ވޯލްޑް ކަޕް 2026: އެމްބާޕޭގެ ރެކޯޑު ލަނޑުތަކާއެކު ސެނެގާލް ބަލިކޮށް ފްރާންސުން ފެށުން ގަދަކޮށްފި!

މުހައްމަދު ރިފާއު2026 ޖޫން 17

ފީފާ ވޯލްޑް ކަޕްގެ ގްރޫޕް 'އައި' ގައި ރޭ ކުޅުނު ފޯރިގަދަ މެޗުން ސެނެގާލް 1-3 އިން ބަލިކޮށް ފްރާންސުން މުބާރާތުގެ ފެށުން ރަނގަޅުކޮށް، އެ ޓީމުގެ ކެޕްޓަން ކިލިއަން އެމްބާޕޭ ފްރާންސްގެ ފުޓްބޯޅަ ތާރީޚުގެ ތެރެއަށް ވަދެޖެހިއްޖެއެވެ.

މެޓްލައިފް ސްޓޭޑިއަމްގައި ކުޅުނު މި މެޗުގައި އެމްބާޕޭ ޖެހި ލަނޑުތަކާއެކު، އޭނާ ވަނީ ފްރާންސް ގައުމީ ޓީމަށް އެންމެ ގިނަ ލަނޑު ޖަހައިދީގެން އޮލިވިއާ ޖިރޫ ހަދާފައިވާ ތާރީޚީ ރެކޯޑު މުގުރާލައި، ގައުމުގެ އެންމެ ގިނަ ލަނޑު ޖެހި ކުޅުންތެރިޔާގެ ޝަރަފު ހޯދާފައެވެ.

މިއީ 2002 ވަނަ އަހަރުގެ ވޯލްޑް ކަޕްގެ ހުޅުވުމުގެ މެޗުގައި ސެނެގާލުން އޭރުގެ ޗެމްޕިއަން ފްރާންސް ބަލިކޮށް ސިހުން ގެނުވި ފަހުން، މި ދެ ޓީމު ވޯލްޑް ކަޕެއްގައި ބައްދަލުކުރި ފުރަތަމަ ފަހަރުކަން ފާހަގަކޮށްލެވެއެވެ.

ޕާޕް ތިއޯގެ އިރުޝާދުގެ ދަށުން ނުކުތް ސެނެގާލުން ފުރަތަމަ ހާފުގެ ކުރީކޮޅު މޮޅަށް ކުޅެ ފްރާންސްގެ ބެކްލައިނަށް ވަރަށް ބޮޑަށް ބާރުބޮޑުކުރިއެވެ. އެގޮތުން ފުރަތަމަ 20 މިނެޓުގެ ތެރޭގައި ސެނެގާލްގެ ނިކޮލަސް ޖެކްސަން ފޮނުވާލި ހަމަލާއެއް ގޯލުގެ އަރިމަތީ ދަނޑިއަށް އަމާޒުވިއިރު، އިސްމާއިލާ ސާއަށް ލިބުނު ރަނގަޅު ފުރުސަތެއް ދިޔައީ ގޯލާ އަމާޒުނުވެ ބޭރަށެވެ.

ފްރާންސްގެ ކުރީލައިންގައި އެމްބާޕޭގެ އިތުރުން އޮސްމާން ޑެމްބޭލޭ އަދި މައިކަލް އޮލީސޭ ފަދަ ނުރައްކާތެރި ތަރިން ތިބި ނަމަވެސް، ސެނެގާލްގެ ތަޖުރިބާކާރު ކެޕްޓަން ކަލިދޫ ކުލިބާލީ އިސްވެ ހުރެ ދެއްކި ހިތްވަރުގަދަ ޑިފެންސިވް ކުޅުމުގެ ސަބަބުން ފުރަތަމަ ހާފު ނިމުނީ 0-0 އިން އެއްވަރުވެގެންނެވެ.

ދެވަނަ ހާފަށް ނުކުމެ ފްރާންސުން މެޗުގެ ކޮންޓްރޯލް އެއްކޮށް އަތްދަށަށް ގެނައެވެ. ނަތީޖާއެއްގެ ގޮތުން މެޗުގެ 66 ވަނަ މިނެޓުގައި މައިކަލް އޮލީސޭ ތަނަވަސްކޮށްދިން ރީތި ފުރުސަތަކުން ކެޕްޓަން ކިލިއަން އެމްބާޕޭ ވަނީ ފްރާންސަށް މެޗުގެ ލީޑު ނަގައިދީ ގައުމީ ރެކޯޑު އާކޮށްފައެވެ.

މެޗުގެ 89 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ބްރެޑްލީ ބާކޯލާ ލަނޑެއް ޖަހައި ފްރާންސްގެ ދެވަނަ ލަނޑު ކާމިޔާބުކޮށްދިނެވެ. އޭގެ ފަހުން މެޗުގެ އިތުރު ވަގުތުގެ ފަސްވަނަ މިނެޓުގައި (90+5') ސެނެގާލްގެ ބެންޗުން އެރި އެމްބާޔް ވަނީ ލަނޑެއް ޖަހައި އެ ޓީމަށް އުންމީދު އައު ކޮއްދީފައެވެ. ނަމަވެސް، އޭގެ އެންމެ މިނެޓެއް ފަހުން، އިތުރު ވަގުތުގެ ހަވަނަ މިނެޓުގައި (90+6') ކިލިއަން އެމްބާޕޭ އޭރިއާ ބޭރުން ފޮނުވާލި ހިތްގައިމު ސޮޓަކުން ގޯލުގެ މަތީ ކަނަށް ބޯޅަ ފޮނުވާލައި، ފްރާންސަށް 3 ޕޮއިންޓް މުޅިން ކަށަވަރުކޮށްދީފައެވެ.

މި މޮޅާއެކު ގްރޫޕް "އައި" ގެ އެއްވަނައިގައި ފްރާންސް އޮތްއިރު، އެ ޓީމު ދެން ނުކުންނާނީ އިރާގާ ދެކޮޅަށެވެ. އަދި ސެނެގާލް ދެން ބައްދަލުކުރާނީ ނޯވޭއާ އެވެ.