ފީފާ ވޯލްޑް ކަޕް 2026: ވަރުގަދަ އިންގްލެންޑް މިރޭ ކްރޮއޭޝިއާއާއި ދެކޮޅަށް ނިކުންނަނި!

މުހައްމަދު ރިފާއު2026 ޖޫން 17

ފީފާ ވޯލްޑް ކަޕް 2026 ގެ ގްރޫޕް އެލްގައި ހިމެނޭ ދުނިޔޭގެ ފުޓްބޯޅައިގެ ދެ ބާރު ކަމަށްވާ އިންގްލެންޑާއި ކުރޮއޭޝިއާ ބައްދަލުކުރާ ފޯރިގަދަ މެޗު މިރޭ އެމެރިކާގެ ޑަލަސްގެ އޭޓީއެންޑްޓީ ސްޓޭޑިއަމްގައި ކުޅުމަށް މިވަނީ ތައްޔާރުވެފައެވެ. ރާއްޖޭގެ ގަޑިން މިރޭ ދަންވަރު 01:00 ގައި ފަށާ މި މެޗަކީ ދެ ގައުމުގެ ސަޕޯޓަރުންވެސް ނުހަނު އިންތިޒާރު ކުރަމުންދާ މެޗެކެވެ.

އިންގްލެންޑުން އެންމެ ފަހުން ވޯލްޑް ކަޕްގެ ތަށި އުފުލާލީ މީގެ 60 އަހަރު ކުރިން 1966 ގައެވެ. ނަމަވެސް، އާ ކޯޗު ތޯމަސް ޓުޗެލްގެ އިރުޝާދުގެ ދަށުން ނުކުންނަ އިންގްލެންޑް ޓީމަކީ މިފަހަރުގެ މުބާރާތުގެ ތަށި ހޯދާނެ ކަމަށް އެންމެ ބޮޑަށް ބެލެވޭ ހަތަރު ގައުމުގެ ތެރޭގައި ހިމެނޭ ޓީމެކެވެ.

• ކެޕްޓަން ހެރީ ކޭންގެ ފޯމު: އިންގްލެންޑްގެ ލީޑަރަކީ ބަޔާން މިއުނިކާއެކު ބުންޑަސްލީގާ ކާމިޔާބުކޮށް، މިދިޔަ ސީޒަނުގައި 51 މެޗުން 61 ގޯލު ޖަހާފައިވާ ތޫނުފިލި ފޯވާޑް ހެރީ ކޭންއެވެ. އުމުރުން 32 އަހަރުގެ ކޭން ބުނިގޮތުގައި މިއީ އިންގްލެންޑަށް ތަށި ހޯދަން ލިބޭނެ އެންމެ ރަނގަޅު އެއް ފުރުސަތެވެ.
• ޓީމުގެ ޚަބަރު: މުބާރާތް ފެށެން ކުޑަތަންވެފައިވަނިކޮށް އިންގްލެންޑްގެ ޑިފެންޑަރު ޓީނޯ ލިވްރަމެންޓޯއަށް ފައިގެ ފަލަމަސްގަނޑަށް ލިބުނު އަނިޔާއެއްގެ ސަބަބުން ވަނީ މުބާރާތުން ވަކިވާން ޖެހިފައެވެ. އޭނާގެ ބަދަލުގައި ޓީމަށް ނަގާފައިވަނީ ޓްރެވޯ ޗަލޮބާ އެވެ.

ކުރޮއޭޝިއާ އަކީ ވޯލްޑް ކަޕްތަކުގައި އަބަދުވެސް ހައިރާންކަމެއް ނެރޭ، އެންމެ ފަހުން ބޭއްވި ދެ މުބާރާތުގެ ތެރެއިން 2018 ގެ ރަނަރަޕް އަދި 2022 ގެ ތިންވަނަ ޓީމެވެ.

• ލެޖެންޑް ލޫކާ މޮޑްރިޗް: އުމުރުން 40 އަހަރުގެ ކެޕްޓަން ލޫކާ މޮޑްރިޗް މިރޭ ނުކުންނާނީ ގައުމީ ޓީމަށް އޭނާ ކުޅޭ 199 ވަނަ މެޗަށެވެ. ކޯޗު ޒްލަޓްކޯ ޑާލިޗް ސިފަކުރި ގޮތުގައި މޮޑްރިޗްއަކީ ދަނޑުމަތީގައި އޭނާގެ "ކަނާތް" ފަދަ މުހިންމު ކުޅުންތެރިޔެކެވެ.
• ކޭންއަށް ސަމާލުވުން: ކޯޗު ޑާލިޗް ވަނީ އިންގްލެންޑްގެ ހެރީ ކޭންއަކީ ދުނިޔޭގެ އެންމެ މޮޅު ސްޓްރައިކަރު ކަމަށް ބުނެ، އޭނާ ހުއްޓުވަން ޚާއްސަ ސަމާލުކަމެއް ދޭންޖެހޭނެ ކަމަށް އިންޒާރުދީފައެވެ.

ތަފާސްހިސާބުތަކަށް ބަލާއިރު، މިރޭގެ މެޗަކީ އިންގްލެންޑާއި ކުރޮއޭޝިއާ ފުޓްބޯޅައިގެ ތާރީޚުގައި ބައްދަލުކުރާ 12 ވަނަ މެޗެވެ. މީގެ ކުރިން ކުޅުނު 11 މެޗުގެ ރެކޯޑަށް ބަލާއިރު ކުރިލިބެނީ އިންގްލެންޑަށެވެ. އެގައުމުން ވަނީ 6 މެޗު ކާމިޔާބުކޮށްފައެވެ. ކުރޮއޭޝިއާ އަށް 3 މެޗުން މޮޅުވެވުނުއިރު، 2 މެޗު ނިމުނީ އެއްވަރުވެގެންނެވެ. ނަމަވެސް، އިންގްލެންޑްގެ ސަޕޯޓަރުން ހަނދާންކުރަންޖެހޭ މުހިންމު ކަމަކީ، 2018 ވަނަ އަހަރުގެ ވޯލްޑް ކަޕް ސެމީ ފައިނަލުގައި ކުރޮއޭޝިއާ އަތުން 2-1 އިން ބަލިވެ އިންގްލެންޑް މުބާރާތުން ކެޓި ހިތްދަތި ހަނދާނެވެ.

މިރޭގެ މެޗުގެ ނަތީޖާ ނުކުންނާނެ ގޮތުގެ ކުރިއަށްލެފުންތަކަށް ބަލާއިރު، މަޝްހޫރު ތަފާސްހިސާބު އެނަލައިޒް ކުރާ "އޮޕްޓާ" ސުޕަ ކޮމްޕިއުޓަރުން ބުރަވަނީ އިންގްލެންޑް ކޮޅަށެވެ. އެގޮތުން މި މެޗުން އިންގްލެންޑް މޮޅުވުމުގެ ފުރުސަތު 55.9% އޮތްއިރު، ކުރޮއޭޝިއާ އަށް މޮޅުވުމުގެ އޮތީ އެންމެ 20.8% އެވެ. އަދި ދެ ޓީމު އެއްވަރުވުމުގެ ފުރުސަތު އޮތީ 23.3% ގައެވެ.

ގްރޫޕް އެލްގައި ހިމެނެނީ އިންގްލެންޑް، ކުރޮއޭޝިއާ، ގާނާ، އަދި ޕެނަމާ އެވެ. މިފަހަރުގެ 48 ޓީމުގެ ވޯލްޑް ކަޕްގައި ކޮންމެ ގްރޫޕަކުން އެންމެ މޮޅު ދެ ޓީމުގެ އިތުރުން، ތިންވަނައަށްދާ އެންމެ ރަނގަޅު 8 ޓީމު ގަދަ 32 ގެ ބުރަށް ކޮލިފައިވާނެއެވެ.