ރޮނާލްޑޯއާ ނުލައި ޕޯޗުގަލް މާ ވަރުގަދަ؟

މުހައްމަދު ރިފާއު2026 ޖޫން 07

ކްރިސްޓިއާނޯ ރޮނާލްޑޯ ޕޯޗުގަލްގެ ސީނިއާ ގައުމީ ޓީމަށް ކުޅެން ފެށީ 2003 ވަނަ އަހަރުގެ އޮގަސްޓް 20 ގައެވެ. އޭގެ 23 އަހަރު ފަހުން، އުމުރުން މިހާރު 41 އަހަރުގެ ރޮނާލްޑޯ މިއަހަރު ނުކުންނާނީ އޭނާގެ ރެކޯޑް 6 ވަނަ ވޯލްޑް ކަޕަށެވެ. މިއީ އާޖެންޓީނާގެ ލިއޮނަލް މެސީ އަދި މެކްސިކޯގެ ގީލާމޯ އޮޗޯއާއާ އެކު އޭނާ ހިއްސާކުރާނެ ތާރީޚީ ރެކޯޑެކެވެ.

ބައިނަލްއަޤުވާމީ ފުޓްބޯޅައިގައި އެންމެ ގިނަ ލަނޑު ޖަހާފައިވާ ރޮނާލްޑޯ އަކީ ޕޯޗުގަލްގެ ފުޓްބޯޅަ މުޅިން ބަދަލުކޮށްލި ކުޅުންތެރިޔާއެވެ. ނަމަވެސް، 2022 ގެ ޤަތަރު ވޯލްޑް ކަޕަށްފަހު، ޓީމުގައި އޭނާގެ ދައުރާ މެދު ކުރެވޭ ބަހުސްތައް ވަނީ ކުރިއަށްވުރެ ބޮޑަށް ހޫނުވެފައެވެ.

ރޮނާލްޑޯ ނެތި ޕޯޗުގަލް މާ މޮޅު؟

ކޯޗު ރޮބާޓޯ މާޓިނޭޒްގެ އިރުޝާދުގެ ދަށުން ޕޯޗުގަލްއިން ހޯދި އެންމެ ބޮޑު ދެ މޮޅު އައީ ރޮނާލްޑޯ ޓީމުގައި ނުހިމެނޭ މެޗުތަކުގައެވެ. އެއީ ލަގްޒެމްބާގް އަތުން 9-0 އިން އަދި ނިމިދިޔަ ނޮވެމްބަރު މަހު އަރްމީނިއާ އަތުން 9-1 އިން މޮޅުވި މެޗުތަކެވެ. މިއާއެކު، އޭނާ ނެތި ޓީމު މާ ހަލުވިކޮށް އަދި އެއްބައިވަންތަކޮށް ކުޅޭ ކަމަށް ބުނެ ގިނަ ފާޑުކިޔުންތަކެއް ވަނީ އަމާޒުވެފައެވެ.

ޕޯޗުގަލްގެ ބައެއް ފުޓްބޯޅަ ދިރާސާކުރާ ފަރާތްތަކުން ބުނާ ގޮތުގައި، ވޯލްޑް ކަޕް ކާމިޔާބުކުރަން ބޭނުންވާ ޓީމެއްގެ ފުރަތަމަ އެގާރައިގައި ހިމެނޭނެ ފެންވަރުގެ ފުޓްބޯޅައެއް މިހާރު ރޮނާލްޑޯގެ ކިބަޔަކު ނެތެވެ. އަދި އޭނާ ކުޅެނީ ޓީމު މޮޅުކޮށްދޭން ނޫން ކަމަށާއި، އަމިއްލައަށް "މައިގަނޑު ޝަޚުޞިއްޔަތު" އަށް ވާންވެގެން ކަމަށް ބުނެ ކުރީގެ ކުޅުންތެރިންވެސް ދަނީ ފާޑުކިޔަމުންނެވެ.

ކޯޗާއި ސަޕޯޓަރުންގެ ދިފާޢު: އޭނާ އަކީ ބަދަލުނުކުރެވޭނެ ބާރެއް

މި ފާޑުކިޔުންތަކަށް ރައްދުދެމުން ކޯޗު މާޓިނޭޒް ބުނީ، ރޮނާލްޑޯ ޓީމުގައި ހުރީ ކުރީގެ ކާމިޔާބީތަކަށް ބަލާފައި ނޫން ކަމަށާއި، މިހާރުވެސް އޭނާ ދައްކަމުންދާ މޮޅު ކުޅުމުގެ ސަބަބުން ކަމަށެވެ. އެގޮތުން ގައުމީ ޓީމަށް ކުޅުނު ފަހު 31 މެޗުގައި އޭނާ ވަނީ 25 ގޯލު ޖަހާފައެވެ.

ކުރީގެ ކުޅުންތެރިން ފާހަގަކުރާ ގޮތުގައި، ރޮނާލްޑޯގެ ދުވެލި ކުރިއަށްވުރެ ކުޑަތަންކޮޅެއް ދަށްވި ނަމަވެސް، އޭނާގެ ފަންނީ ހުނަރާއި، ވިސްނުންތޫނުކަމާއި، ޚާއްޞަކޮށް ނަފްސާނީ ވަރުގަދަކަމަކީ ވޯލްޑް ކަޕް ފަދަ ބޮޑު މުބާރާތެއްގައި ޓީމަށް ކޮންމެހެން ބޭނުންތެރި ސިފަތަކެކެވެ. ޒުވާން ކުޅުންތެރިން ނަމޫނާއަކަށް ބަލަނީ އޭނާއެވެ.

ރޮނާލްޑޯގެ ނުފޫޒާއި މުސްތަޤުބަލް

ޕޯޗުގަލްގައި ރޮނާލްޑޯގެ ނުފޫޒު އޮތް މިންވަރު ސާފުވަނީ، ޕޯޗުގަލް ފުޓްބޯޅަ ފެޑެރޭޝަނުން ރޮނާލްޑޯގެ އަމިއްލަ ކުންފުންޏެއް ކަމަށްވާ "AVA CR7" އާއެކު ވިޔަފާރީގެ އެއްބަސްވުމެއް އެކުލަވާލުމުންނެވެ. ފެޑެރޭޝަނުން ބުނާ ގޮތުގައި މީގައި އެއްވެސް މަސްލަހަތު ފުށުއެރުމެއް ނެތެވެ.

މިއީ އޭނާގެ ފަހު ވޯލްޑް ކަޕްކަން ރޮނާލްޑޯ ވަނީ ކަށަވަރުކޮށްދީފައެވެ. ފެޑެރޭޝަނުގެ ރައީސް ޕެޑްރޯ ޕްރޮއެންސާ ވިދާޅުވީ، ރޮނާލްޑޯގެ ވަކިވުމަށްފަހު އަންނާނެ ދުވަސްތަކަށް ފެޑެރޭޝަނުން ބިރެއް ނެތި ތައްޔާރުވަމުންދާ ކަމަށާއި، އެ ބަދަލު އަންނާނީ ގަވާއިދުން، ވަރަށް އާދައިގެ ގޮތަކަށް ކަމަށެވެ.

މި މަހުގެ 17 ވަނަ ދުވަހު ޑީއާރް ކޮންގޯއާ ދެކޮޅަށް ޕޯޗުގަލްއިން ވޯލްޑް ކަޕްގެ ފުރަތަމަ މެޗު ކުޅޭއިރު، ރޮނާލްޑޯގެ އަމާޒަކީ ޔޫސެބިއޯގެ 9 ވޯލްޑް ކަޕް ގޯލުގެ ރެކޯޑް މުގުރާލުމާއި، ޕޯޗުގަލްއަށް ފުރަތަމަ ފަހަރަށް ވޯލްޑް ކަޕް ތަށި ހޯދައިދިނުމެވެ.