުވި ގޮތުގައި ސަރުކާރުގެ މަސް ކުންފުނި މިފްކޯގެ ފެލިވަރު ކޭނިން ފެކްޓްރީގައި މަސް ޕްރޮރެސް ކުރުމުގެ ގާބިލުކަން އިތުުރުކުރަން ބައެއް ގައުމުތަކުގެ އެހީގައި ހިންގަން އިއުލާނު ކޮށްފައިވާ މަޝްރޫއު ކުޑަކޮށް ލަސްވި ކަމަށާއި ނަމަވެސް އެކަން ހައްލު ކުރެވޭނެ ގޮތް މިހާރު ވަނީ ހަމަޖެހިފަ އެވެ. 

އެ މަނިކުފާނު ވިދާޅުވި ގޮތުގައި ފެލިވަރު ފެކްޓްރީގެ ގާބިލުކަން އިތުރުކުރުމުގެ މަސައްކަތުގެ އިތުރުން ކޯލްޑް ސްޓޯރޭޖް އިތުރުކުރުމުގެ މަޝްރޫއުތަކުގެ ތެރޭގައި ވެސް ބޭރުގެ އެހީގައި ހިންގާ މަޝްރޫއުތައް ގިނަ އެވެ. 

މިފްކޯއަށް މަސްކިލޯއެއް ގަންނަ އަގު 20. އަށް ބަދަލުކުރީ މިމަހުގެ ނުވަ ވަނަ ދުވަހު އެވެ.