ވޯލްޑް ކަޕްގައި ޔަމާލް ޖެހި ފުރަތަމަ ލަނޑާއެކު އޭނާ ކުރި ސަޖިދައަށް ގިނަ ބައެއްގެ ސަމާލުކަން ލިބިއްޖެ

ޒައުޖަތު އަޙުމަދު2026 ޖޫން 21

ވޯލްޑް ކަޕްގައި ސްޕެއިންގެ ލަމީން ޔަމާލް ޖެހި ފުރަތަމަ ލަނޑާއެކު އޭނާ ކުރި ސަޖިދައަށް ގިނަ ބައެއްގެ ސަމާލުކަން ލިބިއްޖެއެވެ.

ލަމީންގެ ފުރަތަމަ ވޯލްޑް ކަޕްގައި، އޭނާ ކުޅުނު ފުރަތަމަ މެޗްގައި މިރޭ ބައްދަލުކުރި ސްޕެއިން، ސަޢޫދީ ޢަރަބިއްޔާ މެޗް ނިމިގެން ދިޔައީ 0-4 ލަނޑުން ސްޕެއިން މޮޅުވެގެންނެވެ.

މިރޭގެ މެޗުގެ 10 ވަނަ މިނެޓުގައި ޔަމާލް ވަނީ ލަނޑުޖަހައިފައެވެ. އޭނާ ޖެހި ހިތްގައިމު ލަނޑަށްފަހު، ޒުވާން ތަރި ލަމީން ޔަމާލް ވަނީ، އެމެރިކާގެ "އެޓްލާންޓާ" ދަނޑުމަތީގައި ސަޖިދައެއް ކޮށްފައެވެ.

މެޗުގެ ވަރަށް މުހިންމު ދަނޑިވަޅެއްގައި ޔަމާލް ކާމިޔާބު ކުރި މި ލަނޑާއެކު މުޅި ދަނޑު ގަދަ އަޑުން ގުގުމައިގެން ދިޔަ ވަގުތު، އޭނާ ވަނީ ވަގުތުން ބިމަށް ތިރިވެ، މާތްﷲއަށް ޝުކުރުވެރިވުމުގެ ގޮތުން ސަޖިދައެއް ކޮށްފައެވެ.

މިއީ ފުޓްބޯޅަ ދަނޑުމަތީގައި ގިނަ ބައެއްގެ ސަމާލުކަން ހުއްޓުނު، އަދި ގިނަ ބަޔަކަށް ފުން އަސަރުތަކެއް ކުރުވި ވަގުތުކޮޅެކެވެ.

​ޔަމާލްގެ މި އުފާފާޅުކުރުމުގެ ވީޑިއޯތަކާއި ފޮޓޯތައް މިހާރު ދަނީ ސޯޝަލް މީޑިއާގައި ވަރަށް ބާރަށް ދައުރުވަމުންނެވެ. ވަރަށް ގިނަ އަދަދެއްގެ ސަޕޯޓަރުން އަންނަނީ އޭނާގެ މި ހިތްތިރިކަމާއި، ކާމިޔާބީގެ ވަގުތުގައިވެސް ދީނީ އަގުތައް ދެމެހެއްޓި ގޮތަށް ވަރަށް ބޮޑަށް ތައުރީފު ކުރަމުންނެވެ.

ސްޕެއިން ޓީމުން 4 ލަނޑު ޖެހުމުން، ސަޕޯޓަރުންނަށް ޚާއްޞަ އެތައް ވަގުތުތަކެއް އައި ނަމަވެސް، ޔަމާލްގެ މި ޚާއްޞަ ވަގުތުކޮޅު ވެގެން ގޮސްފައިވަނީ މުޅި މެޗުގެވެސް އެންމެ ފާހަގަކޮށްލެވުނު އަދި ތާރީޚީ މަންޒަރަށެވެ.

މޮރޮކޯގެ ބައްޕައަކާ އިކުއިޓޯރިއަލް ގިނީގެ މަންމައަކަށް އުފަން ލަމީން ޔަމާލް އުފަންވެފައިވަނީ ސްޕެއިންގައެވެ.

ޔަމާލް މަޝްހޫރުވެގެން ދިޔައީ 2024 ވަނަ އަހަރު ކުޅުނު ޔޫރޯ ފުޓްބޯޅަ މުބާރާތުންކަން ފާހަގަ ކުރެވެއެވެ.